ދ. ކުޑަހުވަދޫގައި 2012 ވަނަ އަހަރުގެ ޖެނުއަރީ މަހުގެ ތެރޭގައި ރަހުމުކުޑަ ގޮތަކަށް މަރާލި އެރަށު ސަމަންދަރުގޭ، އަލީ ހަސަން، 76، (އައްޔުބެ)ގެ މަރުގެ މައްސަލައިގައި މީގެ ނުވަ އަހަރު ކުރިން ހައްޔަރުކުރި ކުޑަކުއްޖަކަށް ހަތަރު އަހަރުގެ ޖަލު ހުކުމެއް އިއްވައިފިއެވެ.
އައްޔުބެގެ މަރުގެ މައްސަލައިގައި އުފުލި ދައުވާގައި ބުނެފައިވަނީ ޖެނުއަރީ 8، 2012 ވަނަ ދުވަހުގެ ރޭ 7:00 އެހާކަންހާއިރު ކުޑަހުވަދޫ ޕްރީ ސްކޫލާ އިންވެގެން، ހުޅަނގަށް އޮންނަ ތުނޑި މިސްކިތްމަގުން އައްޔުބެ ހިނގާފައި ދަނިކޮށް ބަޔަކު އޭނާއަށް ފާރަލާން ފެށި ކަމަށެވެ. އަދި އޭގެ ފަހުން އެ މީހުން އައްޔުބެއަށް ވަޅިން ހަމަލާދީ، އެ މަގުގައި ހުންނަ ހުދު އަލި ކިޔާ ފަޅު ގޯއްޗަކަށް ވެއްދުމަށްފަހު ގައިގެ އެކި ތަންތަނަށް ވަޅިން ހަމަލާދީ ބޮޑެތި ޒަހަމްތަކެއް ކޮށް އައްޔުބޭ މަރާލި ކަމަށް ދައުވާގައި ބުނެފައިވެ އެވެ.
އެ މައްސަލައިގައި ހަ މީހަކަށް ދައުވާ ކުރި އެވެ. އޭގެ ތެރެއިން 18 އަހަރުން ދަށުގެ ތިން ކުއްޖަކު ހިމެނުމުން އެ ކުދިންގެ މައްސަލަ ކުރިއަށްގެންދިޔައީ ޖުވެނައިލް ކޯޓުގަ އެވެ. އެ ތިން ކުދިންގެ ތެރެއިން މައްސަލަ ސާބިތުވީ ދެކުއްޖެއްގެ މައްޗަށެވެ. އެތަނުން އެއް ކުއްޖަކަށް ކުރި ހުކުމް މަތީ ކޯޓުން ވަނީ ބާތިލް ކޮށްފައެވެ. އެއީ ކުށަށް އިއުތިރާފްވުމަށްފަހު އެކަމަށް އިންކާރު ކުރި ކުއްޖެކެވެ.
އައްޔުބޭގެ މަރާ ގުޅިގެން ގަސްތުގައި މީހަކު މަރާލުމުގައި ބައިވެރިވުމުގެ ކުށުގެ ދައުވާ ސާބިތުވާ ކަމަށް މީގެ ކުރިން ޖުވެނައިލް ކޯޓުން ނިންމާފައިވާ ކުއްޖެއްގެ މައްޗަށް މިދިޔަ މަހުގެ 31 ވަނަ ދުވަހު ވަނީ އަދަބު ކަނޑައަޅާފައެވެ. އަދަބު ކަނޑައެޅުމުގައި ބަލާފައިވަނީ އޭނާގެ ބައިވެރިވުން އޮތް މިންވަރުގެ މައްޗަށެވެ.
އޭނާގެ މައްޗަށް ކުށް ސާބިތުވި ނަމަވެސް އޭރު ހުކުމް ކޮށްފައި ނުވަނީ އައްޔުބޭގޭ ވާރިސުންގެ ތެރޭގައި 18 އަހަރުން ދަށުގެ ކުއްޖަކު ހުރުމުންނެވެ. އަދި އަދަބު ކަނޑައެޅެންދެން އޭނާ ޖަލުގައި ބަންދުކޮށްފައި ބެހެއްޓުމަށް ވެސް މީގެ ކުރިން ޖުވެނައިލް ކޯޓުން ވަނީ ހުކުމް ކޮށްފައެވެ.
ވާރިސަށް 18 އަހަރު ފުރިފައިވަނީ 2020 ވަނަ އަހަރުއެވެ. އަދި އަހަރެއްހާ ދުވަހު އެ މައްސަލަ ކުރިއަށް ނުގެންދެވިފައި އޮތީ ދައުވާ ލިބޭ ފަރާތުން ހައި ކޯޓުގައި އިސްތިއުނާފް ކޮށްފައިވާތީއެވެ. އެއީ އޭނާގެ މައްޗަށް ކުށް ސާބިތުވާކަމަށް ޖުވެނައިލް ކޯޓުން ނިންމި މައްސަލައެވެ. ހައި ކޯޓުން މައްސަލަ ނިންމާފައިވަނީ މިދިޔަ އަހަރުގެ ނޮވެމްބަރު މަހުގެ 17 ވަނަ ދުވަހުއެވެ.
ހައި ކޯޓުން މައްސަލަ ނިންމުމުން ޖުވެނައިލް ކޯޓުން ވަނީ އަދަބު ކަނޑައެޅުމުގެ އަޑުއެހުންތައް ފަށާފައެވެ. އަދި އޭނާ ޖަލުގައި ހޭދަކޮށްފައިވާ މުއްދަތަށްވުރެ ކުރު ހުކުމެއް އަންނާތީ ޝަރުތު ކުރުމަށްފަހު ވަނީ ބަންދުން ދޫކޮށްލާފައެވެ.
ޖުވެނައިލް ކޯޓުން ހުކުމް ކޮށްފައިވަނީ ހަތަރު އަހަރާއި ތިން މަހާއި ހަ ދުވަހަށް އޭނާ ޖަލަށް ލުމަށެވެ. ނަމަވެސް އެ މައްސަލައާ ގުޅިގެން އޭނާ މީގެ ކުރިން ވަނީ ނުވަ އަހަރާއި 11 މަސް ޖަލުގައި ހޭދަކޮށްފައެވެ. އެހެން ކަމުން އެ މައްސަލައާ ގުޅިގެން ދެން އިތުރަށް އޭނާ ތަންފީޒު ކުރަންޖެހޭ ހުކުމެއް ނެތް ކަމަށް ވެސް ޖުވެނައިލް ކޯޓުން ވަނީ ނިންމާފައެވެ.
އައްޔުބޭގެ މަރުގެ މައްސަލައިގައި ކްރިމިނަލް ކޯޓުގައިވެސް ތިން މީހަކަށް ދައުވާ ކުރި ނަމަވެސް އެ މީހުންގެ މައްޗަށް ދައުވާ ސާބިތު ނުވާ ކަމަށް އެ ކޯޓުން ވަނީ ހުކުމްކޮށްފައެވެ.
އައްޔުބެގެ އާއިލާއަކީ ދ. ގެމެންދޫއިން ކުޑަހުވަދޫއަށް ހިޖުރަ ކުރި އާއިލާއެކެވެ. އޭނާ މަރާލީ އޭނާ ސިހުރުހާހޫރު ހެދި ކަމަށް ބުނާ މައްސަލައަކާ ހެދި އެވެ.