އޭޝިއާގެ އެންމެ މުއްސަނދި މީހާ، ގައުތަމް އަދާނީ އަކީ މިހާރު ދުނިޔޭގެ ތިން ވަނައަށް އެންމެ މުއްސަނދި މީހާއަށް ވެއްޖެއެވެ.
ބްލޫމްބާގްގެ ބިލިއަނާސް އިންޑެކްސް ބުނާގޮތުން މިވަގުތު ދުނިޔޭގެ އެންމެ މުއްސަނދި މީހާއަކީ ޓެސްލާގެ ސީއީއޯ އީލޯން މަސްކްއެވެ. ދެވަނައިގައި އޮތީ އެމެޒޯންގެ ފައުންޑާ ޖެފް ބޭޒޯސްއެވެ.
އިންޑިއާގެ އަދާނީގެ މިލްކިއްޔާތުގައި މިހާރު ގާތްގަނޑަކަށް 137 ބިލިއަން ޑޮލަރު ހުރި ކަމަށް ބެލެވެއެވެ.
ދުނިޔޭގެ އެހެން ބިލިއަނަރުން ފަދައިން, ކޮވިޑްގެ ތެރޭގައި އަދާނީގެ މުއްސަނދިކަން ވެސް ވަނީ އިތުރުވެފައެވެ.
އަދާނީ ގްރޫޕަކީ ބަނދަރުތަކާއި އެއާސްޕޭސްއިން ފެށިގެން ސޯލާ އެނާޖީ އާއި ކޯލްއާ ހަމައަށް އެކި ކުންފުނިތައް ކޮންޓްރޯލް ކުރާ ކުންފުންޏެކެވެ.
އިންޑިއާގެ މަހުޖަނު މުކޭޝް އަމްބާނީ ފަހަތަށް ޖައްސާލައި އޭޝިއާގެ އެންމެ މުއްސަނދި މީހާގެ ގޮތުގައި އަދާނީވީ ފެބްރުއަރީ މަހުއެވެ.
ބޮޑުވަޒީރު ނަރެންދުރާ މޯދީއާ ގާތް ގުޅުމެއް އޮންނަ އަދާނީ އަންނަނީ އިންޑިއާގެ އެތެރޭގައި އެކި ގޮތްގޮތުން ވެސް އޭނާގެ ޕްރޮފައިލް މަތިކުރަމުންނެވެ.
މިދިޔަ ހަފުތާގައި އޭނާ ވަނީ ނުފޫޒުގަދަ ބްރޯޑްކާސްޓަރެއް ކަމަށްވާ ނިއު ދިއްލީ ޓެލެވިޒަން (އެންޑީޓީވީ) ގަތުމުގެ މަސައްކަތް ވެސް ފަށައިފައެވެ. އޭގެ ސަބަބުން އިންޑިއާގެ އެންމެ އިޙްތިރާމް ލިބިގެންވާ އެއް ނިއުސް ނެޓްވޯކް ކަމަށްވާ އެންޑީޓީވީއަށް ކުރިމަގުގައި އެޑިޓޯރިއަލް މިނިވަންކަން ލިބުމާމެދު ވަނީ ނުތަނަވަސްކަން އުފެދިފައެވެ.