މާފަންނު ސަހަރާ ހުންނަ ސަރަހައްދުގައި ޕާކިން ޒޯނެއް ހަދަން ސަހަރާ ހުސްކުރުމާ ބެހޭ ގޮތުން ސަރުކާރާއި މާލޭ ސިޓީ ކައުންސިލާ ދެމެދުގައި ދެބަސްވުން އުފެދިއްޖެއެވެ.
ސަރުކާރުން ނިންމާފައިވަނީ މާފަންނު ސަހަރާ ހުސްކޮށް އެ ބިމުގައި ޕާކިން ޒޯނެއް ހެދުމަށެވެ. އެ މަސައްކަތަކީ މިނީ ބަހުގެ ދަތުރުތަކަށް ޖާގަ ދިނުމުގެ ގޮތުން މަޖީދީ މަގުގައި ޕާކު ނުކުރެވޭ ގޮތް ހެދުމުން، ޕާކު ކުރުމަށް އިތުރު ޖާގަ ދިނުމުގެ ގޮތުން ކުރެވޭ މަސައްކަތެކެވެ.
"ސަން"އަށް އެނގިފައިވާ ގޮތުގައި މާފަންނު ސަހަރާގައި ޕާކިންޒޯނެއް ހަދައިދިނުމަށް ސަރުކާރުން ވަނީ ސިޓީކައުންސިލުގައި އެދިފައެވެ.
އެކަމާ ގުޅިގެން މާލޭ ސިޓީގެ ޑެޕިއުޓީ މޭޔަރު އަހުމަދު ނަރީޝް މިއަދު "ސަން"އަށް ވިދާޅުވީ މާފަންނު ސަހަރާގައި ޕާކިން ޒޯނެއް ހެދުމަށް އިސްލާމިކް މިނިސްޓްރީގެ ހުއްދައަކަށް އެދިފައިވާނެ ކަމަށެވެ.
"އިސްލާމިކް މިނިސްޓްރީން ބުނީ ވަކި އުސޫލުތަކެއްގެ މަތިން ސަހަރާ ހުސްކުރުމުގެ ހުއްދަ އެބައޮތް ކަމަށް. އެއީ އެކްސްކެވޭޓަރެއް ބޭނުންނުކޮށް ހަމައެކަނި އުދަލިން ކޮނެގެން ވެއްޔާއި ކަށިތައް ވަކިކޮށް ކޮތަޅަކަށް އެ ކަށިތައް އަޅައިގެން އެކަން ކުރަން،" ނަރީޝް ވިދާޅުވިއެވެ.
ނަރީޝް ވިދާޅުވީ އެ ހުއްދަ ލިބުމާއެކު އެ އުސޫލުތަކުގެ މަތިން މާފަންނު ސަހަރާ ހުސްކޮށްދިނުމަށް ސަރުކާރުގައި އެދިފައިވާނެ ކަމަށެވެ.
ހަމައެއާއެކު އެތަން ހުސްކުރުމަށް ފަހު އެ ސަރަޚައްދުގައި ޕާކިން ޒޯނެއް އެޅުމުގެ މަސައްކަތް ސިޓީ ކައުންސިލުން ކުރިއަށް ގެންދާނެ ކަމަށް ވެސް ނަރީޝް ވިދާޅުވިއެވެ.
އޭނާ ވިދާޅުވި ގޮތުގައި ޕާކިން ޒޯނު ހެދުމުގެ މަސައްކަތް ސިޓީ ކައުންސިލުން ކުރި ނަމަވެސް އެ ޕާކިން ޒޯނު ހެދުމަށް ބޭނުންވާ ސަރަހައްދު ހުސްކުރުމަކީ އެ ކައުންސިލުގެ ޒިންމާއެއް ނޫނެވެ.
ޕާކިން ޒޯނެއް ހެދުމަށްޓަކައި މާފަންނު ސަހަރާއިން ބެނުންކުރަން ނިންމާފައި ވަނީ ވަކި ސަރަހައްދެކެވެ. ނަމަވެސް އެއީ ކިހާ ބޮޑުމިނެއްގެ ސަރަހައްދެއް ކަމެއް އަދި ސާފެއް ނުވެއެވެ.