ފާއިތުވި 40 އަހަރުތެރޭ ފިލިޕީންސްގެ އިގުތިސާދު އެންމެ ބޮޑަށް ކުރިއަރާފައި ވަނީ މިދިޔަ އަހަރު ކަމަށް ތަފާސްހިސާބުން ދައްކައިފިއެވެ.
ފިލިޕީންސްގެ ސްޓެޓިސްޓިކް އޭޖެންސީއިން އާންމުކުރި މައުލޫމާތުގައިވާ ގޮތުން މިދިޔަ އަހަރު އެގައުމުގެ އިގުތިސާދު ވަނީ 7.6 ޕަސެންޓް ކުރިއަރާފައެވެ. އެއީ 1976ގެ ފަހުން އެގައުމުގެ އިގުތިސާދު އެހާވަރަށް ކުރިއެރި ފުރަތަމަ ފަހަރެވެ. އަދި އެއީ ފިލިޕީންސް ސަރުކާރުން އެގައުމުގެ އިގުތިސާދު ކުރިއަރާނެ ކަމަށް ލަފާކުރި ވަރަށް ވުރެ އިތުރު އަދަދެކެވެ. އެގޮތުން ސަރުކާރުން ލަފާ ކުރީ 6.5 ޕަސެންޓާއި 7.5 ޕަސެންޓާ ދެމެދުގެ އަދަދެކެވެ.
ފިލިޕީންސްގެ އިކޮނޮމިކް ޕްލޭނިން ސެކްރެޓަރީ އާސީނިއޯ ބަލިސަކަން ވިދާޅުވީ އިގުތިސާދީ ކުރިއެރުމުގެ ފަހަތުގައި ވަނީ، ގައުމުގައި ޚިދުމަތާއި މުދަލުގެ ޑިމާންޑު ބޮޑުވުމާއި ވަޒީފާތައް އިތުރުވުމާއި އަހަރުގެ ފަހު ތިން މަސް ތެރޭގައި ކޮވިޑްގެ ފިޔަވަޅުތައް އެއްކޮށް އުވާލުމުން މީހުން ވިޔަފާރި ކުރާ މިންވަރު އިތުރުވުން ކަމަށެވެ.
އޭނާ ވިދާޅުވީ ޗައިނާ އަލުން ހުޅުވުމަކީ ފިލިޕީންސްގެ އިގްތިސާދަށް ލިބޭ ބޮޑު ކުރިއެރުމަކަށް ވާނެ ކަމަށެވެ. އަދި އިންފްލޭޝަން މަތިވާއިރު ސަރުކާރުން އެންމެ ބޮޑު އިސްކަމެއް ދޭނީ ފިލިޕީންސްގެ ރައްޔިތުންނާއި މުދަލާއި ޚިދުމަތްތަކަށް ފައިސާ ޚަރަދުކުރެވޭނެކަން ޔަގީން ކުރުމާއި ކާބޯތަކެތީގެ ރައްކާތެރިކަން ކަށަވަރުކުރުން ކަމަށެވެ.
ފިލިޕީންސްގެ ސަރުކާރުގެ ތަފާސްހިސާބުތަކުން ދައްކާ ގޮތުގައި މިދިޔަ އަހަރުގެ ފަހު ކުއާޓަރުގައި ގޭބިސީތަކުގެ ޚަރަދުތައް ވަނީ ދަށްވެފައެވެ. އެއީ އޭގެ ކުރީ ދެ ކުއާޓަރުގައި ޚަރަދުތައް ދަށްވުމަށްފަހުގައެވެ. އެގޮތުން ތިން ވަނަ ކުއާޓަރުގައި އަށް ޕަސެންޓަށް ކުރިއެރި ނމަވެސް ހަތަރު ވަނަ ކުއާޓަރުގައި ކުރިއަރާފައި ވަނީ ހަތް ޕަސެންޓަށެވެ.
ނަމަވެސް އިގުތިސާދީ މާހިރުން ވަނީ ދުނިޔޭގެ ފެންވަރުގައި އިގުތިސާދު މަޑުޖެހި، އިންފްލޭޝަން މަތިވަމުންދާތީ ފިލިޕީންސްއަށް ވެސް ދެން އޮތީ ދަތި އަހަރެއް ކަމަށް ލަފާކޮށްފައެވެ.
ބަލިސާކާން ވިދާޅުވީ މިއަހަރު ވެސް އެގައުމުގެ އަމާޒަކީ އިގުތިސާދީ ކުރިއެރުން ހަ ޕަސެންޓާއި ހަތް ޕަސެންޓާ ދެމެދުގެ މިންވަރެއްގައި ބެހެއްޓުން ކަމަށެވެ.