ނައިޖީރިއާގައި ފެންބޮޑުވުމުގެ ސަބަބުން 603 މީހުން މަރުވެއްޖެއެވެ.
ނައިޖީރިއާއަށް ކުރަމުންދާ ވިއްސާރައިގެ ސަބަބުން ގިނަ ބައެއްގެ ގެތަކަށް ގެއްލުން ލިބި، އެތައް ބަޔަކު ވަނީ އެހެން ސަރަހައްދުތަކަށް ބަދަލުކޮށްފައެވެ.
އެގޮތުން 1.3 މިލިއަން މީހުން އެކި ސަރަހައްދުތަކަށް ބަދަލުކޮށްފައިވާކަމަށް ނައިޖީރިއާގެ އިދާރާތަކުން މައުލޫމާތު ދެއެވެ.
ނައިޖީރިއާގެ 36 ސްޓޭޓުގެ ތެރެއިން 33 ސްޓޭޓުގައި ދިރިއުޅޭ މީހުންނަށް ވިއްސާރައިގެ އަސަރުކޮށްފައިވާއިރު، 3،400 ސްކޮޔާ ކިލޯމީޓަރުގެ ސަރަހައްދެއްގައި ފެންބޮޑުވެފައިވާ ކަމަށް އެ ގައުމުން ބުނެއެވެ.
ނައިޖީރިއާގެ އިދާރާތަކުން މި ކާރިސާގެ ސަބަބުން ގެއްލުން ލިބިފައިވާ އާންމުންނަށް އެހީވުމުގެ މަސައްކަތް އިތުރަށް ފުޅާކުރެއްވުމަށް އިރުޝާދުދެއްވާފައިވާކަމަށް އެ ގައުމުގެ ރައީސް މުޙައްމަދު ބުޚާރީ ވަނީ ވިދާޅުވެފައެވެ.
ނައިޖީރިއާގައި މޫސުމާގުޅިގެން ފެންބޮޑުވުމަކީ އާންމު ކަމެކެވެ. ނަމަވެސް މި އަހަރުގެ ފެންބޮޑުވުމަކީ ފާއިތުވި 10 އަހަރު ނައިޖީރިއާއާ ކުރިމަތިވި އެންމެ ބޮޑު އެއް ކާރިސާއެވެ.
ނައިޖީރިއާއިން ވަނީ މި ކާރިސާ އުފެދެން މެދުވެރިވި ސަބަބަކީ ނައިޖާ ކޯރުގައި ކެމެރޫން އިން ހަރުކޮށްފައި ހުންނަ ޑޭމް އިން ގިނަ ފެން ބޭރުކުރުންކަމަށް ބުނެފައެވެ. އަދި ކުރިއަށްވުރެ ގިނައިން މި އަހަރުގެ ވިއްސާރަ މޫސުމުގައި ވާރޭ ވެހުމަކީވެސް މި ކާރިސާ އިތުރަށް ގޯސްވުމަށް މެދުވެރިވި ކަމެއްގެ ގޮތުގައި އެ ގައުމުން ވަނީ ސިފަކޮށްފައެވެ.