އަންނަ އާދީއްތަ ދުވަހު ފަށާ ރާއްޖޭގެ ފުޓުބޯޅަ ސީޒަނުގެ ފުރަތަމަ މުބާރާތް، ޕްރެޒިޑެންޓްސް ކަޕުގައި ވާދަކުރާނީ ހަ ޓީމު ކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.
ޕްރެޒިޑެންޓްސް ކަޕުގައި ވާދަކުރުމުގެ ފުރުސަތު ފުރަތަމަ ޑިވިޝަނުގެ އަށް ޓީމަށް އޮވެއެވެ. އެކަމަކު މާލީ ހާލަތުގެ ސަބަބުން ކުލަބް ގްރީން ސްޓްރީޓްސް އާއި ޔުނައިޓެޑް ވިކްޓަރީ (ޔޫވީ) އިން ވަނީ މި މުބާރާތުގައި ބައިވެރިނުވާން ނިންމާފައެވެ.
ޕްރެޒިޑެންޓްސް ކަޕުގައި ހަ ޓީމުން ވާދަކުރާއިރު، ފުރަތަމަ ޑިވިޝަނަށް އަލަށް ޕްރޮމޯޓުވި ބުރު ސްޕޯޓްސް ކުލަބުން މި މުބާރާތުގައި ފުރަތަމަ ފަހަރަށް ފެންނާނެއެވެ. ބުރުން އަންނަނީ މި މުބާރާތައް އެ ޓީމުގެ ފަރިތަކުރުންތައް ވެސް ކުރިއަށް ގެންދަމުންނެވެ.
ދެ ގްރޫޕަކަށް ބަހާލައިގެން ޕްރެޒިޑެންޓްސް ކަޕު ކުރިއަށްދާއިރު، ގްރޫޕް އެކެއްގައި ހިމެނެނީ ޗެމްޕިއަން ކުލަބް ވެލެންސިއާ އާއި، ކުލަބް އީގަލްސްގެ އިތުރުން ސުޕަ ޔުނައިޓެޑް ސްޕޯތްސް (ސަސް)އެވެ. އަދި ގްރޫޕް ދޭއްގައި ހިމެނޭ ޓީމުތަކަކީ، މާޒިޔާ ސްޕޯޓްސް އެންޑް ރެކްރިއޭޝަން އާއި، ޓީސީ ސްޕޯޓްސް ކުލަބްގެ އިތުރުން ބުރުވެ.
އަންނަ އާދީއްތަ ދުވަހު ޕްރެޒިޑެންޓްސް ކަޕުގެ ފުރަތަމަ މެޗުގައި ބައްދަލުކުރާނީ އެންމެ ފަހުގެ ޗެމްޕިއަން ކުލަބް ވެލެންސިއާ އާއި އީގަލްސްއެވެ. އެ މެޗު ކުޅުމަށް ހަމަޖެހިފައިވަނީ އާދީއްތަ ދުވަހުގެރޭ 22:00 ގައެވެ.