ބްރިޓިޝް އެއާވޭސް އިން، އަންނަ ޖެނުއަރީމަހުން ފެށިގެން ރާއްޖެއަށް ކުރާ ދަތުރުތައް އިތުރުކުރުމަށް ނިންމައިފިއެވެ.
މިކަމާ ގުޅޭގޮތުން "ސަން"އާ ވާހަކަދައްކަވަމުން ވެލާނާ އިންޓަނޭޝަނަލް އެއާޕޯޓް ހިންގާ ކުންފުނި، އެމްއޭސީއެލްގެ އޮފިޝަލަކު މިއަދު ވިދާޅުވީ، ބްރިޓިޝް އެއާވޭސްއިން ރާއްޖެއަށް ބައްވަމުން އަންނަ ދަތުރުތައް ޖެނުއަރީމަހުން ފެށިގެން ހަފުތާއަކު ތިން ފްލައިޓަށް އިތުރުކުރުމަށް ނިންމާފައިވާކަމަށެވެ.
އަންނަ މަހުން ފެށިގެން ބްރިޓިޝް އެއާވޭސްއިން ރާއްޖެއަށް ކުރާ ދަތުރުތައް އިތުރުކުރުމަށް ނިންމި ނަމަވެސް، އުދުހުންތައް ބާއްވާނެ ދުވަސްތަކެއް ހާމައެއް ނުކުރެއެވެ.
މިއަހަރުގެ ފިނި މޫސުމާ ގުޅިގެން ބްރިޓީޝް އެއާވޭޝްއިން އަންނަނީ ކޮންމެ ދުވަހަކު ފްލައިޓެއް ރާއްޖެއަށް ބާއްވަމުންނެވެ. ބްރިޓީޝް އެއާވޭސްއަކީ އާއްމުގޮތެއްގައި ފަތުރުވެރިކަމުގެ ސީޒަނާއި ދިމާކޮށް އުދުހުންތައް ބާއްވަމުން އަންނަ އެއާލައިނެކެވެ.
ރާއްޖޭގެ ފަތުރުވެރިކަމުގެ ސިނާއަތުގައި އިނގިރޭސިވިލާތަކީ އެންމެ ދުވަސްވީ އެއް މާކެޓެވެ. އަދި އިނގިރޭސިވިލާތަކީ ފަތުރުވެރިކަމުގެ ސިނާއަތުގެ އެންމެ މުހިއްމު އެއް މާކެޓެވެ. އިނގިރޭސިވިލާތް ހިމެނެނީ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ އެއް ޤައުމުގެ ގޮތުގައެވެ.
ޓޫރިޒަމް މިނިސްޓްރީގެ އެންމެފަހުގެ ތަފާސްހިސާބުތަކަށް ބަލާއިރު، މިއަހަރުގެ ނޮވެމްބަރުމަހުގެ ނިޔަލަށް އިނގިރޭސިވިލާތުން ރާއްޖެއަށް 162,146 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރާއި އަޅާބަލާއިރު، 254.5 އިންސައްތަ އިތުރުވުމެކެވެ. މިދިޔަ އަހަރުގެ ނޮވެމްބަރުމަހުގެ ނިޔަލަށް އިނގިރޭސިވިލާތުން ރާއްޖެއަށް ޒިޔާރަތްކުރި ފަތުރުވެރިންގެ އަދަދު އުޅެނީ 45،793 ގައެވެ.