އދ. މަހިބަދޫގެ ބިމުގެ ޖާގައިގެ ދަތިކަމުގެ ސަބަބުން މީހުން ދިރިއުޅެން ގޯތި ދޫނުކުރެވި އޮންނަތާ 35 އަހަރުވެއްޖެކަމަށާއި އެކަމާ ގުޅިފައިވާ ގިނަ ކަންބޮޑުވުންތަކެއް އެ ރަށު ރައްޔިތުންގެ އެބަހުރި ކަމަށް އެ ރަށު ކައުންސިލުން މިއަދު ބުނެފިއެވެ.
މަހިބަދޫއިން އެންމެ ފަހުން ގޯތި ދޫކުރީ 1988ވަނަ އަހަރެވެ. އޭގެ ފަހުން ގޯތި ދޫކުރުންވަނީ ހުއްޓައިލައިފައެވެ. ނަމަވެސް ރަށުގެ އާބާދީ އައީ އަހަރުތަކާއެކު އިތުރުވަމުންނެވެ.
އެކަމާ ގުޅިގެން ރައްޔިތުންގެ ހުރި ކަންބޮޑުވުންތައް ހިއްސާކޮށްދެއްވަމުން އެ ރަށު ކައުންސިލްގެ ރައީސް ރަޝަދު އަލީ މިއަދު "ސަން"އަށް ވިދާޅުވީ، ގޯތި ދޫނުކޮށް ތިބެން ކައުންސިލަށް މަޖުބޫރުވާ ހަމައެކަނި ސަބަބަކީ އެ ރަށުގައި ބިމުގެ ޖާގަ ނެތުން ކަމަށެވެ.
"މި ހުރިހާ ކަމެއްގެ އަސްލަކީ، ބިމުގެ ދަތިކަން. އަޅުގަނޑުމެން މި ތިބީ މި ރަށުގައި މިހާރު ފަޅުގައި އޮތް ކުޑަ ޖާގަ ހިއްކައިގެން ވެސް ބިން ކޮޅެއް އިތުރުކޮށްގެން ގޯތި އަވަހަށް ދޭން ފަށަން ތައްޔާރަށް،" ރަޝަދު ވިދާޅުވިއެވެ.
އެ ރަށު ކައުންސިލް މެމްބަރުންނާއެކު ރައީސް އިބްރާހީމް މުހައްމަދު ޞާލިހު މިދިޔަ އާދިއްތަ ދުވަހު ބޭއްވެވި ބައްދަލުކުރެއްވުމުގައި ވެސް ކައުންސިލް މެމްބަރު، މި ވާހަކަ ފާހަގަކުރެއްވިއެވެ.
އެކަން ފާހަގަކުރައްވައި، ކައުންސިލް ރައީސް ރަޝާދު މިއަދު ވިދާޅުވީ، އަންނަ އަހަރުގެ ބަޖެޓުގައި ހިމަނައިގެން މަހިބަދޫ ބިން ހިއްކުމުގެ މަސައްކަތް ފަށާނެކަމުގެ ޔަގީންކަން އެ ދުވަހު ރައީސް ދެއްވި ކަމަށެވެ.
އެކަމަކު އެ ކަމުން ވެސް އެންމެ އެދެވޭ ހައްލެއް އަންނާނެކަމަށް ނުބެލެވޭކަމަށް ރަޝާދު ވިދާޅުވިއެވެ.
"އެހެންވެ އަޅުގަނޑުމެން އެދުނިން މި ރަށް ކައިރީގައި އޮތް މާފަރު ފަޅު ވެސް މަހިބަދޫ ކައުންސިލްގެ އިހްތިސާސްގެ ދަށަށް ގެންނަން. ރައީސް ވިދާޅުވީ، އެ ކަމާ ގުޅުން ހުރި މަޝްވަރާތަކަށްފަހު ޖަވާބެއް ދެއްވާނެކަމަށް،" ރަޝާދު ވިދާޅުވިއެވެ.
އިތުރަށް ވާހަކަދައްކަވަމުން ރަޝާދު ވިދާޅުވީ، ގޯތި ދޫނުކުރެވި މިހާ ގިނަ ދުވަސްވުމަކީ، އިޖްތިމާއީ ގޮތުން ގިނަ މަައްސަލަތަކެއް ކުރިމަތިވާނެ ކަމެއް ކަމަށެވެ.
"ގޯތި ބަހަން ހުޅުވައިލީމާ، ރައްޔިތުންނަށް ހަ ފޫޓު، 12 ފޫޓުގެ ކުދިކުދި ބިންކޮޅު ލިބޭ ފަހަރު އެބަ ދޭ. މި ވަރުން އެނގޭނެ ކިހާ ގޯސްވެފައިކަން މި ހާލަތު އޮތީ،" ރަޝާދު ވިދާޅުވިއެވެ.
އޭނާ ވިދާޅުވީ މި ކަމަށް ކައިރި މުސްތަގްބަލެއްގައި ހައްްލު ލިބޭނެކަމަށް އުންމީދުކުރާކަމަަށެވެ. އަދި ރަށުގެ ރައްޔިތުންނަށް ފަހި ގޮތެއްް ހަމަޖައްސައިދެވޭތީ އަބަދުވެސް ކައުންސިލުން މަސައްކަތްކުރާނެކަމަށް ރަޝާދު ވިދާޅުވިއެވެ.