ދިވެހިންގެ ގައުމިއްޔަތު ބިނާވެފައި ވަނީ ދިވެހިންގެ ފަހުރުވެރި ފަސްގަނޑަށް ލޭ އޮހޮރުވާލެއްވި މަތިވެރި މުޖާހިދުންނާއި ޝަހީދުންގެ ގުރުބާނީގެ މައްޗަށް ކަމަށް ނިޝާން އިއްޒުއްދީންގެ އިއްޒަތުގެ ވެރިޔާ އަބްދުﷲ ޝާހިދު ވިދާޅުވެއްޖެއެވެ.
ޝަހީދުންގެ ދުވަސް ފާހަގަކުރުމުގެ ގޮތުން ބ. ތުޅާދޫ ސްކޫލުގައި މިރޭ ބޭއްވި ޝަރަފްވެރި ކޮއްދެއްވަމުން ދެއްކެވި ވާހަފުޅުގައި ޝާހިދު ވިދާޅުވީ، ދިވެހިންގެ ގައުމިއްޔަތާއި އަޒުމަކީ އެކަމަށް ބަދަލެއް ނާންނާނެ ކަމެއްކަމަށެވެ.
"ތިޔައިގެ ތެރެއިން އެއްވެސް ބޭފުޅަކު އަޅުގަނޑުމެންގެ މި ދިވެހި ރާއްޖެއަށް އަދަށްވުރެ ފެހި މާދަމާއެއް ގެނައުމަށް ކުރާ އުންމީދަށް ބަދަލެއް ނާދެ،" ޝާހިދު ވިދާޅުވިއެވެ.
އެހެންކަމުން ދިވެހިންނަށް ކުރިމަތިވި ކޮންމެ ބިރުވެރިކަމަކާ ގޮންޖެހުމަކާ ވެސް ކުރިމަތިލަނީ ކެރިގެންކަމަށް އޭނާ ވިދާޅުވިއެވެ. އަދި ޝަހީދުންގެ ދުވަސް ފާހަގަކުރާ އިރު، ދިވެހިންގެ ރައްކާތެރިކަމަށްޓަކާ ދިވެހި ސިފައިން ކުރައްވާ ބުރަ މަސައްކަތް ފާހަގަކުރަން ޖެހޭކަމަށް އޭނާ ވިދާޅުވިއެވެ.
"ދިފާއީ ބާރުގައި އެ ތިއްބަވާ ކަނބަލުންނާއި ބޭފުޅުންނަކީ މޭ އައްޑަނައަކަށް ހައްދަވައިގެން ރައްޔިތުންނާއި ދީނުގެ ހައްގުގައި ނުކުންނަން ތައްރާރަށް ތިބި ބޭކަލުންނާއި ބޭކަނބަލުން،" އޭނާ ވިދާޅުވިއެވެ.
މީގެ އިތުރުން ޝާހިދު ވަނީ ޝަހީދުންގެ ޒިކުރާ އާކުރުމަކީ ވަރަށް މުހިންމު ކަމުގެ ފާހަގަކުރައްވާ، ކުރިއަށް އޮތް ޖީލުތަކަށް އެބޭފުޅުންގެ ވާހަކަތައް ކިޔައިދީ ގެންގޮސްދިނުމަކީ ވެސް މުހިންމު ކަމެއްކަމަށް އޭނާ ވިދާޅުވިއެވެ.
އަލިރަސްގެފާނުގެ ޖިހާދާ ގުޅޭގޮތުން މިރޭގެ ޖަލްސާގައި ތުޅާދޫ ސްކޫލުގެ ދަރިވަރުން ވަނީ ޑްރާމާއެއް ހުށަހަޅައިދީފައެވެ. އަދި ޝަހީދު ކޯޕްރަލް ހުސައިން މުހަންމަދުގެ ޖިހާދާ ގުޅޭގޮތުން ވެސް ވަނީ ޕްރެޒެންޓޭޝަނެއް ހުށަހަޅައިދީފައެވެ.