ތ. ކަނޑޫދޫ މިރުހުގެ ޑިމާންޑް ދަށްވެ، މާލޭގެ ބާޒާރުގައި ހުރި މިރުސްތައް ހަލާކުވުމުން އުކާލަން ފަށައިފިއެވެ.
މިދިޔަ އަހަރުގެ ރޯދަ މަހުން ފެށިގެން ވަރަށް ފަހަކާ ޖެހެންދެން ކަނޑޫދޫ މިރުސް ކިލޯއެއްގެ އަގު ބާޒާރުގައި 80 ރުފިޔާ އާއި 90 ރުފިޔާއާ ދެމެދުގައި ހުރުމަށްފަހު، މި ރޯދަމަސް ފެށެން ގާތްވިއިރު، އެ އަގުތައް އައީ އުފުލެމުންނެވެ.
އެގޮތުން އޭރު ބާޒާރުގައި ކަނޑޫދޫ މިރުހުގެ އަގު އެންމެ މަތިން އުޅުނީ ކިލޯއެއް 150 ރުފިޔާއަށެވެ. ކަނޑޫދޫ، ކުޑަ މިރުހުގެ އަގު 100 ރުފިޔާ އާއި 120 ރުފިޔާއާ ދެމެދުގައި ހުރިއިރު، ދޮން މިރުހުގެ އަގު އުޅުނީ 80 ރުފިޔާއާއި 90 ރުފިޔާއާ ދެމެދުއެވެ.
އޭގެ ފަހުން ރޯދަމަހުގެ ފުރަތަމަ ހަފުތާގައި މިރުހުގެ އަގު 250 ރުފިޔާ އާއި 300 ރުފިޔާއާ ދެމެދުގައި ހުރުމަށްފަހު އަނެއްކާވެސް މިރުހުގެ ޑިމާންޑް ވަނީ ވަރަށް ބޮޑަށް ދަށަށް ގޮސްފައެވެ. އެހެންކަމުން މިހާރު ބާޒާރުގައި ކަނޑޫދޫ މިރުހުގެ އަގު އުޅެނީ 80 ރުފިޔާ އާއި 90އާ ދެމެދުއެވެ.
އެކަމާ ގުޅިގެން ކަނޑޫދޫ ވިޔަފާރިވެރިއެއް ކަމަށްވާ މުހައްމަދު އާރިފް މިއަދު "ސަން"އަށް ބުނީ މިދިޔަ ދެ ހަފުތާ ތެރޭގައި ވަރަށް ކައިރިކައިރީގައި ގިނަ އަދަދެއްގެ މިރުސް ބާޒާރަށް ގެނެސްފައިވާ ކަމަށެވެ.
"ޑިމާންޑް ދަށްވެ، އަނެއްކާ އެ މިރުސްތައް ގިނަވެގެން ހަލާކުވާން ފެށީމަ ގިނަ މީހުން އުކާލީ،" އޭނާ ބުންޏެވެ.
އެހެން އެކަންވި ނަމަވެސް، މިރުސް މާލޭ ބާޒަރަށް ގަނައުން ދަނޑުވެރިން ހުއްޓާނުލާނެ ކަމަށާއި އެއީ މިރުސްތައް ދޮން ވަންދެން ގަހުގައި ނުބަހައްޓާނެތީ ކަމަށް ވެސް އޭނާ ބުންޏެވެ.
ކަނޑޫދޫގެ 90 ޕަސެންޓް ރައްޔިތުންނަކީ ދަނޑުވެރިކަން ކުރާ ބަޔަކަށްވާއިރު، ކަނޑޫދޫ މިރުހަކީ އާއްމުން ބަލައިގަންނަ މިރުހެކެވެ. އަދި ބާޒާރަށް އެންމެ ގިނައިން ގެންނަނީ ވެސް ކަނޑޫދޫ މިރުހެވެ. ރޯދަމަސް ފެށުމުގެ ކުރިން ވެސް އެއް ދުވަސް މަތިން ވަނީ ހަމަ އެކަނި ކަނޑޫދޫން ޓަނެއްހާ މިރުސް ބާޒާރަށް ގެނެސްފައެވެ.