ރޭ އަލިފާނުގެ ހާދިސާ ހިނގި މ. ނެރުފެހިގޭގައި ހިންގަމުން އައި ގަރާޖަކީ ހުއްދަނެތި ހިންގާ ތަނެއްކަމަށް "ސަން"އަށް އިތުބާރުހުރި ގޮތަކަށް އެނގިއްޖެއެވެ.
ސަންއަށް އެނގިފައިވާ ގޮތުގައި އެތަނުގެ ވެރިފަރާތުން ވަނީ މިދިޔަ އަހަރުގެ ފެބުރުއަރީ މަހު ގަރާޖެއް ހިންގުމަށްޓަކައި ހުއްދައަށް އެދި މާލޭ ސިޓީ ކައުންސިލަށް ފޯމު ހުށަހަޅާފައެވެ. ނަމަވެސް ކައުންސިލުން އެކަމަށް ހުއްދަ ދީފައެއް ނުވެއެވެ.
މ. ނެރުފެހިގޭގައި ގަރާޖު ހިންގިތާ މީގެ ކުރިން ސައިހޮޓަލެއް ހިންގިއިރު ފަހުން ގަރާޖެއް ހަދައިގެން ހިންގާތާ ދެއަހަރަށްވުރެ ގިނަ ދުވަސް ވެދާނެއެވެ. މާލެ ސިޓީ ކައުންސިލުން އެތަނުގައި ގަރާޖެއް ހެދުމަށް ހުއްދަ ދީފައިނުވަނީ މީހުން ދިރިއުޅުމަށް ދޫކޮށްފައި ހުންނަ ގޯތީގައި ގަރާޖުފަދަ ވޯކްޝޮޕްތައް ހަދައިގެން ހިންގުމަކީ މަނާކަމަކަށް ވާތީއެވެ.
މީގެ ކުރިން "ސަން"އަށް މައުލޫމާތު ދެމުން ގަރާޖުގެ ވެރި ފަރާތުން ބުނީ އަލިފާން ރޯވީ އެގޭގައި ބިދޭސީން ދިރިއުޅޭ ބަޔަށް ވަންނަ އިރު ހުންނަ ލަކުޑި ސިޑި ކައިރީގައި ކަމަށް ބެލެވޭކަމަށެވެ.
އެ ހާދިސާ ހިނގި ވަގުތު ގަރާޖު ބަންދުކުރުމަށް ފަހު އޭނާ ހުރީ ހުޅުމާލޭގައި ކަމަށާއި، އަލިފާން ރޯވާން މެދުވެރިވިކަމަށް ޝައްކު ކުރެވެނީ ބިދޭސީން ދިރިއުޅޭ ބައިން ކަމަށްވެސް އޭނާ ބުންޏެވެ. ގަރާޖުގެ ވެރި ފަރާތުން މައުލޫމާތު ދިން ގޮތުގައި، ގަރާޖު ބަންދު ކުރުމަށް ފަހު އޭނާ ހުޅުމާލެ ދިޔައީ އާދައިގެ މަތީން މެއިން ބްރޭކަރުން ކަރަންޓު ދުއްވާލުމަށްފަހުއެވެ.
އޭނާ ބުނީ ރޭގެ ހާދިސާ ހިނގި ވަގުތު ގަރާޖު ތެރޭގައި ދެ ޕިކަޕު އޮންނާނެ ކަމަށާއި، ގަރާޖުގައި ބޭނުންކުރާ ސާމާނުތަކާއެކު ގާތްގަނޑަކަށް ހަތް ލައްކައެއްހާ ރުފިޔާގެ ގެއްލުން ވެފައިވާ ކަމަށެވެ.