ހދ. ނޮޅިވަރަމް، ނިޝާމާ މުހައްމަދުގެ މަރުގެ ތުހުމަތު ކުރެވޭ، އދ. ފެންފުށީ އަބޫބަކަރު ފައިސަލް، އޭނާ ބަހައްޓައިފައި ހުރި ގޮޅީގެ ތެރޭގައި ދަން ޖެހެން ފުރުސަތު ލިބުނީ ކިހިނެެއްތޯ ދެނެގަންނަން އެ ގޮޅިން ނެގި ފޮރެންސިކް ސާމްޕަލްތައް ތަހުލީލުކުރަން ނިންމައިފައިވާކަމަށް ނޭޝަަނަލް އިންޓެގްރިޓީ ކޮމިޝަން (އެންއައިސީ)އިން މިއަދު ބުނެފިއެވެ.
ކުޅުދުއްފުށީ ޕޮލިސް ސްޓޭޝަންގެ ގޮޅިއެއްތެރޭގައި ފައިސަލް ދަންޖެހިފައި ހުއްޓައި ފެނުނީ މިދިޔަ ހޯމަ ދުވަހުގެ ރޭ 23:15 ހާއިރެވެ. އޭނާ ކުޅުދުއްފުށީ ރީޖަނަލް ހޮސްޕިޓަލަށް ވަގުތުން ގެންގޮސް ފަރުވާ ދޭން ފެށީ 11:40 ހާއިރެވެ.
އެންއައިސީގެ ތިން މެމްބަރަކުވަނީ ކުޅުދުއްފުށްޓަށް ގޮސް އެ ސީންގައި ހަރަކާތްތެރިވެފައެވެ. އަދި އެ ތަނުން ސާމްޕަލްތައް ނަގައި، އެ ކަމާ ގުޅުންހުރި ބައެއް މީހުންގެ ބަޔާން ވެސް އެ ރަށުން ވަނީ ނަގައިފައެވެ.
އެއް ދުވަހަށް އެންއައިސީގެ ޓީމުން އެ ރަށަށް ކުރި ދަތުރުގެ ތެރެއިން ތަހުގީގަށް ބޭނުންވާ ގިނަ ކަންތައްތަކެއް ހޯދައިފައިވާ ކަމަށް އެންއައިސީގެ އޮފިޝަލަކު މިއަދު "ސަން"އަށް ވިދާޅުވިއެވެ.
"އަޅުގަނޑުމެން ގޮޅީގެ އެކިއެކި ސާމްޕަލްތައް ނަގައިފައިވާނެ. މިހާރު ފޮރެންސިކަަށް ފޮނުވަންޖެހޭ ތަކެތި ފޮރެންސިކަށް ފޮނުވުމުގެ މަސައްކަތް މި ކުރަނީ. ދެން އެކޮޅުން އަޅުގަނޑުމެން ކޮންމެވެސް ވަރަކަށް އިންޓަވިއުކޮށްލިން އެކަން ކޮންމެވެސް ވަރަކަށް އެނގޭ މީހުންނަށް. މި ހަފުތާ ތެރޭ ބަޔާން ނަގަން ޖެހޭ މީހުންގެ ބަޔާންތައް ނެގުމުގެ މަސައްކަތް ފެށުމަށް މި ތައްޔާރުވަނީ،" އެންއައިސީގެ އޮފިޝަލް ވިދާޅުވިއެވެ.
އެންއައިސީއިން ބުނީ މި މައްސަލައިގެ ތަހުގީގު ނިންމޭނެ ވަކި ތާރީޚެއް އަދި ނޭނގޭކަމަށެވެ.
ފައިސަލްއަށް އަދިވެސް ފަރުވާ ދެމުން އަންނަނީ އައިސީޔޫގައެވެ. ޑޮކްޓަރުން އުންމީދު ކަނޑައިލައިފައި ނުވި ނަމަވެސް އޭނާގެ ހާލު ކްރިޓިކަލްއެވެ.
މިމަހުގެ 10 ވަނަ ދުވަހު ނިޝާމާ މަރުވެފައި އޮއްވައި ފެނުނީ އޭނާ ދިރިއުޅެމުންދިޔަ ގޭގެ ކޮޓަރި ތެރެއިންނެވެ. ނިޝާމާ މަރާލި ކަމަށް ފައިސަލްގެ މައްޗަށް ތުހުމަތު ކުރެވޭއިރު، އޭނާ މަސައްކަތް ކުރަނީ، ނޮޅިވަރަމް ފެނަކަ ބްރާންޗްގެ ޓެކްނީޝަނެއްގެ ވަޒީފާގައެވެ.
ނިޝާމާގެ މަރަށް ފަހު އޭނާ ވަނީ ފިލައިގެން ކުޅުދުއްފުއްޓަށް ގޮސްފައެވެ. އޭނާ ހައްޔަރުކުރީ ކުޅުދުއްފުށީ ޕޮލިސް ސްޓޭޝަނަށް އަމިއްލައަށް ދިޔުމުންނެވެ.
ފައިސަލަކީ މަސްތުވާތަކެތި ބޭނުންކުރާ މީހެއްކަމަށް އިތުބާރު ހިފޭ މަސްދަރަކުން "ސަން"ވަނީ ކަށަވަރުކޮށްދީފައެވެ.