ދުނިޔޭގައި މިހާރު އެންމެ ގިނަބަޔަކު ބޭނުން ކުރަމުން އަންނަ އެއް އޮންލައިން ޕްލެޓްފޯމް ކަމަށްވާ ޓިކްޓޮކްގައި ރަޝިއާއިން ފޭކް އެކައުންޓުތަކުގެ ނެޓްވޯކެއް ހިންގާ ކަމަށް ޓިކްޓޮކްއިން ތުހުމަތު ކޮށްފިއެވެ.
ކުރު ވީޑިއޯ ކޮންޓެންޓަށް މަޝްހޫރު ޓިކްޓޮކްއިން ބުނީ، ޔޫކްރެއިން ހަނގުރާމައާ ގުޅޭގޮތުން ދޮގު މައުލޫމާތު ފެތުރުމުގެ ބޭނުމުގައި ރަޝިއާއިން ފޭކު އެކައުންޓުތަކެއް ހަދާފައިވާ ކަމަށެވެ. އެ އެކައުންޓުތަކުގެ ބޮޑު ނެޓްވޯކް ފެނިފައި ވަނީ، ޓިކްޓޮކްގައި މީހުންނަށް އޮޅުވާލައި ނުފޫޒު ފޯރުވުމަށް ހިންގާ ދޮގު މައުލޫމާތު ކެމްޕޭންތައް ދެނެގަނެ ނައްތާލުމަށް ކުރަމުންދާ މަސައްކަތުގެ ތެރެއިން ކަމަށް ޓިކްޓޮކްއިން ބުންޏެވެ.
ރަޝިއާގެ އެ ނެޓްވޯކުން ފޭކް އެކައުންޓްތައް ބޭނުންކޮށްގެން މީހުންނަށް އޮޅުވާލައި، ދޮގު މައުލޫމާތު ފަތުރައި، އެ ޕްލެޓްފޯމް ބޭނުންކުރާ ޔޫރަޕްގެ މީހުންގެ މެދުގައި ފިތުނަ ފަސާދަ އުފައްދައިފައިވާކަން ފާހަގަކުރެވިފައިވާ ކަމަށް ޓިކްޓޮކްއިން ބުންޏެވެ. ފޭކް އެކައުންޓްތަކާއި ކޮންޓެންޓްތައް ފަރުމާކޮށްފައި ވަނީ މައުލޫމާތުގެ އަސްލު ވަސީލަތްތައް ނަކަލުކޮށް، އިތުބާރު ކުރެވޭ ގޮތަށް، އެ މީހުންގެ ނުފޫޒު އިތުރު ކުރެވޭ ގޮތަށް ކަމަށް ޓިކްޓޮކްގެ ތަރުޖަމާނަކު ބުންޏެވެ.
ޓިކްޓޮކްއިން ބުނީ އެ ޕްލެޓްފޯމުން ފޭކް އެކައުންޓްތަކާއި ކޮންޓެންޓް ނައްތާލުމަށާއި އެ ނެޓްވޯކް ހުއްޓުވުމަށް މިހާރު ފިޔަވަޅުތަކެއް އަޅާފައިވާ ކަމަށެވެ. އަދި އެ މައްސަލަ ތަހުގީގުކޮށް ޒިންމާވާ ފަރާތްތައް ދެނެގަތުމުގެ މަސައްކަތް ގާނޫނު ތަންފީޒުކުރާ އިދާރާތަކާއި އެހެނިހެން ޖަމިއްޔާތަކާ ގުޅިގެން ކުރަމުން އަންނަ ކަމަށް ވެސް އެ ކުންފުނިން ބުންޏެވެ.
ޓިކްޓޮކްއިން އެ ނެޓްވޯކް ހާމަކުރުމާއެކު، މިދާއިރާގެ ދިރާސާވެރިން ވަނީ އެފަދަ ވަސީލަތްތަކުގެ އެހީގައި އާންމުންގެ ޚިޔާލު އޮޅުވާލައި ޑިމޮކްރެޓިކް މަރުހަލާތައް ހަނިކުރުމަށް ހިންގާ ދޮގު މައުލޫމާތު ކެމްޕެއިންތަކުގެ ސަބަބުން ކުރިމަތިވެފައިވާ ނުރައްކަލުގެ މައްޗަށް އަލިއަޅުވާލާފައެވެ. އަދި ދޮގު މައުލޫމާތު ފެތުރުން ހުއްޓުވުމަށާއި އޭގެ ސަބަބުން ލިބޭ ގެއްލުންތަކުން މީހުން ސަލާމަތްކުރުމަށް ސޯޝަލް މީޑިއާ ކުންފުނިތަކާއި ސަރުކާރުތަކުގެ އިދާރާތަކާއި މަދަނީ ޖަމިއްޔާތަކުން ސަމާލުކަން ދިނުމާއި ފިޔަވަޅު އެޅުމުގެ މުހިންމުކަން ވެސް ދިރާސާވެރިން ވަނީ ފާހަގަކޮށްފައެވެ.
ޓިކްޓޮކްއިން ވަނީ އެ ޕްލެޓްފޯމަކީ ބޭނުންކުރާ ފަރާތްތަކުގެ ސަލާމަތާއި ޕްރައިވެސީ ހިމާޔަތްކޮށް، އެކަކު އަނެކަކާ ގުޅުމަށް ރައްކާތެރި އަދި އިތުބާރު ހިފޭ ޕްލެޓްފޯމަކަށް ހެދުމަށް މަސައްކަތް ކުރަމުންދާ ކަމަށް ބުނެފައެވެ. އަދި ޓިކްޓޮކްގައި މައުލޫމާތު އެހެން ފަރާތްތަކާ ހިއްސާކުރުމުގެ ކުރިން އޭގެ ސައްހަކަން ބެލުމާއި މައުލޫމާތު ކަށަވަރު ކުރުމަށް އެ ކުންފުނިން ވަނީ ބާރު އަޅާފައެވެ.
ޓިކްޓޮކްއަކީ ކުޑަކުދިންނާއި ޒުވާނުން ހިމެނޭ ގޮތަށް ގިނަ ބައެއްގެ މެދުގައި މަގުބޫލު ޕްލެޓްފޯމަކަށް ވާއިރު، ދޮގު މައުލޫމާތު ދިނުމުގެ ކެމްޕެއިންތަކުގެ ސަބަބުން މި އުމުރުފުރާތަކަށް ކުރާ ނޭދެވޭ އަސަރުތައް ގިނައެވެ. އެހެންކަމުން، ދޮގު މައުލޫމާތުގެ ނުރައްކާ ސީރިއަސްކޮށް ނަގައި، އޭގެ ނޭދެވޭ އަސަރުތަކުން ތިމާއާއި އެހެން މީހުން ސަލާމަތް ކުރުމަށް ފިޔަވަޅުއެޅުމަކީ ވަރަށް މުހިންމު ކަމެއްކަން ތަޖުރިބާކާރުން ފާހަގަކުރެއެވެ.