ޖުޑީޝަލް ސާވިސް ކޮމިޝަން (ޖޭއެސްސީ) އެކުލަވާލާފައިވާ ގޮތް ބަދަލުކޮށް، އެ ކޮމިޝަން އިސްލާހު ކުރުމުގެ ނިޔަތެއް ސަރުކާރުން ނުގެންގުޅޭ ކަމަށާއި، އެއީ ރައީސް އިބްރާހީމް މުހައްމަދު ޞާލިޙް ވެރިކަމަށް ވަޑައިގަންނަވަން ވޯޓު ހޯއްދަވަން ދެއްކެވި ވާހަކައެއް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަލީ ހުސެއިން ވިދާޅުވެއްޖެއެވެ.
ޖޭއެސްސީ އިސްލާހު ކުރުމަކީ އެޖެންޑާ 19 މެނިފެސްޓޯގައި ހިމަނާފައިވާ ރައީސް ޞާލިޙްގެ ރިޔާސީ ވައުދުފުޅެކެވެ. ނަމަވެސް ދައުރު ނިމެން ކައިރިވެފައިވާއިރު ޖޭއެސްސީ އިސްލާހުކުރުމަށް އެއްވެސް މަސައްކަތެއް ސަރުކާރުން ކޮށްފައިނުވާ ކަމަށް ބުނެ ބައެއް މެންބަރުން ވަނީ މީގެ ކުރިން ވެސް ކަންބޮޑުވުން ފާޅުކޮށްފައެވެ.
ޖޭއެސްސީ އިސްލާހުކުރުމަށް ގާނޫނު އަސާސީއަށް އިސްލާހު ގެނައުމުގެ މަސައްކަތް ބަންޑާރަ ނައިބުގެ އޮފީހުން މިދިޔަ އަހަރު ފަށާފައިވާއިރު، މަޖިލީހުގެ ފުރަތަމަ ދައުރުގައި އެ އިސްލާހު ހުށަހަޅަން އޭޖީ އޮފީހުން ނިންމި ނަމަވެސް ދައުރު ނިމި މަޖިލިސް ޗުއްޓީއަށް ދިޔަ އިރުވެސް އެ ބިލުގެ ހިލަމެއް ނެތެވެ.
މިކަމާ ގުޅޭ ގޮތުން ކަންބޮޑުވުން ފާޅުކުރައްވައި "ސަން"އަށް މެންބަރު އަލީ ހުސެއިން ވިދާޅުވީ، ކަމެއް ކުރެވޭނީ އެ ކަމެއް ކުރުމަށް އިޚްލާސްތެރި ނިޔަތެއް އޮވެގެން ކަމަށާއި، ޖޭއެސްސީ އިސްލާހު ކުރުމުގެ އެއްވެސް ވިސްނުމެއް މި ސަރުކާރުން ނުގެންގުޅޭ ކަމަށެވެ.
ވެރިކަމަށް ފަސް އަހަރު ހަމަވާން ގާތްވެފައިވާ އިރު އެކަން ކޮށްދެއްވާނެ ކަމަށް އެކި ފަހަރު މަތީން ރައީސް ވިދާޅުވި ނަމަވެސް އެ ކަމުގެ އެއްވެސް އަމަލީ މަސައްކަތެއް ފެނިފައިނުވާކަން މެންބަރު ފާހަގަކުރެއްވިއެވެ.
ކޮންމެ ފަހަރަކު ރިޔާސީ ބަޔާން އިއްވާއިރު ވެސް އެބަ ބުނޭ ޖޭއެސްސީ އިސްލާހު ކޮށްދޭނަމޭ. މިދިޔަ އަހަރު ނިމިގެން ދިޔަ އިރު މަޖިލީހަށް ހުށަހަޅާ ބިލްތަކުގެ ތެރޭގައި އޮތް ޖޭއެސްސީގެ ކޮމްޕޮޒިޝަން ބަދަލުކުރުމަށް ގާނޫނުއަސާސީއަށް ގެންނަން ޖެހޭ ބަދަލުތައް ގެންނަން، ހުށައެއް ނާޅާ އެކަމު. އެހެންވީމަ އިނގެނީ މިކަން ކުރުމުގެ އެއްވެސް އިޚްލާސްތެރި ނިޔަތެއް ނެތްކަން، ހަމައެކަނި ވޯޓު ހޯދަން ދައްކާ ވާހަކައެއް ކަން މިއީ،ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަލީ ހުސެއިން
އޭނާ ވިދާޅުވީ ޝަރުއީ ދާއިރާގައި މަސައްކަތް ކުރައްވާ ގިނަ ފަނޑިޔާރުން މަސައްކަތްކުރައްވަނީ ބިރުވެރިކަމެއްގެ ތެރޭގައި ކަމަށާއި، ޝަރުއީ ދާއިރާއަށް ސިޔާސީ ނުފޫޒު އިންތިހާއަށް އެބަ އޮތް ކަމަށެވެ.
އަދި، ޖޭއެސްސީ މިހާރު އެކުލެވިގެންވާ ގޮތަށް ބަލާއިރު، ސިޔާސީ ނުފޫޒު ފޯރުވައިގެން ސިޔާސީ މަންފާ ނެގުމުގެ މަސައްކަތް ބަރާބަރަށް ކުރިއަށްދާ ކަމަށް މެންބަރު ތުހުމަތު ކުރެއްވިއެވެ.
މިހާރު ޖޭއެސްސީ އެކުލަވާލާފައިވާ ގޮތުން އެ ކޮމިޝަނަށް ސިޔާސީ ނުފޫޒު ފޯރުވޭ ކަމަށް ބުނެ ގިނަ ބަޔަކު ޝަކުވާ ކޮށްފައިވެއެވެ. މިހާތަނަށް މި ވެރިކަމުގައި ޖޭއެސްސީ އިސްލާހުކުރުމުގެ މަސައްކަތް މަޖިލީހުގެ ތެރެއިން ކޮށްފައިނުވާއިރު، މަހިބަދޫ ދާއިރާގެ މެންބަރު އަހުމަދު ތާރިގް ދެ ފަހަރެއްގެ މަތިން ޖޭއެސްސީ އިސްލާހުކުރުމަށް މަޖިލީހަށް ހުށަހެޅި ބިލު ވެސް ވަނީ މަޖިލީހުން ބޭރުކޮށްލާފައެވެ.
ޖުޑީޝަލް ސާވިސް ކޮމިޝަން މިހާރު އެކުލެވިގެންވާ ގޮތަށް ބަލާއިރު، މިހާރު އެ ކޮމިޝަނުގައި ތިއްބަވަނީ އާންމުންގެ ތެރެއިން ކަނޑައަޅާ މެންބަރަކާއި، ރައްޔިތުންގެ މަޖިލީހުން ކަނޑައަޅާ މެންބަރަކާއި، ސިވިލް ސާވިސް ކޮމިޝަންގެ ރައީސާއި، ބަންޑާރަ ނައިބާއި، ރައީސުލްޖުމްހޫރިއްޔާ ކަނޑައަޅުއްވާ ގާނޫނީ ވަކީލުންގެ ތެރެއިން ވަކީލެއްގެ އިތުރުން، ދަށު ކޯޓުތަކުގެ ފަނޑިޔާރަކާއި، ހައި ކޯޓު ފަނޑިޔާރަކާއި، ސުޕްރީމް ކޯޓުގެ ފަނޑިޔާރެކެވެ.