ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އާ ސީޒަނާ ދިމާކޮށް ސުޕަ ޔުނައިޓެޑް ސްޕޯޓްސް (ސަސް) އާ ގުޅިއްޖެއެވެ.
ދަގަނޑޭ އަކީ ސަސްގެ ހިއްސާ ބޮޑު އެއް ފަރާތެވެ. އަންނަ އަންގާރަ ދުވަހު ޕްރެޒިޑެންޓްސް ކަޕް ފަށާއިރު، ސަސްއިން ވަނީ އެ މުބާރާތައް ކޯޗު އިސްމާއިލް މަޙްފޫޒް (އިންމަ) އާއެކު ފަރިތަކުރުންތައް ފަށައިފައެވެ. މި ފަރިތަކުރުންތަކުގައި ހުކުރު ދުވަހުގެރެއިން ފެށިގެން ދަގަނޑޭ އަންނަނީ ބައިވެރިވަމުންނެވެ.
ދަގަނޑޭ ސަސްގެ ފަރިތަކުރުންތަކުގައި ބައިވެރިވެފައި މިވަނީ، ރާއްޖޭގެ އެންމެ ސަޕޯޓަރުން ގިނަ ކުލަބް ނިއު ރޭޑިއަންޓަށް ބަދަލުވާން އުޅޭ ކަމުގެ އަޑުތައް ފެތުރިފައިވަނިކޮށެވެ.
މިދިޔަ ސީޒަންގެ ޗެރިޓީ ޝީލްޑް މެޗުން ދަގަނޑޭ ފެނުނުއިރު، އަނިޔާގެ ސަބަބުން މިދިޔަ ސީޒަން އެއްކޮށް ދަގަނޑޭ ކުޅެފައެއް ނުވެއެވެ. އެކަމަކު ގައުމީ ޓީމާއެކު މެލޭޝިއާ އަދި ސިންގަޕޫރުގެ އިތުރުން ޕާކިސްތާނާ ދެކޮޅަށް ކުޅުނު އެކުވެރިކަމުގެ މެޗުތަކުން ދަގަނޑޭއަށް ވަނީ ފުރުސަތު ދީފައެވެ.
އެންމެ ފަހުން ފުރަތަމަ ޑިވިޝަނުގެ ކުލަބަކަށް ދަގަނޑޭ ކުޅުނީ ކުލަބް ވެލެންސިއާއަށެވެ.
ސަސްގެ ފަރިތަކުރުންތަކުގައި ދަގަނޑޭ ބައިވެރިވާއިރު، އޭނާގެ އިތުރުން ސަސްއިން މިދިޔަ ސީޒަނުގައި ފެނުނު ގިނަ ކުޅުންތެރިން އަންނަނީ ފަރިތަކުރުންތަކުގައި ބައިވެރިވަމުންނެވެ.