ކަންތައްތަކާ މާބޮޑަށް ވިސްނާ ފިކުރުކޮށް، ކަންބޮޑުވާ މީހުންނަށް ޚާއްސަކޮށް، ޢިލްމީ އަދި ދީނީ ނަޒަރިއްޔާތުން އެކަމާމެދު އަމަލު ކުރާނެ ގޮތް ބަޔާންކޮށް ޑރ. އަނާރާ ނައީމް ފޮތެއް ނެރުއްވައިފިއެވެ.
މި ފޮތް ނެރުމަށް މިއަދު ގައުމީ ކުތުބުޚާނާގައި ބޭއްވި ހަފުލާގައި އެފޮތް ނެރެދެއްވީ ކްލިނިކަލް ސައިކޮލިޖިސްޓް ޑރ. އައިޝަތު އަލީ ނާޒްއެވެ.
ފޮތް ނެރުމަށްފަހު ވާހަކަދައްކަވަމުން ޑރ. އަނާރާ ވިދާޅުވީ، ދިވެހިންގެ ތެރޭގައި ކަންކަމާ ވިސްނާ ފިކުރުބޮޑުވާ މީހުން މިހާރަކަށް އައިސް ވަރަށް ގިނަވެއްޖެ ކަމަށާއި، ހާސްކަމުގެ ތެރޭގައި ދިރިއުޅޭ މީހުންގެ އަދަދުވެސް ކުރިއަށްވުރެ އިތުރުވަމުން އަންނަ ކަމަށެވެ.
އެގޮތުން ކޮވިޑް-19ގެ ބަލިމަޑިކަމުގެ ތެރެއިން މި މައްސަލަ ފެންމަތިވިކަން ފާހަގަކުރެވިގެން ދިޔަކަމަށާއި، ގޭގައި ބަންދުވެ، ދިރިއުޅުމަށް އައި ބަދަލުގައި އެތައް ބަޔަކަށް ނަފްސާނީ މައްސަލަތަކާ ކުރިމަތިވަމުންދިޔަކަމަށް ޑރ. އަނާރާ ވިދާޅުވިއެވެ. އެފަދަ ޙާލަތްތަކުގައި ކަންކުރަންވީ ގޮތް ނޭނގި ތިބި އެތައް ބަޔަކު ރާއްޖޭގައި ތިބިކަން ވެސް އޭރު ހާމަވިކަމަށްވެސް ޑރ. އަނާރާ ވިދާޅުވިއެވެ.
ޑރ. އަނާރާ ނައީމް ފޮތާ ބެހޭ ގޮތުން ވާހަކަދައްކަވަނީ / ސަން ފޮޓޯ: މުހައްމަދު ޝާތިއު
އަޅުގަނޑަށް ވަރަށް ގިނަ ބޭފުޅުން ގުޅުއްވަމުން ދިޔަ ދީނީގޮތުން ކޮބާތޯ ތިމަންނައަށް މިކަމުން އަރައިގަނެވޭނެ ގޮތަކީ. ޚިޔާލުތަކާ ދުރުވެ ވިސްނުން ހަމަ މަގަށް އަޅުވައި، ވިސްނުމާ ރަނގަޅަށް މުއާމަލާތު ކުރާނީ ކިހިނެއްތޯ އައްސަވާ ކޮންމެ ދުވަހަކު ހަމަ. ކުޑަކުޑަ ކަމަކާވެސް މާ ބޮޑަށް ވިސްނެނީ. ފަހުން ދެން އަޅުގަނޑު ރިސާޗް ހަދަން ފެށީ. އަބަދަކު މީހަކު ނުހުންނާނެ އެހީވާކަށް. އަދި ހުރިހާ މީހުންނަކީ އެހީ ހޯދަން އެހެން މީހުން ކައިރިއަށް ދާނެ މީހެއް ވެސް ނޫން. ޑރ. އަނާރާ ނައީމް
ޑރ. އަނާރާ ނައީމް ނެރުއްވި ފޮތް / ސަން ފޮޓޯ: މުހައްމަދު ޝާތިއު
ޑރ. އަނާރާ ވިދާޅުވީ، މިފޮތް ލިޔުއްވި އިރު އެންމެ ބޮޑު އިސްކަމެއް ދެއްވީ އަމިއްލައަށް މައްސަލަތައް ހައްލުކުރާނެ ގޮތްތަކަކީ ކޮބައިކަން ކިޔުންތެރިންނަށް ބުނެދިނުމަށް ކަމަށެވެ. އަދި އިސްލާމީ ޝަރީއަތުގެ އަލީގައި ހިތްވަރު ދިނުމަށްޓަކައިވެސް އެތައް ވާހަކައެއް ހިމަނާފައިވާނެ ކަމަށްވެސް އޭނާ ވިދާޅުވިއެވެ.
ފިކުރުބޮޑުވާ ހާލަތްތަކުގައި އަމިއްލައަށް ހަމައަކަށް އެޅި، ހިތްވަރު ލިބިގަންނާނެ އެތައް ވާހަކައެއް މި ފޮތުގައި ވަނީ ހިމަނާފައެވެ. ޑރ. އަނާރާ ވިދާޅުވީ މި ފޮތް ލިޔުމުގައި ނަފްސާނީ ދުޅާހެޔޮކަމާ ގުޅޭ މާހިރުންނާއި، ޑޮކްޓަރުންނާ ވާހަކަދައްކަވައި، ދީނީ ގޮތުން ކަން އޮންނަ ގޮތް ބެލުމަށް މުހިންމު ދިރާސާތަކެއް ކޮށްފައިވާކަމަށެވެ.
މި ފޮތުގެ އަގަކީ 150 ރުފިޔާއެވެ. މި ފޮތް ލައިބްރަރީތަކާއި ފޮތް ވިއްކާ ފިހާރަތަކުން ލިބެން ހުންނާނެއެވެ.