އިދިކޮޅު ޕީޕީއެމްގައި ތިއްބާ، "ވަގަށް" އެހެން ޕާޓީތަކަށް ވައްދާފައިވާ މެންބަރުން އަނބުރާ އެޕާޓީއަށް ރުޖޫއަ ކޮށްދިނުމުގައި ލަސްވާތީ އެޕާޓީގެ ސެކްރެޓަރީ ޖެނެރަލް މުހައްމަދު ތޮލާލް ނުރުހުން ފާޅުކުރައްވައިފިއެވެ.
އެމްޑީޕީން މިއަދު ވަނީ އެހެން ޕާޓީއަކަށް ސޮއިނުކުރަނީސް އެ ޕާޓީން ވަކިވެފައިވާނަމަ އެ މައްސަލައިގެ ޝަކުވާ ފޯމް ފުރިހަމަކޮށް އަލުން އެޕާޓިއަށް ރުޖޫއަވުމަށް އިލްތިމާސްކޮށްފައެވެ.
އެކަމާ ގުޅިގެން "ސަން"އާ ވާހަކަދައްކަވަމުން ތޮލާލް ވިދާޅުވީ ޕީޕީއެމްގެ ދަފުތަރުގައި ތިއްބާ އެމީހުންނަށް ނޭނގި ވަކިކުރި 6،000 އަށްވުރެ ގިނަ މެންބަރުން އަނބުރާ އެޕާޓީއަށް ރުޖޫއަ ކޮށްދޭން އިލެކްޝަންސް ކޮމިޝަން (އީސީ)ގައި އެދޭތާ އަހަރެއް ވެފައިވާ ކަމަށެވެ.
"އަޅުގަނޑުމެންގެ ޕާޓީން ވަކިކުރި މެންބަރުންގެ މައްސަލަ ބަލާފައި އަނބުރާ މިޕާޓީއަށް ވައްދަދޭށޭ، ޝަކުވާ ފޯމެއް ހުށަހަޅައިގެން ނަމަވެސް، އެކަމަކު މިއޮށް ހުރިހާ ދުވަހު އެކަން ނުވެ އޮތީ. އޮވެފައި އެމްޑީޕީން ބޭނުންވީމާ ޓަސްލާފައި އެކުރަނީ،" އޭނާ ވިދާޅުވިއެވެ.
ތޮލާލް ވިދާޅުވީ، މެންބަރުން ރުޖޫއަ ނުކުރެވޭ ސަބަބަކީ ގާނޫނީ ހުރަސްތައް ހުރުން ކަމަށް އީސީއިން ބުނެފައިވާ ކަމަށެވެ.
"އަހަރު ވީއިރުވެސް އެކަން ކުރުމަށް ގާނޫނީ ހުރަސްތައް ހުރި ކަމަށް ބުނެ ހުއްޖަތް ދެއްކުމަށް ފަހު މިއަދު އެމްޑީޕީ ބޭނުންވީ، ހަމަ ޓަސް." ތޮލާލް ވިދާޅުވިއެވެ.
މެންބަރުން "ވަގަށް" ނަގާ މައްސަލަ ބޮޑުވުމުގެ ސަބަބުން އީސީއިން ވަނީ ޕާޓީތަކަށް މެންބަރުން ވައްދާ އުސޫލަށް ވެސް ބަދަލުތަކެއް ގެނެސްފައެވެ. މިގޮތުން، ޕާޓީތަކަށް ވައްދާ މެންބަރުންގެ މައުލޫމާތު އާންމުކޮށް، އެކަން މެސެޖެއްގެ ޒަރިއްޔާއިން އަންގަން ވަނީ ފަށާފައެވެ.