މި އަހަރުގެ ދިވެހިބަހުގެ ދުވަސް ފާހަގަކުރުމަށް ދިވެހިބަހުގެ އެކެޑަމީން ހުރިހާ މީޑިއާތަކަށް ގޮވާލައިފިއެވެ.
މި އަހަރުގެ ދިވެހިބަހުގެ ދުވަސް ފާހަގަކުރުމަށް ގޮވާލައި، ދިވެހިބަހުގެ އެކެޑަމީން މީޑިއާތަކަށް ފޮނުވި ސިޓީއެއްގައި ވަނީ ދިވެހިބަހަކީ ގައުމިއްޔަތުގެ އެންމެ މުހިއްމު އެއް އަސާސުކަމަށާއި ދިވެހިބަހަށް އިސްކަންދީ އަންނަން އޮތް ޖީލުތަކަށް ދިވެހިބަސް ހެޔޮގޮތުގައި ފޯރުކޮށްދިނުމަކީ ދިވެހިންގެ އަމިއްލަވަންތަކަމުގެ މައި ރުކުން ކަމަށެވެ.
މީޑިއާތަކަކީ ދިވެހިބަސް ހެޔޮގޮތުގައި އާއްމުންނާ ހަމައަށް ފޯރުކޮށްދިނުމުގައި މުހިއްމު އަދި އިސް ދައުރެއް އަދާކުރަމުންގެންދާ ބައެއްކަމުގައި އެކެޑަމީން ދެކޭ ކަމަށް އެ ސިޓީގައިވެއެވެ.
މި އަަހަރުގެ ދިވެހިބަހުގެ ދުވަހުގެ ޝިއާރަކީ "ދިވެހިބަހަށް ލޯތްބާއި އިސްކަން ދެމާ"ކަން ފާހަގަކޮށް އެކެޑަމީން ވަނީ މި އަހަރުގެ ދިވެހިބަހުގެ ދުވަހު މީޑިއާތަކުން އުފައްދާ ޕްރޮގްރާމްތަކުގައި ދުވަހާ ގުޅޭ މައުލޫމާތު ގެނެސްދިނުމަށް އެދިފައެވެ.
އެގޮތުން މީޑިއާތަކުން އެދިއްޖެ ނަމަ، ދުވަހާ ގުޅޭގޮތުން މައުލޫމާތުތައް ގެނެސްދިނުމަށްޓަކައި ތަފާތު ބޭފުޅުން މެހެމާނުންގެ ގޮތުގައި ސްޓޭޝަންތަކަށް ވަޑައިގެން މައުލޫމާތު ހިއްސާކުރުމަށް އެކެޑަމީން އަބަދުވެސް އެހީތެރިކަން ފޯރުކޮށްދޭނެ ކަމަށް އެ އިދާރާއިން ބުންޏެވެ.
ދިވެހިބަހުގެ އެކެޑަމީގެ ރައީސް ޑރ. އަޝްރަފް ޢަބްދުއްރަޙީމް މިއަދު "ސަން"އަށް ވަނީ މިއަހަރުގެ ޝިއާރު ކަނޑައެޅުއްވީ ކިހިނެއް ވިސްނަވާފަކަން ތިލަކޮށްދެއްވާފައެވެ.
"ގައުމީ ބަހަށް ސަމާލުކަން ދިނުމުގެ ގާނޫނެއް އޮތްކަމުގަ ވީނަމަވެސް ސަމާލުކަން ނުދެވޭ މަންޒަރު ފެނިގެން މިދަނީ. އަބަދުވެސް ދިވެހިބަހަށްވުރެ ބޮޑަށް އެހެން ބަސްބަހަށް އިސްކަންދޭތަން ފެނިގެންދަނީ. އެކަން ބަދަލުކޮށް، ދިވެހިބަހަށް އިޙްތިރާމްކޮށް، ލޯތްބާއެކު އިސްކަން ދިނުމަށް ގޮވާލާފަ އެވަނީ. އެއީ ދިވެހި ބަހަކީ އަބަދުވެސް އެންމެ ބޮޑު ސަމާލުކަމެއް ދީގެން އިޙްތިރާމްކުރަން ޖެހޭ ބަހަކަށްވާތީ. އެކަން ފެންނަން ވާނީ އަމަލުން،" އޭނާ ވިދާޅުވިއެވެ.
ޑރ. އަޝްރަފް ވިދާޅުވި ގޮތުގައި، ދިވެހިބަހުގެ ދުވަހާ ގުޅިގެން އެ ދުވަސް ފާހަގަކުރުމަށް މީޑިއާތަކަށް ގޮވައިލީ، ދިވެހިބަހަށް ސަމާލުކަންދީ، އިސްކަންދިނުމަކީ އެންމެންގެ ޒިންމާއަކަށްވާތީއެވެ. އެގޮތުން ޓީވީ، ރޭޑިއޯ އަދި އޮންލައިން ނޫސްތަކަކީ ގިނަ ބަޔަކަށް އެއްވަގުތަކު ގިނަ މައުލޫމާތުތަކެއް ފޯރުކޮށްދެވޭ ވަސީލަތްތައް ކަމަށާއި އޭގެ ފައިދާ އެހެން މީހުންނަށް ކުރާނެ ކަމަށް އޭނާ ވިދާޅުވިއެވެ.
މީގެ އިތުރުން، މިފަދަ ކަންކަންކޮށް، ދިވެހިބަހަށް ލޯބި އުފައްދައި، ބަހަށް އިސްކަން ދިނުމަކީ ކޮންމެ މީހެއްގެ ވެސް ޒިންމާއެއް ކަން ޑރ. އަޝްރަފް ފާހަގަކުރެއްވިއެވެ. އެހެންކަމުން މިހާރަށްވުރެ ބޮޑަށް ދިވެހިބަހަށް އިޙްތިރާމުކޮށް، ބަހަށް އިސްކަން ދިނުމަށް އޭނާ ގޮވައިލެއްވިއެވެ.
ކޮންމެ އަހަރެއްގެ އޭޕްރިލް މަހުގެ 14 ވަނަ ދުވަހަކީ ދިވެހިބަހުގެ ދުވަހުގެ ގޮތުގައި ސަރުކާރުން ވަނީ ކަނޑައަޅައިފައެވެ.