ރެއާލް މެޑްރިޑުން ފަސް ވަނަ ފަހަރަށް ކްލަބް ވަލްޑްކަޕް އުފުލާލައި، އެ މުބާރާތް ކާމިޔާބުކުރުމުގައި ރެއާލުން ދަމަހައްޓަމުން އަންނަ ރެކޯޑް އާކޮށްފިއެވެ.
މޮރޮކޯގެ ރަބަތުގައި ކުޅުނު މިމެޗްގައި، ސައުދީގެ އަލް ހިލާލުގެ މައްޗަށް ރެއާލް ކުރިހޯދީ ފަހެއް ތިނެއްގެ ނަތީޖާއަކުންނެވެ. މެޗުގައި ރެއާލް މެޑްރިޑުން ވަނީ 13 ވަނަ މިނެޓް ތެރޭގައި ލީޑް ނަގާފައެވެ. މި ލަނޑު ރެއާލްއަށް ކާމިޔާބުކޮށްދިނީ ކަރިމް ބެންޒީމާ ތަނަވަސްކޮށްދިން ފުރުސަތެއްގައި ވިނީޝިއުސް ޖޫނިއާ އެވެ.
ވިނީޝިއުސް ލަނޑެއް ޖަހައި ރެއާލަށް ލީޑު ނަގައިދީފައިވަނިކޮށް އޭގެ ހަތަރު މިނެޓް ފަހުން ރެއާލްގެ ފެޑެރިކޯ ވަލްވެދޭ ވަނީ ލަނޑެއް ޖަހައި ރެއާލްގެ ލީޑް ދޭއް ސުމަކަށް ފުޅާކޮށްދީފައެވެ. ރެއާލްއިން ދެ ލަނޑުގެ ލީޑެއް ނެގި ނަމަވެސް ހިލާލުގެ މޫސާ މަރޭގާ ވަނީ 26 ވަނަ މިނެޓް ތެރޭގައި ލަނޑެއް ޖަހައި ރެއާލް ހާސްކޮށްލާފައެވެ. ފުރަތަމަ ހާފް ނިމުނީ ދޭއް އެކެއްގެ ނަތީޖާގައި އޮވެގެންނެވެ.
މެޗުގައި ފެނުނު ރެއާލްގެ ތިންވަނަ ލަނޑު އެޓީމުން ޖަހާފައިވަނީ 54 ވަނަ މިނެޓް ތެރޭގައެވެ. ބެންޒީމާ މި ލަނޑު ޖަހާފައިވަނީ ވިނީޝިއުސް ޖޫނިއާ ތަނަވަސްކޮށްދިން ފުރުސަތެއްގައެވެ. އޭގެ ތިން މިނެޓް ފަހުން ޑިނީ ކަވާހާލް ތަނަވަސްކޮށްދިން ފުރުސަތެއްގައި ރެއާލްގެ ހަތަރުވަނަ ލަނޑު ވަލްވޭޑޭ ކާމިޔާބުކޮށްދިން އިރު، އޭގެ ހަތަރު މިނެޓް ފަހުން ހިލާލްގެ ވިއޭޓޯ ވަނީ ލަނޑެއް ޖަހައި ކޮންމެ ފަދަ ވަގުތެއްގައިވެސް އެޓީމުން ލަނޑެއް ޖަހާނެކަން ސާބިތުކޮށްދީފައެވެ.
ފީފާ ކްލަބް ވަރލްޑް ކަޕުގައި ރެއާލް އާއި އަލް ހިލާލް ބައްދަލުކުރި މެޗުގެ ތެރެއިން-- ފޮޓޯ/ރޮއިޓާސް
މެޗުގައި ރެއާލުން ޖެހި ފަސްވަނަ ލަނޑު އެޓީމަށް ކާމިޔާބުކޮށްދިނީ، 69 ވަނަ މިނެޓް ތެރޭގައި ޑެނީ ކަބާލޯ ތަނަވަސްކޮށްދިން ފުރުސަތެއްގައި ވިނީޝިއުސްއެވެ. ރެއާލުން ލަނޑެއް ޖަހާފައިވަނިކޮށް ލޫޝިއާނޯ ވިއޭޓޯ ވަނީ 79 ވަނަ މިނެޓް ތެރޭގައި އިތުރު ލަޑެއް ޖަހައި މެޗުގެ ނަތީޖާ ފަހެއް ތިނަކަށް ބަދަލުކޮށްފައެވެ.
މެޗުގައި އަށް ލަނޑު ފެނިފައިވާއިރު، މޮޅަށް ކުޅެ ގިނަ ހަމަލާތައް އުފައްދާފައިވަނީވެސް މެޗުން މޮޅުވި ރެއާލް މެޑްރިޑެވެ. މެޗުގައި ރެއާލުން ހިލާލްގެ ގޯލަށް ޖުމްލަ 28 ޝޮޓް ނެގިއިރު، ގޯލަށް އަމާޒުކޮށް ވަނީ 11 ހަމަލާ ފޮނުވާލާފައެވެ.
މިފަހަރުގެ ފީފާ ކްލަބް ވޯލްޑްކަޕް ރެއާލް ކާމިޔާބުކުރުމާއެކު އެޓީމުން ވަނީ މިހާތަނަށް މި މުބާރާތް ފަސް ފަހަރަށް ކާމިޔާބުކޮށް، މި މުބާރާތް އެންމެ ގިނައިން ކާމިޔާބުކުރި ޓީމުގެ ރެކޯޑު އާކޮށްފައެވެ.
ފީފާ ކްލަބް ވަރލްޑްކަޕްގެ ރަނަރަޕް ޓީމް އަލް ހިލާލް--- ފޮޓޯ/ފީފާ
މެޗަށްފަހު ވާހަކަދައްކަމުން ރެއާލް މެޑްރިޑްގެ ކޯޗް ކާލޯ އަންޗެލޮއްޓީ ބުނީ މުބާރާތް ކާމިޔާބުކުރެވުމަކީ ވަރަށް ބޮޑު އުފަލެއް ކަމަށާއި، މެޗުގައި އޭނާގެ ކުޅުންތެރިންގެ ފަރާތުން މޮޅު ކުޅުމެއް ފެނުނު ކަމަށެވެ. ޚާއްސަ ގޮތެއްގައި ބެންޒީމާ، ވިނީޝިއުސް އަދި ވަލްވޭޑޭގެ ކުޅުން އަންޗެލޮއްޓީ ފާހަގަކުރިއެވެ.