މޯލްޑިވްސް ޕޯސްޓް ލިމިޓެޑްގެ ޚާއްސަ އީ ކޮމާސް ޕްލެޓްފޯމް، އީ-ޓުކުރިން މާލެ އާއި ހުޅުމާލެގައި ދިރިއުޅޭ ކުޑަކުދިންނަށް ޚާއްސަ ކުރެހުމުގެ މުބާރާތެއް ބާއްވަން ނިންމައިފިއެވެ.
އެ ކުރެހުމުގެ މުބާރާތް އޮންނާނީ މިމަހުގެ 24 ވަނަ ދުވަހުގެ ހަވީރު ހަތަރަކުން ހަޔަކަށް ހުޅުމާލެ ރުއްގަނޑު ސަރަހައްދު-1ގައެވެ.
މި މުބާރާތުގައި ބައިވެރިވުމަށް ފީއެއް ދައްކާކަށް ނުޖެހޭނެއެވެ. މި މަހުގެ 24 ވަނަ ދުވަހުގެ ހަވީރު، ހުޅުމާލެ ރުއްގަނޑު-1އަށް ގޮސް، މުބާރާތުގައި ބައިވެރިވުމުން އެ ކުއްޖެއްގެ ކުރެހުން މުބާރާތުގައި ހިމެނޭނެއެވެ.
މި މުބާރާތުން އެއްވަނަ، ދެވަނަ އަދި ތިންވަނައަށް ވެސް 500 ރުފިޔާ ދިނުމަށް ވަނީ ހަމަޖެހިފައެވެ. އިނާމު ހާސިލް ކުރާ ކުދިންގެ ނަންތައް އީ-ޓުކުރިން އެ ބްރޭންޑުގެ ސޯޝަލް މީޑިޔާ ޕްލެޓްފޯމުތައް މެދުވެރިކޮށް، މި އަންނަ މަހުގެ އެއްވަނަ ދުވަހު އިއުލާން ކުރާނެއެވެ.
View this post on Instagram
މި މުބާރާތުގެ މައިގަނޑު މަގުސަދަކީ އެކުވެރި މާހައުލެއްގައި ކުޑަކުދިންނަށް، އެކުދިންގެ ހުނަރު ދައްކާލުމުގެ ފުރުސަތު ހޯދައިދިނުން ކަމަށް އީ-ޓުކުރިން ބުނެއެވެ.
އީ-ޓުކުރިއަކީ ޒަމާނީ ޓެކްނިލޮޖީގެ އެހީގައި ރާއްޖޭގެ އެކި ކަންކޮޅުތަކުގައި ދިރިއުޅޭ ފަރާތްތަކަށް އޮންލައިންކޮށް ވިޔަފާރިކުރުމާއި، ތަފާތު ބާވަތްތަކުގެ މުދާ ގަނެ ވިއްކުމަށް އުފައްދާފައިވާ އީ-ކޮމާސް ޕްލެޓްފޯމްއެކެވެ.
މޯލްޑިވްސް ޕޯސްޓުގެ އީ-ޓުކުރި ޕްލެޓްފޯމްގެ އަމާޒަކީ ރާއްޖޭގެ އެކި ރަށްތަކާއި އެކި ހިސާބުތަކުގައި ދިރިއުޅޭ ފަރާތްތައް ގުޅުވާލާ ވިޔަފާރި ކުރުމުގައި ދިމާވާ ދަތިތަކަށް ހައްލު ހޯދައިދިނުމެވެ.