އުރީދޫން ކޮންމެ އަހަރަކު ކުލަގަދަކޮށް ކުރިއަށް ގެންދާ "އުރީދޫ ކަލާ ރަން"ގެ ބަދަލުގައި މިއަހަރު އިތުރު މަޖާ ހަރަކާތްތަކަކާއެކު ބާއްވަން ހަމަޖެހިފައިވާ "އުރީދޫ ފަން ރަން" އަންނަ ޑިސެމްބަރު މަހުގެ 23ވަނަ ދުވަހު ބާއްވަން ހަމަޖެހިފައިވާކަމަށް އެ ކުންފުނިން ބުނެފިއެވެ.
އުރީދޫގެ މެނޭޖިން ޑިރެކްޓަރު އަދި ސީއީއޯ ޙާލިދް އަލް ހަމާދީ ވިދާޅުވީ މިއީ ރާއްޖޭގައި ބޭއްވޭ އެންމެ އުފާވެރި ރަން ކަމަށެވެ. އަދި އުރީދޫގެ އާ ޓެގްލައިން "އަޕްގްރޭޑް ޔޯ ވޯލްޑް" އާއެކު، އެ ކުންފުނީގެ ޕްރޮޑަކްޓްތަކާއި، ޚިދުމަތްތަކާއި، އިވެންޓްތައް ވެސް އާ ހަރުފަތަކަށް ގެންދިއުމަށް މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
އޭނާ ވިދާޅުވީ އުންމީދުކުރަނީ "އުރީދޫ ފަން ރަން"ގައި ބައިވެރިވެ އިތުރު މީހުން ދުވުންފަދަ ހަރަކާތްތަކަށް ޝައުގުވެރިކަން އިތުރުވުންކަމަށެވެ.
"މިއަދު، މުޖުތަމަޢު އެއްވެގެން ބާއްވާ އިވެންޓްތަކާ ދުރުގައި ގިނަ ދުވަސްތަކަކަށްފަހު، އުރީދޫ ކަލާ ރަން އަޕްގްރޭޑްކޮށް، އުރީދޫ ފަން ރަން އިއުލާންކޮށް، ރީލޯންޗްކުރުމަކީ، އަޅުގަނޑުމެންނަށް ލިބޭ ވަރަށް ބޮޑު އުފަލެއް. އުރީދޫ ފަން ރަން ވެގެންދާނީ ރާއްޖޭގައި ބާއްވާ އެންމެ އުފާވެރި ރަން އަށް. މި ރަންގައި އާއިލާ ތަކާއި އެކި އުމުރުފުރާތަކުގެ ރަހުމަތްތެރިންނަށް ވެސް ބައިވެރިވެ އުފާވެރި ވަގުތުކޮޅެއް ހޭދަކޮށްލެވޭނެ،" އޭނާ ވިދާޅުވިއެވެ.
އުރީދޫން ބުނީ ފަން ރަންގެ އަމާޒަކީ، ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުން ކަމަށެމެވެ. ތަފާތު ހަރަކާތްތަކެއް ހިމެނޭ މި ދުވުމަކީ ފަސް ކިލޯމީޓަރުގެ ކުރު ދުވުމެކެވެ. އަލަށް ދުވާ މީހުންނާއި އާއްމުކޮށް ދުވާ މީހުންނަށް ވެސް މި އިވެންޓުގައި ބައިވެރިވެވޭނެއެވެ.
އުރީދޫ ފަން ރަންގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި ކުލަގައިގެ އިތުރުން ފެން އަދި މަޖާ ހަރަކާތްތަކެއް ކުރިއަށްދާނެއެވެ.