މިއަހަރު ބާއްވާ, އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ބައިއިލެކްޝަންތައް އަންނަ ޖޫން މަހު ބޭއްވުމަށް ނިންމާފައިވާ ކަމަށް އިލެކްޝަންސް ކޮމިޝަން (އީސީ)އިން ބުނެފިއެވެ.
އިލެކްޝަންސް ކޮމިޝަނުން މިރޭ ބުނީ މިއަހަރު ބާއްވާ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ބައި އިލެކްޝަންތައް ބާއްވާނީ އަންނަ ޖޫން މަހުގެ 17 ވާ ހޮނިހިރު ދުވަހު ކަމަށެވެ.
އެ ދުވަހު ޖުމުލަ 10 ރަށެއްގައި ބައި އިލެކްޝަންތައް ބާއްވާނެއެވެ. އެއީ ރ.މީދޫ، ތ.ގާދިއްފުށީ، ގދ.ހޯޑެއްދޫ، ކ.މާމެންދޫ، ގދ.ވާދޫ، ކ.ދިއްފުށި، ފ.ބިލެއްދޫ، މ.ވޭވަށު، ށ. މާއުނގޫދޫ އަދި ހދ.ފިނޭއެވެ.
ކުރިން އޮންނަ ގޮތުން އަންހެނުންގެ ކޮމެޓީތަކުގެ މެމްބަރުން އިސްތިއުފާ ދީފި ހާލަތެއްގައި 60 ދުވަހުގެ ތެރޭގައި އިންތިޚާބު ބާއްވަންޖެހެއެވެ.
ނަމަވެސް ގާތްގާތުގައި އެ އިންތިޚާބުތައް ބާއްވަންޖެހުމުން އެކަމަށް ހިނގާ ޚަރަދު ބޮޑުވާތީ، ގާނޫނަށް ގެނައި އިސްލާހާއެކު އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިޚާބު އަހަރަކު އެއް ފަހަރު ބާއްވާ ގޮތަށް ވަނީ ނިންމާފައެވެ.