ޕަބްލިކް ސާވިސް މީޑިއާ (ޕީއެސްއެމް)ގެ މެނޭޖިން ޑިރެކްޓަރުކަމުގެ މަގާމަށް ކުރިން އެ މަގާމުގައި ހުންނެވި އަލީ ޚާލިދު އަލުން އައްޔަންކޮށްފިއެވެ.
ޕްރައިވެޓައިޒޭޝަން ބޯޑުގެ ރައީސް މުހައްމަދު އާސިމް "ސަން"އަށް ވިދާޅުވީ އެމްޑީކަމުގެ މަގާމަށް ބޭފުޅަކު އައްޔަންކުރި ނަމަވެސް ޑެޕިއުޓީ އެމްޑީކަމުގެ މަގާމަށް މިހާތަނަށް އެއްވެސް މީހަކު އައްޔަންކޮށްފައެއް ނުވެއެވެ. އެ މަގާމުގައި މީގެ ކުރިން ހުންނެވި މުހައްމަދު ޝަމީމު މިހާރު ހުންނެވީ، ރައީސް އޮފީހުގެ އަންޑާ ސެކްރެޓަރީއެއްގެ މަގާމުގައެވެ.
ޤާނޫނީ ގޮތުން ހުސްކަމެއްގެ ތެރޭގައި އޮތް، ޕީއެސްއެމްގެ ޑިރެކްޓަރުންގެ ބޯޑުގެ ހުސްވެފައިވާ މަޤާމުތަކަށް ބޭފުޅުން އައްޔަނުކުރުމުގެ ކަންކަން މި ހަފުތާގެ ތެރޭގައި ނިމިގެންދާނޭ ކަމަށް ސަރުކާރު ކުންފުނިތަކުގެ ބަލަދުވެރި ފަރާތް ޕްރައިވަޓައިޒޭޝަން ބޯޑުން ވަނީ ބުނެފައެވެ.
އާސިމް ވިދާޅުވީ، ޕީއެސްއެމްގެ ބޯޑުގެ ހުސްވެފައިވާ މަޤާމުތަކަށް ބޭފުޅުން އައްޔަނުކުރުމުގެ މަސައްކަތް ކުރިއަށްދާ ކަމަށެވެ.
މިގޮތުން ބޯޑެއް އެކުލަވާލެވޭ ވަރަށް ނަންތައް ލިބިފައިވާކަމަށާއި، މިހަފުތާގައި ކުރިއަށް ދިޔައީ މަޤާމުތަކަށް ނަން ހުށައަޅާފައިވާ މީހުންގެ ހުންނަންޖެހޭނެ ކަމަށް ބުނާ ޝަރުތުތައް ފުރިހަމަވޭތޯ ބެލުމުގެ މަސައްކަތްތައް ކަމަށް އޭނާ ވިދާޅުވިއެވެ.
ޕީއެސްއެމްގެ ޑިރެކްޓަރުންގެ ބޯޑުގައި ފަސް ބޭފުޅުން ތިއްބަވާއިރު، މިހާރު ބޯޑުގައި އިން ހަމައެކަނި ޑިރެކްޓަރަކީ ޢަބްދުﷲ ރަޝީދެވެ.
ޕީއެސްއެމްގެ ބޯޑު ހަމަނުވާތީވެ، ކެޕިޓަލް އިންވެސްޓްމަންޓުތައް ކުރުމާއި، ކުންފުނީގެ ޕޮލިސީ ލެވެލްގައި ކުރަންޖެހޭ ކަންކަން ނުކޮށް މަޑު ޖައްސާލުމަށް ވަނީ އަންގައިފައެވެ.