ސަރުކާރާއި ރައްޔިތުން ހިއްސާވާ ޓޫރިޒަމް ކުންފުނި މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)އަށް މިއަހަރުގެ ތިން ވަނަ ކުއާޓަރުގައި ސާފު ފައިދާގެ ގޮތުގައި 11.6 މިލިއަން ރުފިޔާ ލިބިއްޖެއެވެ.
މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަނުން ނެރެފައިވާ އެކުންފުނީގެ މިއަހަރުގެ ތިންވަނަ ކުއާޓަރުގެ މާލީ ބަޔާނަށް ބަލާއިރު، މި މުއްދަތުގެ ތެރޭގައި އާމްދަނީގެ ގޮތުގައި ލިބިފައިވަނީ 28 މިލިއަން ރުފިޔާއެވެ. މިއަހަރުގެ ދެވަނަ ކުއާޓަރުގައި އެމްޓީޑީސީއަށް އާމްދަނީގެ ގޮތުގައި ލިބިފައިވަނީ، 27.7 މިލިއަން ރުފިޔާއެވެ.
ނިމިދިޔަ ކުއާޓަރުގައި އެމްޓީޑީސީއަށް ޖުމްލަ ފައިދާގެ ގޮތުގައި 12.9 މިލިއަން ރުފިޔާ ލިބިފައިވާއިރު، ޓެކްސްއަށް ކެނޑުމުގެ ކުރިން ފައިދާގެ ގޮތުގައި ލިބިފައިވަނީ، 13.5 މިލިއަން ރުފިޔާއެވެ.
އެމްޓީޑީސީގެ ތިންވަނަ ކުއާޓަރުގެ ބެލެންސްޝީޓަށް ބަލާއިރު، އެކުންފުނިން ދަރަނީގެ ގޮތުގައި ސަރުކާރަށް ދައްކަންޖެހޭ 208.2 މިލިއަން ރުފިޔާ އެބައޮތެވެ. އަމިއްލަ ވިޔަފާރިތަކަށް ދައްކަންޖެހޭ ދަރަނީގެ އަދަދު އުޅެނީ، 62.6 މިލިއަން ރުފިޔާގައެވެ.
އެމްޓީޑީސީއަކީ ފަތުރުވެރިކަމުގެ މަންފާ ސީދާ ގޮތެއްގައި ދިވެހި ރައްޔިތުންނަށް ފޯރުކޮށްދިނުމުގެ ގޮތުން ސަރުކާރުން 2006 ވަނަ އަހަރު އުފެއްދި ކުންފުންޏެކެވެ. އެމްޓީޑީސީ ވުޖޫދަށް އައިތާ 16 އަހަރު ވީއިރުވެސް ކުންފުނި އުފެއްދި ހަގީގީ މަގުސަދު ހާސިލްވަމުން ނުދާކަމަށް ކުންފުނީގެ އާއްމު ހިއްސާދާރުން ފާހަގަ ކުރެއެވެ.
އެމްޓީޑީސީ ވުޖޫދަށް އައުމާއެކު، އަށް ރަށެއް ރިސޯޓުގެ ގޮތުގައި ތަރައްގީކުރުމަށާއި ސިޓީ ހޮޓަލެއް އެޅުމަށް އެ ކުންފުންޏާ އޭރުގެ ސަރުކާރުން ހަވާލުކުރިއެވެ. ނަމަވެސް މިހާތަނަށް އެ ކުންފުނިން ހިންގަމުން އަންނަނީ ދެ ރިސޯޓެކެވެ.
އެމްޓީޑީސީން މިހާތަނަށް ކުރި ވިޔަފާރީގެ ތެރެއިން އެންމެ ބޮޑު ގެއްލުމަކާ ކުރިމަތިލާން ޖެހުނު އެއް ވިޔަފާރިއަކީ އައްޑޫ ސިޓީ ހެރެތެރެ ރިސޯޓެވެ. ހެރެތެރެ ރިސޯޓުން އެމްޓީޑީސީއަށް ވަނީ 30 މިލިއަން ޑޮލަރުގެ ގެއްލުމެއް ލިބިފައެވެ. މީގެ އިތުރުން އެމްޓީޑީސީން ހއ. އުލިގަމުގައި ތަރައްގީކުރަން މަސައްކަތްކުރި ސިޓީ ހޮޓަލުގެ މަސައްކަތް ވެސް ވަނީ 2010 ވަނަ އަހަރު ހުއްޓާލާފައެވެ.
އެމްޓީޑީސީގެ ވިޔަފާރިއަށް ބަލާއިރު މިހާރު ކުރިއަށްގެންދާ އެންމެ މުހިއްމު މަސައްކަތަކީ ހދ. ނާގޯށި ރިސޯޓެއްގެ ގޮތުގައި ތަރައްގީކުރުމުގެ މަސައްކަތެވެ.
އެމްޓީޑީސީއަށް މަންފާ ލިބޭގޮތަށް ހިންގަމުން އަންނަ ދެ ރިސޯޓަކީ ކިހަވައްހުރަވަޅި (އަނަންތަރާ ކިހަވައް) ރިސޯޓާއި މަގޫދުވާ (އަޔާޑާ މޯލްޑިވްސް) ރިސޯޓެވެ.