ސުކޫލުތަކުގެ ތެރޭގައި ނަމާދު ކުރުން އެއީ ހަރުކަށިކަމެއް ކަމުގައި ނުދެކޭކަމަށާއި ނަމާދުކުރުމަކީ ސުކޫލުތަކުން ބާރުއަޅާނެކަމެއް ކަމަށް އެޑިއުކޭޝަން މިނިސްޓަރު ޑރ. ޢާއިޝަތު ޢަލީ މިއަދު ވިދާޅުވެއްޖެއެވެ.
''ހަފްތާރެސް''ގެ ނަމުގައި ސަރުކާރުން އަތޮޅުތަކުގައި ހިންގަމުންދާ ޕްރޮގުރާމެއްގައި ސުކޫލް ދަރިވަރުން ނަމާދަށް ގަޑިއަށް އަރާނަމަ އެއީ ހަރުކަށި ފިކުރަށް ތަބާވުމުގެ އަމަލެއްކަމަށް މައުލޫމާތު ދީފައިވާކަމުގެ ޚަބަރުތައް ފެތުރިފައިވާތީ މިކަމާއި ގުޅިގެން މިނިސްޓަރު އެއްވެސް ފިޔަވަޅެއް އަޅުއްވާފައިވާނެތޯ މާވަށު ދާއިރާގެ މެންބަރު މުޙައްމަދު ސައީދު މިއަދުގެ މަޖިލީހުގައި ވަނީ ސުވާލުކުރައްވާފައެވެ.
މެންބަރުންގެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ ކަރިކިއުލަމްގެ މައިގަނޑު އަސާސަކީ 'ޕްރެކްޓިސިން އިސްލާމް'' ކަމަށެވެ.
''އަޅުގަނޑުމެންގެ ކަރިކިއުލަމްގެ މައިގަނޑު އަސާސަކީ ޕްރެކްޓިސިން އިސްލާމް. އެހެންވީމާ އަޅުގަނޑުމެން ކަރިކިއުލަމް ތެރެއިން އިސްލާމްދީނަށް އަމަލުކުރާ، ދިވެހި ޤައުމަށް ލޯބިކުރާ، ހުނަރުހުރި، މައުލޫމާތު ހުރި ،ދަރިވަރެއް ބިނާކުރުމުގެ ކަންކަން ކުރަމުން މިދަނީ.'' މިނިސްޓަރު ވިދާޅުވިއެވެ.
އިތުރަށް މިނިސްޓަރު ވިދާޅުވީ ސުކޫލުތަކުގެ ކަންކަން ހަމަޖެހިފައި ހުންނަގޮތުން ސުކޫލުތެރޭގައި ނަމާދު ކުރެވޭނެ އިންތިޒާމް ހަމަޖައްސާފައި ހުންނާނެ ކަމަށާއި މެންބަރު ފާހަގަކުރެއްވި މައްސަލައެއް މިނިސްޓަރަށް އެއްވެސް ފަރާތަކުން ހުށަހަޅާފައި ނުވާ ކަމަށެވެ.
ރ. އަތޮޅުގައި ސަރުކާރުން އިންތިޒާމުކޮށްގެން ޔޫތު މިނިސްޓްރީގެ ދަށުން މިހާރު ކުރިއަށްގެންދާ ''ހަފްތާރެސް'' ޕްރޮގުރާމްގައި ސުކޫލުތަކުގެ ދަރިވަރުން ސުކޫލުގައި ނަމާދުކުރުމަކީ ހަރުކަށި ފިކުރެއްކަމަށް ކިޔާދެމުން އަންނަކަމަށް ބުނެ ފާޑުކިޔުން ވަނީ އަމާޒުވެފައެވެ.