މީގެ ދެ އަހަރު ކުރިން, 2020 ވަނަ އަހަރުގެ ޖޫން މަހުގެ 14 ވަނަ ދުވަހު މަރުވި ބޮލީވުޑްގެ ފިލްމީތަރި ސުޝާންތު ސިންހް ރާޖްޕުތް އަމިއްލައަށް މަރުވީ ކަމަށް ނުބެލެވޭ ކަމަށް އޭނާގެ ޕޯސްޓުމޯޓަމް ހެދުމުގެ މަސައްކަތުގައި ބައިވެރިވި މީހަކު ބުނެފިއެވެ.
ސުޝާންތުގެ ޕޯސްޓްމޯޓަމް ހެދުމުގައި ބައިވެރިވި، މުމްބާއީގެ ކޫޕާ ހޮސްޕިޓަލުގެ މޯޗަރީގައި މަސައްކަތް ކުރާ ރޫޕުކުމާރު އިންޑިއާގެ މީޑިއާތަކަށް ބުނީ ސުޝާންތުގެ ހަށިގަނޑުން އަމިއްލައަށް މަރުވި ކަމަށް ބެލެވޭ ނިޝާންތަކެއް ފެނިފައިނުވާ ކަމަށެވެ. އޭގެ އިތުރުން އޭނާގެ ހަށިގަނޑުގައި ޒަޚަމްތަކެއްގެ ނިޝާން ހުރިކަމަށް ރޫޕުކުމާރު ބުންޏެވެ.
އޭނާ ބުނީ އޭނާ ޕޯސްޓްމޯޓަމް ހެދުމުގައި އުޅޭތާ 28 އަހަރު ވެފައިވާ ކަމަށެވެ. އަދި ސުޝާންތު މަރުވީ އަމިއްލައަށްކަން ގަބޫލު ނުކުރާ ކަމަށާއި އޭނާ މަރާލީ ކަމަށް ބެލެވޭ ފަދަ ޒަޚަމްތަކުގެ ވާހަކަ، މައްސަލައިގައި އިސްކޮށް މަސައްކަތް ކުރި މީހުންނާ ހިއްސާ ކުރި ކަމަށެވެ. ނަމަވެސް އެއްވެސް މީހަކު އެކަމަށް އަޅާނުލީ ކަމަށް ވެސް ރޫޕްކުމާރު ބުންޏެވެ.
ބޭރުގެ ނޫހެއް ކަމަށްވާ އިންޑިއާ ޓުޑޭ އިން އެއިމްސްގެ އިސް ޑަކްޓަރެއް ކަމަށްވާ ޑރ. ސުދީރް ގުޕްތާ އާ ހަވާލާދީ މީގެ ކުރިން ބުނެފައިވާ ގޮތުގައި، ސުޝާންތު މަރާލި ކަމުގެ ހެއްކެއް އެއިމްސްގެ ޕެނަލަކުން ބެލި ބެލުމުން ފެނިފައިނުވެއެވެ. އަދި އޭނާ އަމިއްލައަށް މަރުވީ ކަމަށް ކޫޕާ ހޮސްޕިޓަލުން ހެދި ޕޯސްޓްމޯޓާމް ރިޕޯޓުން ގަބޫލުކުރެވޭ ކަމަށް ވެސް އެ ޑޮކްޓަރު ވިދާޅުވިއެވެ.
އޭނާގެ އާއިލާއާއި ރަހުމަތްތެރިންނާއި ފޭނުން ވެސް ސުޝާންތު މަރާލީކަމަށް ބުނަމުން ދިޔައިރު އެ ވާހަކަތަކަކީ އެއްވެސް ހަގީގަތެއް ނެތް ވާހަކަތަކެއް ކަމަށް އެއިމްސްގެ އެ ޑަކްޓަރު ވަނީ ބުނެފައެވެ.
އެއިމްސްގެ އެހެން ޑަކްޓަރެއް ކަމަށްވާ ޑރ. އާދާޝް ކުމާރާ ހަވާލާދީ އެ ނޫހުން ބުނީ ސުޝާންތުގެ މަރާ ބެހޭ ގޮތުން އިތުރަށް ދައްކާނެ ވާހަކައެއް ނެތްކަމަށެވެ. އަދި އޭނާގެ ހަށިގަނޑުން އެއްވެސް ވިހައެއްގެ އަސަރު ވެސް ފެނިފައިނުވާ ކަމަށް އޭނާ ވިދާޅުވިއެވެ.
އެއިމްސްގެ ޑޮކްޓަރުން ސުޝާންތު ދަންޖެހިގެން މަރުވީކަމަށް ނިންމުމާއެކު ގިނަ އަދަދެއްގެ މީހުން ނުރުހުން ފާޅުކުރަމުންދާއިރު އެއް ބަޔަކު ބުނަނީ ކޫޕާ ހޮސްޕިޓަލުން ހެދި ޕޯސްޓްމޯޓަމް ރިޕޯޓަކީ އެއްވެސް އަސްލެއް ނެތް އެއްޗެއްކަމަށެވެ.
އެއިމްސްގެ އެ ނިންމުމާ ގުޅިގެން ސުޝާންތުގެ ވަކީލު ވިކާސް ސިންހް ވިދާޅުވީ ސުޝާންތުގެ ހަށިގަނޑު ނުފެނި، ހަމައެކަނި ފޮޓޯތައް ބަލައިގެން އެއިމްސްއަށް އޭނާ އަމިއްލައަށް މަރުވީކަމަށް ނުނިންމޭނެ ކަމަށެވެ. އަދި ކޫޕާ ހޮސްޕިޓަލުން ޕޯސްޓްމޯޓަމް ރިޕޯޓު ތައްޔާރު ކޮށްފައި ވަނީ އެއްވެސް ކަމެއްގެ ހަގީގަތް ނޭނގޭ ގޮތަށް ކަމަށް ވެސް އޭނާ ތުހުމަތުކުރިއެވެ.