ރާއްޖެއަށް ސިއްރުން ދެ ކިލޯއަށްވުރެ ގިނަ އަދަދެއްގެ ރަން އެތެރެކުރި މީހަކު ބޮޑު އަދަދަކުން ޖޫރިމަނާކޮށް އޭނާ ގެނައި ރަން ދައުލަތަށް ނެގުމަށް ކްރިމިނަލް ކޯޓުން ހުކުމް ކޮށްފިއެވެ.
އެކަން ހިނގާފައިވަނީ މިދިޔަ އަހަރުގެ ޖޫން މަހުގެ 11 ވަނަ ދުވަހުއެވެ. އެ މައްސަލައާ ގުޅިގެން ރާއްޖެއަށް ސިއްރުން މުދާ އެތެރެކުރުމުގެ ދައުވާ އުފުލާފައިވަނީ, އިންޑިއާގެ ރައްޔިތެއްގެ މައްޗަށެވެ.
ދައުވާއިން އެނގޭ ގޮތުން ކަސްޓަމްސްގެ އޮފިސަރުން އޭނާ ބަލާ ފާސްކޮށްފައިވަނީ އޭނާގެ އަމަލުތައް ހުރި ގޮތުން ޝައްކު އުފެދޭ ކަންތައްތަކެއް ފެނުމުންނެވެ. އެގޮތުން އެތަކެތި ރައްކާ ކޮށްފައިހުރީ ދެފައިގެ ކަށިމަތީގައި މާސްކިން ޓޭޕް އަޅައިގެންނެވެ. އޭނާގެ ދެފައިގެ ކަށިމަތިން ނެގި ދެ ރަން ޕެކްޓްގައި 2755.5 ގްރާމް ހުރި ކަމަށް ވެސް ދައުވާގައި ބުނެފައިވެއެވެ.
އޭނާގެ މައްޗަށް އުފުލި ދައުވާއަށް ޖަވާބުދާރީވަމުން ބުނެފައިވަނީ, އިންޓަނެޓްއިން މައުލޫމާތު އެއްކުރިއިރު ރަނަކީ ސުން ޕަސެންޓްގައި ޑިއުޓީ ނަގާއެއްޗެއް ކަމަށް މައުލޫމާތު ލިބިފައިވާ ކަމަށެވެ. އެހެންކަމުން އެއީ ކުށެއް ކަމަށް ގަބޫލުނުކުރާ ކަމަށް ވެސް އޭނާ ބުނެފައިވެއެވެ. އަދި އެއްވެސް ނިޔަތެއްގައި ސިއްރުން ގެނައި އެއްޗެއް ނޫން ކަމަށް ވެސް އޭނާ ބުންޏެވެ.
ދައުވާއަށް އިންކާރުކުރިކަމަށް ބަލައި މައްސަލަ ކުރިއަށް ދަނިކޮށް ހުލާސާ ބަޔާން ހުށަހަޅާ ހިސާބުން އޭނާ ވަނީ ދައުވާއަށް އިއުތިރާފްވެ، ޕްރޮސިކިއުޓާ ޖެނަރަލް (ޕީޖީ) އޮފީހާއެކު ވަނީ އިއުތިރާފް އެެއްބަސްވުމެއް ގާއިމްކޮށްފައެވެ.
އޭގައިވާ ގޮތުން އަދަބެއްގެ ގޮތުގައި 120,000 ރުފިޔާއިން ޖޫރިމަނާކޮށް އެ ފައިސާ ހަތަރު ދުވަސް ތެރޭގައި ދައުލަތަށް ދައްކަން ޖެހެއެވެ. އަދި އެތެރެކުރި ރަން ދައުލަތަށް ނަގާނެއެވެ.
ކްރިމިނަލް ކޯޓުން އެ މައްސަލަ ބެއްލެވި ގާޒީ ހުސައިން ފާއިޒް ރަޝާދު ހުކުމް ކޮށްފައިވަނީ ވެސް އިއުތިރާފް އެއްބަސްވުމާ އެއްގޮތަށެވެ. އަދި ޖޫރިމަނާ ފައިސާ އަންގާރަ ދުވަހުގެ ކުރިން މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް ދައްކަން ޖެހެއެވެ.