ރައީސް އިބްރާހީމް މުހައްމަދު ޞާލިހުގެ ދިފާއީ ސިޔާސަތަކީ ވިސްނުންތެރިކަމާއެކު ގައުމުތަކާ ގުޅުން ބަދަހިކުރުންކަމަށް ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވެއްޖެއެވެ.
އެމްޑީޕީގެ ރިޔާސީ ޓިކެޓު ހަވާލުކުރުމަށް ކާނިވާގައި ބޭއްވި ޖަލްސާގައި ވާހަކަދައްކަވަމުން މާރިޔާވަނީ ކުރީގެ ސަރުކާރުގައި އަސްކަރީ ސިޔާސަތުތައް ބައްޓަން ކުރި ގޮތަށް ވަރަށް ބޮޑަށް ފާޑު ވިދާޅުވެފައެވެ.
އެގޮތުން އެއިރު ސިފައިން ތަމްރީނުކުރީ އެއްވެސް ހިތްވަރެއް ނެތް ބައެއްގެ ގޮތުގައިކަމަށާއި އެހެން ނަމަވެސް މިހާރު ސިފައިން ތަމްރީނުކުރާނީ ކެރޭ ހިތްވަރު ބައެއްގެ ގޮތުގައިކަމަށެވެ.
މީގެ އިތުރުން މާރިޔާ ވަނީ ކުރިން އަސްކަރިއްޔާގައި އުޅުނު މީހަކަށް ވެ ހުރެ، ޕީޕީއެމްގެ އެކްޓިވިސްޓް އަބްދުއް ސަމަދު އިންޑިއާ އިމިގްރޭޝަންގައި ހިފެހެއްޓުމުން އޭނާގެ ފަރާތުން ފެނުނު ކަންކަމަށް ފާޑު ވިދާޅުވެފައެވެ. އަދި މި ސަރުކާރުގެ ދިފާއީ ސިޔާސަތުގައި އެއްވެސް ގައުމެއް ދުރުކުރުން ނޯންނާނެކަމަށް ވެސް ވިދާޅުވިއެވެ.
"މާތް ﷲ އިރާދަކުރެއްވިއްޔާ އަޅުގަނޑުމެންގެ ސިފައިންނާ ފުލުހުންގެ އެ ހިތްވަރު ހުންނާނެ. އިމިގްރޭޝަން ފިނިކޮޓަރީގައި ތިބެފައި އައިސް ރޮޔެއް ނުގަންނާނެ. ހެދެނީ ނެހެދެނީ ކިހިނެއް ކަމެއް ނޭނގިގެން އުޅޭނެ ބައެއް ނޫން އަޅުގަނޑުމެން މި ތައްޔާރުކުރަމުން ދަނީ. ރައީސްގެ ދިފާއީ ސިޔާސަތަކީ ވިސްނުންތެރިކަމާއި ހިކުމަތްތެރިކަމާއެކީގައި ކަންކަން ކުރައްވައި، ރަހުމަތްތެރިކަމާއެކީގައި ހުރިހާ ގައުމަކާ އެކީގައި ވެސް އުޅުއްވައި...،" މާރިޔާ ވިދާޅުވިއެވެ.
ޖަލްސާގެ ތެރެއިން ވާހަކަދެއްކި ގިނަ ބޭފުޅުންވަނީ ކުރީގެ ވެރިކަމުގައި ކަން ހިނގައިދިޔަ ގޮތާމެދު ވަރަށް ބޮޑަށް ފާޑުވިދާޅުވެ ވާހަކަދައްކަަވައިފައެވެ.
އެއާއެކު މާރިޔާވަނީ ރައީސް ޞާލިހު ވެރިކަމުގެ އިތުރު ދައުރަކަށް ހޮވައި މިހާރު ގައުމު ކުރިއަށް ދާ ހެޔޮ ވެރިކަމުގައި ކުރިއަށް ދިއުމުގެ ފުރުސަތު ރައްޔިތުން ދޭންޖެހޭ ކަމަށް ވިދާޅުވެފައެވެ.