ށ. ޅައިމަގުގައި ވައްކަމާއި ފޭރުމުގެ މައްސަލަތައް އިތުރުވަމުން ދާ ކަމަށް އެރަށު ކައުންސިލުން ބުނެފިއެވެ.
'ސަން'އާ ވާހަކަދައްކަވަމުން ޅައިމަގު ކައުންސިލްގެ ރައީސް އާދަމް އަޒްމީރު ވިދާޅުވީ ފާއިތުވި ހަތަރު ދުވަހު އެކަނިވެސް، ވައްކަމުގެ ދެ މައްސަލައާއި ފޭރުމުގެ އެއް މައްސަލަ ފުލުހުންނަށް ހުށަހަޅާފައިވާ ކަމަށެވެ. އެ މައްސަލަތައް ފުލުހުން ތަހުގީގު ކުރަމުންދާ ކަމަށް ވެސް އޭނާ ވިދާޅުވިއެވެ.
އަޒްމީރު ވިދާޅުވީ ރަށުގައި ކުށްކުރުން އިތުރުވަމުންދާތީ ރައްޔިތުން ތިބީ ކަންބޮޑުވެ، ބިރުވެރިކަމެއްގެ ތެރޭގައި ކަމަށެވެ. އެގޮތުން އެންމެ ބޮޑު ކަންބޮޑުވުމަކީ އެފަދަ މައްސަލަތައް އިތުރުވަމުންދާއިރު، ރަށުގައި ޕޮލިސް ޕޯސްޓެއް ނެތުން ކަމަށް އޭނާ ވިދާޅުވިއެވެ.
"ރަށުގައި ޕޮލިސް ޕޯސްޓެއް ނެތުމުން ވަރަށް ދަތި. ފުލުހުން އެބަހުރި އިމާރާތެއް ކުއްޔަށް ނަގާފަވެސް. އެތަނުގައި ބޭނުންވާ ހުރިހާ އިކުއިޕްމަންޓެއް ވެސް އެބަހުރި. ރަށުގެ ހާލަތު ގޯސްވަމުންދާއިރު މި ރަށުގައި ޕޮލިސް ޕޯސްޓެއް ކޮންމެހެން ވެސް ހުންނަން ޖެހޭ ކަމަށް އަޅުގަނޑު ގަބޫލުކުރަނީ،" އަޒްމީރު ވިދާޅުވިއެވެ.
އޭނާ ވިދާޅުވީ ޅައިމަގުގައި ވައްކަމާއި ފޭރުމުގެ މައްސަލަތައް އިތުރުވެ، ރައްޔިތުން ކަންބޮޑުވުމުމެއްގައި ތިބިއިރު، އެ ރަށުގައި ކޮންމެހެން ވެސް ފުލުހުން ގާއިމްވެ ތިބުމަކީ މުހިއްމު ކަމެއް ކަމަށެވެ. އަދި ކުއްޔަށް ހިފާފައިވާ އިމާރާތުގައި ހުރިހާ ވަސީލަތެއް ގާއިމް ކޮށްފައިވާއިރު އެކޮމޮޑޭޝަންގެ ކަންކަން ވެސް ހަމަޖެހިފައިވާ ކަމަށް އަޒްމީރު ވިދާޅުވިއެވެ.
ވުމާއެކު އެ ރަށުގައި ފުލުހުންނަށް ގާއިމްވެ ނުތިބެވެންވީ ސަބަބެއް ނެތް ކަމަށް ވެސް އޭނާ ވިދާޅުވިއެވެ.
ޅައިމަގުގެ އާބާދީ 840އަށް އަރާއިރު، މަސްތުވާތަކެތީގެ މައްސަލައަކީ ވެސް އެ ރަށުގައި ބޮޑު މައްސަލައެކެވެ.