ހުޅުމާލޭ ސެންޓްރަލް ޕާކްގައި ސްކޭޓް ކުރުމަށް ޚާއްސަ ކޮށްފައިވާ ސަރަހައްދުގައި ކުޑަކުދިން ރައްކާތެރިކަމުގެ ފިޔަވަޅެއް ނާޅައި ކުޅެން އުޅުމުގެ ތެރޭގައި އަނިޔާވާލެއް ގިނަކަމުން ސްކޭޓް ކުރާ މީހުން ކަންބޮޑުވުން ފާޅުކޮށްފިއެވެ.
ސްކޭޓް ކުރުމަށް ޚާއްސަ ސަރަހައްދުތަކެއް މާލޭގެ އެކި ހިސާބުތަކުގައި ވަނީ ގާއިމްކޮށްފައެވެ. އެގޮތުން، މާލޭ އުސްފަސްގަނޑު ސަރަހައްދާއި، ހުޅުމާލޭގައި ގާއިމްކޮށްފައިވާ ސްކޭޓް ޕާކް ފާހަގަކޮށްލެވެއެވެ. މީގެއިތުރުން ހުޅުމާލެ ސެންޓްރަލް ޕާކުގައިވެސް ސްކޭޓް ކުރުމަށް ޚާއްސަ ސަރަހައްދެއް ގާއިމްކޮށްފައިވެއެވެ.
ނަމަވެސް ސެންޓްރަލް ޕާކަކީ ގިނަ އަދަދެއްގެ އާންމުންނާއި ކުޑަކުދިން ޒިޔާރަތްކުރާ ތަނަކަށް ވުމުގެ ސަބަބުން އެތަނުގައި ސްކޭޓް ކުރަން ފަރިތަކުރާ މީހުންނަށް ވަނީ ދަތިތަކަކާ ކުރިމަތިލާން ޖެހިފައެވެ. ހަވީރު ބޭރަށް ނުކުމެ އެތަނަށް ކުޑަކުދިން އެއްވެ އުޅޭ އިރު ސްކޭޓް ކުރަން ހަދާފައިވާ ރޭމްޕްތަކުގެ މައްޗަށް އެކުދިން އަރައި ކުޅެން އުޅުމުގެ ތެރޭގައި އެ ކުދިންނަށް އަނިޔާ ވާ ކަމަށް އެތަނަށް ފަރިތަކުރަންދާ ސްކޭޓަރުން ބުނެއެވެ.
ސްކޭޓް ކުރާ ރޭމްޕްތަކުގެ މައްޗަށް ރައްކާތެރިކަމުގެ ފިޔަވަޅެއް ނާޅައި ކުދިން އަރައިގެން އުޅުމުގެ ތެރެއިން ވެއްޓި އަތްބިނދުން ފަދަ ހިތާމަވެރި ކަންކަން ހިނގާފައި އެބަހުއްޓެވެ. އެތަނުން ވެއްޓި ކުދިންނަށް އަނިޔާ ވުމަކީ އާއްމު ކަމެކެވެ.
"އިންލައިން ސްކޭޓިން އެސޯސިއޭޝަން" ގެ ފަރާތުން "ސަން" އާ ވާހަކަދެއްކި ސްކޭޓަރު މުހައްމަދު ރިޟްވާން ބުނިގޮތުގައި، ކޮންމެ ދުވަހެއްގެ ހަވީރުވެސް ސެންޓްރަލް ޕާކުގައި ސްކޭޓް ކުރާ ސަރަހައްދަށް ގިނަ އަދަދެއްގެ ކުޑަކުދިން ދެއެވެ. އަދި އެތަނުގައި ދުވެ ކުޅެ ހަދާއިރު ބައެއް ފަހަރު އެކުދިންނަށް އަނިޔާވާ ކަމަށްވެސް އޭނާ ބުންޏެވެ.
