މިނިސްޓްރީ އޮފް ހަޔާ އެޑިއުކޭޝަނުން، ލޯނު ސްކީމަށް ހޮވުނު ކުދިންގެ ދާއިމީ ނަތީޖާ އިއުލާން ކުރިއިރު އިތުރު 59 ދަރިވަރަކަށް ސްޓޫޑެންޓް ލޯނު ޔަގީން ވެއްޖެއެވެ.
މިއަދު ހަޔާ އެޑިއުކޭޝަންގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ޑރ. އިބްރާހީމް ޙަސަން ވިދާޅުވީ ދަރިވަރުންގެ ފޯމުތަކާއި ލޯނާ ބެހޭ ޝަކުވާތައް ދިރާސާ ކޮށްފައިވާކަމަށެވެ.
އެ ދިރާސާތަކަށް ފަހު، އިތުރު 59 ދަރިވަރަކަށް ލޯނު ހަމަޖެއްސި ކަމަށާއި އޭރުން ލޯނު ލިބޭ ދަރިވަރުންގެ ޖުމްލަ އަދަދު 453އަށް އަރާކަމަށް ވެސް މިނިސްޓަރު ވިދާޅުވިއެވެ. އޭގެތެރޭގައި ހިމެނެނީ އަލަށް ކިޔަވަން ފަށާ 379 ދަރިވަރުންނާއި މިހާރު ކިޔަވަމުން އަންނަ 74 ދަރިވަރުންނެވެ.
މިނިސްޓަރު ވިދާޅުވީ ދަރިވަރުން ހުށަހެޅި ޝަކުވާތައް ބަލައި ދިރާސާކުރީ އެކަމަށް ޚާއްޞަކޮށް އެކުލަވާލާފައިވާ އެޕީލް ކޮމިޓީން ކަމަށެވެ.
"ކޮމިޓީން ޝަކުވާތަކަށް ބަލައި ވަކި ގޮތަކަށް ނިންމާފައިވާނަމަ އެ ހާލަތަށް ފެތޭ އެހެން ދަރިވަރުންނަށް ވެސް ލޯނުގެ ފުރުސަތު ދިނިން،" އޭނާ ވިދާޅުވިއެވެ.
މިފަހަރު ލޯނު ދިންއިރު އިސްކަން ދީފައި ވަނީ މާލީ ގޮތުން ތަނަވަސްކަން ނެތް ދަރިވަރުންނަށެވެ.
އާންމު އުސޫލެއްގެ ގޮތުން، ރާއްޖޭގައި ހެދޭ ކޯސްތައް ރާއްޖެއިން ބޭރުން ހަދަން ލޯނު ސްކީމުގެ ދަށުން ފުރުސަތު ނުދޭ ނަމަވެސް އެމްބީބީއެސް އާއި ޕައިލެޓްކަމުގެ ދާއިރާއިން މީހުން ބިނާކުރުމަށް ސަރުކާރުން ޚާއްޞަ އިސްކަމެއް ދޭތީ، އެ ދެ ދާއިރާއިން ލޯނު ސްކީމަށް އެދުމުގެ ފުރުސަތު މިފަހަރު ވެސް ހުޅުވާލިއެވެ.