ފީފާ ވޯލްޑް ކަޕުގެ ކުއާޓާ ފައިނަލުގައި، "ފަސް ތަރީގެ" ބްރެޒިލް ކަޓުވާލުމަށްފަހު ކްރޮއޭޝިއާއިން މުބާރާތުގެ ސެމީ ފައިނަލަށް ދަތުރުކޮށްފިއެވެ.
މި މުބާރާތް ފަސް ފަހަރަށް ކާމިޔާބު ކޮށްފައިވާ ބްރެޒިލްގެ މައްޗަށް ކްރޮއޭޝިއާއިން ކުރި ހޯދީ ޕެނަލްޓީ ޝޫޓްއައުޓުގައެވެ.
މެޗުގައި 90 މިނެޓުގެ ކުޅުން ހަމަވިއިރު، ދެ ޓީމުންކުރެ ޓީމަކަށް ލަނޑެއް ކާމިޔާބު ނުކުރެވުނު ނަމަވެސް، ބްރެޒިލްއިން ވަނީ ލަނޑުޖަހާނެ ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން 90 މިނެޓުގެ ކުޅުން ހަމަވިއިރު ބްރެޒިލްގެ ކުޅުންތެރިން ހަމަލާއެއް ފޮނުވާލައި، ހަތް ހަމަލާއެއް ގޯލާއި އަމާޒުވާގޮތަށް އޮން ޓާގެޓަށް ފޮނުވާލާފައިވެއެވެ. މި ހަމަލާތައް ހުއްޓުވުމުގައި ކްރޮއޭޝިއާގެ ކީޕަރު، ލިވަކޮވިޗް ވަނީ ހުސިޔާރުކަން ދައްކާފައެވެ.
90 މިނެޓުގެ ތެރޭގައި ލިވަކޮވިޗް އަށް ސޭވް ކޮށްފައިވާއިރު މިއީ، ވޯލްޑް ކަޕުގެ އެއް މެޗުގައި ކްރޮއޭޝިއާގެ ކީޕަރަކު އެންމެ ގިނަ ސޭވް ކުރި އަދަދެވެ.
90 މިނެޓުގެ ކުޅުން ހަމަވިއިރު ކްރޮއޭޝިއާގެ ކުޅުންތެރިންނަށް، އޮން ޓާގެޓަށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ. އެހެންނަމަވެސް ކްރޮއޭޝިއާ ޓީމުން ވަނީ ޑިފެންސިވް މޮޅު ގޭމެއް ކުޅެފައެވެ.
ފުރިހަމަވަގުތުގެ ކުޅުން ހަމަވިއިރުވެސް ދެ ޓީމުންކުރެ ޓީމަކަށް ލަނޑެއް ކާމިޔާބު ނުކުރެވުމުން، ނަތީޖާ ނެރުމަށް އެކްސްޓްރާ ޓައިމްގެ ދެ ހާފު ކުޅުނުއިރު، ބްރެޒިލްއިން ލަނޑު ޖެހީ އިތުރުވަގުތުގ ފުރަތަމަ ހާފުގެ އެންމެފަހު ސިކުންތުކޮޅުގައެވެ.
އިންޑިވިޖުއަލް މޮޅު ކުޅުމަކާއެކު ބްރެޒިލްއަށް މި ލަނޑު ކާމިޔާބު ކޮށްދިނީ ޓީމުގެ ތަރި، ނޭމާއެވެ. މިއީ މެޗުގައި މޮޅު ކުޅުމެއް ދެއްކި ކްރޮއޭޝިއާގެ ކީޕަރު ލިވަކޮވިޗް ކައިރިންވެސް ނައްޓާލުމަށްފަހު ނޭމާ ކާމިޔާބުކުރި ހިތްގައިމު، ރީތި ލަނޑެކެވެ. އަދި މިއީ ނޭމާ މި މުބާރާތުގައި ކާމިޔާބުކުރި ތިންވަނަ ލަނޑެވެ.