ހަވީރު އާންމުކޮށް ކުދިންތައް ގިނަވާ ގަޑިއަކީ. ހަވީރުން ފެށިގެން ރޭގަނޑު 9 ޖަހާއިރުވެސް ބައެއް ފަހަރު ކުދިން އުޅޭނެ ހަމަ. އެތަން ފިޔަވައި ޕާކުގައި ރޭގަނޑު ނުހުރޭ އަލި ގަދަކޮށް ދިއްލާފަ އެހެން ތަނެއް. ދެން ޕޭރެންޓުންވެސް ކުދިން ގޮވައިގެން ތިބޭނެ އެތާ. ފުޓުބޯޅަ ކުޅޭ ކުދިންނާ، ދުވާ ކުދިންނާ ހަމަ ދޫކޮށްލައިގެން ތިބެނީ. ދުއްވާފަ ދާ ގަޑީ ކުރިމަތިން ހިނގައިދާނެ ކުއްޖެއް. އެހެން ކިތަންމެ ފަހަރަކު ކުދިންނަށް އަނިޔާވެސް ވޭ. އުޅޭނެ ހަމަ ތިން އަހަރު ހަތަރު އަހަރު ވަރުގެ ކުދިން. މުހައްމަދު ރިލްވާން، ސްކޭޓާ
ރިލްވާން ބުނީ ކޮންމެ ދުވަހަކު ވެސް މި މައްސަލަ ދިމާވާއިރު، ހުކުރު އަދި ހޮނިހިރު ދެ ދުވަހު އެއްވެސް ވަރަކަށް ސްކޭޓް ނުކުރެވޭ ކަމަށެވެ. އަދި މިކަމުގެ ކަންބޮޑުވުން އެކިފަހަރު މަތީން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ހުށަހަޅާފައިވާ ކަމަށް ވެސް އޭނާ ބުންޏެވެ.
ސެންޓްރަލް ޕާކުގައި ހުންނަ ސްކޭޓް ކުރާ ސަރަހައްދުގައި ކުޑަކުދިން ކުޅެނީ
ސެންޓްރަލް ޕާކަކީ އާންމުންނަށް ހުޅުވާލާފައިވާ ޕާކެއް ނަމަވެސް ޕާކުގެ އެސަރަހައްދު ޚާއްސަ ކޮށްފައިވަނީ ސްކޭޓް ކުރާ މީހުން ފަރިތަކުރުމަށެވެ. ނަމަވެސް ޕާކުގެ އެއްވެސް ސަރަހައްދެއްގައި އެކަން އެނގޭނެ ފަދަ ނިޝާނެއް ނުވަތަ ބޯޑެއް ފެންނާކަށް ނެތެވެ.
މިކަމާ ގުޅިގެން ސުވާލުކުރުމުން އެޗްޑީސީގެ ޕީއާރު އެސިސްޓެންޓް މެނޭޖަރު އަހުމަދު މިމްރާހް "ސަން" އަށް ވިދާޅުވީ އެ ސަރަހައްދާއި ޕާކުގެ އެހެން ސަރަހައްދުތަކުގައި ބޯޑުތަކާއި ނިޝާންތައް ހަރުކޮށްފައި ވާނެ ކަމަށެވެ. އެހެންނަމަވެސް އެތަކެއްޗަށް އާންމުން ގެއްލުން ދިނުމުގެ ސަބަބުން އަބަދު ބަދަލު ކުރަން ޖެހޭ ކަމަށް އޭނާ ވިދާޅުވިއެވެ.
އެގޮތުން، މިހާރުވެސް އެބޯޑުތައް އަލުން ހަރުކުރުމުގެ މަސައްކަތް ކުރިއަށްދާ ކަމަށާއި، މަސައްކަތް ނިމުމުން ނިޝާންތަކާއި ބޯޑުތައް އަލުން ހަރުކުރާނެ ކަމަށްވެސް މިމްރާހް ވިދާޅުވިއެވެ.
އޭނާ ވިދާޅުވީ، ޕާކުގެ އެސަރަހައްދަކީ ސްކޭޓުކުރަން ޚާއްސަކޮށްފައިވާ ސަރަހައްދަކަށް ވީނަމަވެސް، މީގެކުރިންވެސް ކުޑަކުދިން އެތަނުގައި ކުޅެން އުޅޭ މައްސަލަ ފާހަގަވެފައިވާ ކަމަށެވެ. އަދި، އެކަމާމެދު ކަންބޮޑުވުން ފާޅުކޮށް އޭނާ ވިދާޅުވީ، މިކަމަށް އެކަށީގެންވާ ހައްލެން ލިބޭނީ އެފަދަ ކަންތައްތަކާމެދު އާންމުން ހޭލުންތެރިވެގެން ކަމަށެވެ.
އެގޮތުން، ނިޝާން ހަރުކުރި ނަމަވެސް އާންމުން ހޭލުންތެރި ނުވާނަމަ، އެފަދަ ކަންކަމަށް އެދެވޭ ހައްލެއް ނުލިބޭނެ ކަން އޭނާ ފާހަގަކުރިއެވެ.
ކުދިން ގޮވައިގެން ހަވީރު ބޭރަށް ނުކުންނަ ބެލެނިވެރިންވެސް މިކަން ހަނދާން ބެހެއްޓުމަކީ މުހިންމު ކަމެކެވެ. އެފަދަ މާހައުލަކަށް ކުއްޖާ ދޫކޮށްލާއިރު އެ ހުށަހެޅެނީ ނުރައްކަލުގެ ތެރެއަށް ކަން ބެލެނިވެރިން ދަންނަން ޖެހެއެވެ.