އަމިއްލަ ތިން ދަރިންގެ މަންމަ، ނިޝާމާ މުޙައްމަދު، މަރާލި ކަމުގެ ތުހުމަތުގައި ހައްޔަރުކޮށްފައި ހުރި، އދ. ފެންފުށި ރޯޒީވިލާ، އަބޫބަކުރު ފައިސަލް ފުލުހުންގެ ގޮޅީގައި ދަން ޖެހުނު މައްސަލައިގެ ފޮރެންސިކް ތަހުލީލުތައް އަދިވެސް ނުނިމޭކަމަށް ނެޝަނަލް އިންޓަގްރިޓީ ކޮމިޝަން (އެންއައިސީ)ން ބުނެފިއެވެ.
އެކަމާ ގުޅިގެން އެ މައްސަލަ ތަހުގީގުކުރާ އެންއައިސީންގެ އޮފިޝަލަކު "ސަން"އަށް ވިދާޅުވީ އެ މައްސަލައިގެ ތަހުގީގުގައި އަދިވެސް ކުރިއަށްގެންދަނީ ބަޔާންނެގުމުގެ މަސައްކަތް ކަމަށެވެ. އަދި ތަހުގީގަށް ބޭނުންވާނެކަމަށް ބެލެވޭ ފޮރެންސިކް ތަހުލީލުތައް ވެސް ކުރަމުންދާކަމަށް އެންއައިސީން ބުންޏެވެ.
"ފޮރެންސިކް ތަހުލީލުތައް އަދިވެސް ނުނިމޭ،" އޭނާ ވިދާޅުވި އެވެ.
މި ތަހުގީގާ ގުޅޭ އިތުރު އެއްވެސް މައުލޫމާތެއް އެ ކޮމިޝަނުން ހާމަކޮށްފައެއް ނުވެއެވެ.
ނޮޅިވަރަމްގައި ނިޝާމާ ދިރިއުޅެމުން ދިޔަ ގޭތެރޭގައި އޭނާ މަރުވެފައި އޮއްވާ ފެނިފައިވަނީ މިދިޔަ ޑިސެމްބަރު މަހުގެ 10 ވަނަ ދުވަހުއެވެ. ނިޝާމާގެ ހަށިގަނޑު ފެނިގެން އެރަށު ސިއްހީ މަރުކަޒަށް ގެންދިޔައިރު ވެސް އޭނާ އޮތީ މަރުވެފައެވެ.
ފައިސަލް މަރުވީ ކުޅުދުއްފުށީ ޕޮލިސް ސްޓޭޝަންގެ ކޮޅީގައި ހުއްޓައި އަމިއްލައަށް ދަންޖެހުމުން ހޮސްޕިޓަލަށް ގެންގޮސް ފަރުވާދެމުން ދަނިކޮށެވެ.
ފައިސަލް މަރުވި ނަމަވެސް މައްސަލައިގެ ތަހުގީގު ކުރިއަށް ދާނެ ކަމުގެ ޔަގީންކަން ފުލުހުން ވަނީ ދީފައެވެ.
ފައިސަލްގެ އަންހެނުން ނިޝާމާގެ ހަށިގަނޑު ޕޯސްޓްމޯޓަމް ހަދަން ފޮނުވާފައި ވަނީ މިދިޔަ ޑިސެމްބަރު މަހުގެ 21 ވަނަ ދުވަހުއެވެ. ނިޝާމާގެ ޕޯސްޓްމޯޓަމް ރިޕޯޓުގެ ނަތީޖާ ދައްކާގޮތުން އޭނާ މަރާލާފައިވަނީ ނޭވާ ހާސްކޮށްލައިގެންނެވެ.