އިންތިގާލީ އިންސާފުގެ އޮމްބަޑްސްޕާސަންގެ އޮފީހުގެ މުއްދަތު އަންނަ އަހަރުގެ ނޮވެމްބަރު މަހުގެ 17ވަނަ ދުވަހުގެ ނިޔަލަށް ރައީސް އިބްރާހީމް މުޙައްމަދު ޞާލިޙް މިއަދު އިތުރުކުރައްވައިފިއެވެ.
އިންތިގާލީ އިންސާފުގެ އޮމްބަޑްސްޕާސަންގެ އޮފީހުގެ މުއްދަތު ހަމަވާނީ އަންނަ މަހުގެ 17ވަނަ ދުވަހަށެވެ.
ރައީސް އޮފީހުން ބުނީ މި މުއްދަތު އިތުރު ކުރަން ރައީސް ނިންމެވީ، އެ އޮފީހުން ތަހުގީގު ކުރަމުންދާ ބައެއް މައްސަލަތައް ފުރިހަމަ ކުރުމަށް މި މުއްދަތު އިތުރުކޮށްދޭން އެ އޮފީހުން އެދުމުން ކަމަށެވެ.
އިންތިގާލީ އިންސާފުގެ އޮމްބަޑްސްޕާސަންގެ އޮފީސް އެކުލެވިގެންވާ ގޮތް:
- ޢަބްދުއްސަލާމް ޢާރިފް، އީޓުޖެހިގެ/ ނ. މާފަރު (ޗީފް އޮމްބަޑްސްޕާސަން)
- ޖިހާދާ އަނީސް، ބްލޫރޯޒް/ ގއ. ކަނޑުހުޅުދޫ (އޮމްބަޑްސްޕާސަން)
- މުޞްޠަފާ ޙަމީދު، ކަނީރުމާގެ/ރ.އަނގޮޅިތީމު (އޮމްބަޑްސްޕާސަން)
އިންތިގާލީ އިންސާފުގެ އޮފީހުގެ މަގުސަދަކީ ނިޒާމީ ގޮތެއްގައި ރޭވިގެން ހިންގާފައިވާ އަމަލެއްގެ ސަބަބުން މީހެއްގެ އިންސާނީ ހައްގެއް ހިފެހެއްޓިފައިވާ ނަމަ އެކަން ބަލައި، އެ އަމަލުގެ ޝިކާރައަކަށްވި ފަރާތަށް ބަދަލު ލިބިދިނުމެވެ. އެގޮތުން 1953 ޖަނަވަރީ އިން ނޮވެންބަރު 17، 2018 އާ ދެމެދު ހިނގާފައިވާ އެފަދަ މައްސަލަތައް އެ އޮފީހަށް ބެލޭނެއެވެ.
އިންތިގާލީ އިންސާފުގެ ގާނޫނުގެ ދަށުން އެ އޮފީސް އުފެއްދީ ޑިސެމްބަރު 17، 2020ގައެވެ.