ލަނޑު ޖެހުމަށްފަހު ނޭމާ އުފާ ފާޅުކުރަނީ -- ފޮޓޯ/ގެޓީ އިމޭޖަސް
މި ލަނޑާއެކު ނޭމާ ވަނީ، ފުޓުބޯޅައިގެ ތާރީޚުގައި ބްރެޒިލްއަށް އެންމެ ގިނަ ލަނޑު ޖަހައިދީގެން ރެކޯޑު ހަދާފައިވާ އެ ޓީމުގެ ލެޖެންޑް، ޕެލޭގެ ލަނޑު ރެކޯޑާއި އަރައި ހަމަކޮށްފައެވެ. ނޭމާވެސް އަދި ޕެލޭވެސް މިވަނީ ބްރެޒިލްގެ ގައުމީ ޖާޒީގައި ޖުމްލަ 77 ލަނޑު ޖަހާފައެވެ. ޕެލޭ 77 ލަނޑު ޖަހާފައި ވަނީ 92 މެޗު ކުޅެގެންނެވެ. މި އަދަދަށް ނޭމާ ލަނޑު ޖެހީ 124 މެޗު ކުޅެގެންނެވެ.
ކްރޮއޭޝިއާއިން މެޗުގައި ނަތީޖާ ހަމަހަމަ ކުރީ އިތުރުވަގުތުގެ ދެވަނަ ހާފުގެ ކުޅުން ހަމަވާން ތިން މިނެޓަށްވެފައި ވަނިކޮށެވެ. މިއީ ކައުންޓާ އެޓޭކެއްގައި މިސްލާވް އޮރްސިޗް ނަގައިދިން ހުރަހަކުން ވަރަށް ހަމަޖެހިލާފައި ބްރޫނޯ ޕެޓްކޮވިޗް ފޮނުވާލި ބާރު ހަމަލާއެއް، ބްރެޒިލްގެ ކުޅުންތެރިއެއްގެ ގައިގައި ޖެހިފައި، މިސްރާބު ބަދަލުވެގެން ގޮސް ގޯލުގެ ތެރެއަށް ބޯޅަ ވަދެގެން ކްރޮއޭޝިއާއިން ކާމިޔާބު ކުރި ލަނޑެކެވެ.
މިއާއެކު ނަތީޖާ ނެރުމަށް ޕެނަލްޓީ ޖެހިއިރު، ޕެނަލްޓީގައިވެސް ތަފާތަކަށްވީ ކްރޮއޭޝިއާގެ ކީޕަރު ލިވަކޮވިޗެވެ. ލިވަކޮވިޗަކީ ރައުންޑް އޮފް 16 ގައި، ޖަޕާން އަތުން ކްރޮއޭޝިއާ މޮޅުވުމުގައިވެސް އެންމެ އިސް ދައުރެއް އަދާކުރި ކުޅުންތެރިޔާއެވެ. އެ މެޗުގައިވެސް ލިވަކޮވިޗް ވަނީ ދެ ޕެނަލްޓީއެއް ހުއްޓުވާފައެވެ.
ބްރެޒިލްއާއި ކްރޮއޭޝިއާ ބައްދަލުކުރި މެޗުގެ ތެރެއިން-- ފޮޓޯ/ގެޓީ އިމޭޖަސް
މިރޭގެ ޝޫޓްއައުޓުގައިވެސް ލިވަކޮވިޗް އެއް ޕެނަލްޓީއެއް ސޭވްކުރިއިރު ބްރެޒިލްއަށް ނާކާމިޔާބުވި ދެވަނަ ޕެނަލްޓީ އަކީ، މާކީނިއޯސް ގޯލުގެ އަރިމަތީ ދަނޑިއަށް ޖެހި ޕެނަލްޓީއެވެ.
ޕެނަލްޓީގައި ކްރޮއޭޝިއާ ކުރިހޯދީ 2-4 ގެ ނަތީޖާއަކުންނެވެ.
ދެހާސްއަށާރަ ވަނަ އަހަރުގެ ވޯލްޑް ކަޕުގެ ރަނަރަޕްކަން ހޯދި ކްރޮއޭޝިއާއިން މުބާރާތުގެ ސެމީ ފައިނަލުގައި ކުޅެން ޖެހޭނީ މިރޭ އާޖެންޓީނާއާއި ނެދަލެންޑްސް ބައްދަލުކުރާ މެޗުން މޮޅުވާ ޓީމަކާ ދެކޮޅަށެވެ.