ފ. އަތޮޅު ހޮސްޕިޓަލުގައި މުޅިން އަލަށް ލޮލުގެ ފަރުވާދޭ ޑިޕާޓުމެންޓެއް ގާއިމުކޮށް ރަސްމީކޮށް އެ ޚިދުމަތް ދޭން ފަށައިފިއެވެ.
އެ ހޮސްޕިޓަލުގެ މެނޭޖަރު އިބްރާހީމް ޚަލީލު "ސަން" އަށް ވިދާޅުވީ ލޮލުގެ ފަރުވާ ރަސްމީކޮށް ދޭން ފެށީ އިއްޔެ ކަމަށެވެ.
"ހޮސްޕިޓަލް ތެރޭގައި ހުރި ތަނަކަށް ބަދަލުތަކެއް ގެނެސްގެން ލޮލުގެ ފަރުވާދޭ ޑިޕާޓެމެންޓެއް އިމާރަތް ކުރަން ފެށީ 2020 ވަނަ އަހަރު،" އޭނާ ވިދާޅުވިއެވެ.
ޚަލީލު ވިދާޅުވީ ކޮވިޑުގެ ބަލިމަޑުކަމުގެ ސަބަބުން ފިއްތުންތަކެއް ކުރިމަތިވި ކަމަށާއި އެ މުއްދަތުގެ ތެރޭގައި ހެލްތު މިނިސްޓްރީގެ ހިޔާލު ވެސް ހޯދިކަމަށެވެ.
"މިދިޔަ ދުވަސްތައް މިދިޔައީ ހެލްތު މިނިސްޓްރީގެ ޚިޔާލު ހޯދައި އިކިއުޕްމެންޓްސް ހޯދުމުގައި،" މެނޭޖަރު ވިދާޅުވިއެވެ.
ފ. އަތޮޅު ހޮސްޕިޓަލްގެ ލޮލުގެ ފަރުވާދޭ ޑިޕާޓްމަންޓް ހުޅުވުމުގެ ރަސްމިއްޔާތުގެ ތެރެއިން
މިދިޔަ އަހަރުގެ ޑިސެންބަރު 16 ވަނަ ދުވަހު ބޭއްވި ފ. އަތޮޅު ހޮސްޕިޓަލުގެ އަހަރީ ދުވަހުގެ ރަސްމިއްޔާތުގައި ވާހަކަދައްކަވަމުން ހެލްތު މިނިސްޓަރު އަޙްމަދު ނަސީމް ވަނީ އެ ހޮސްޕިޓްލްގައި ލޮލުގެ ފަރުވާދޭން ބޭނުންވާ ކަންކަން ފަހިކޮށްދެއްވާނެ ކަމަށް ވިދާޅުވެފައެވެ.
"ހުރިހާ ކަމަކަށް ސަރުކާރަށް ޑިޕެންޑު ވާން ބޭނުން ނުވެގެން ހޮސްޕިޓަލުގަ އޮންނަ ރެކްރިއޭޝަން ކުލަބާ ގުޅިގެން އަޅުގަނޑުމެން މަސައްކަތް ފެށީ މިތަނަށް ބޭނުންވާ މެޝިނަރީ އާއި އިކުއިޕްމެންޓްސް ހޯދަން،" ޚަލީލު ވިދާޅުވިއެވެ.
ލޮލުގެ ފަރުވާދޭ ޑިޕާޓްމަންޓަށް ބޭނުންވާ ތަކެތި ހޯދައި ރެކްރިއޭޝަން ކްލަބުން އެތަކެތި ހޮސްޕިޓަލަށް ހަދިޔާކުރީ މިދިޔަ މާޗު މަހުގައެވެ.
ހެލްތު މިނިސްޓްރީން ވަނީ ފ. އަތޮޅު ހޮސްޕިޓަލަށް ލޮލުގެ ޚާއްސަ ޑޮކްޓަރަކު ވެސް ހަމަޖައްސާފައެވެ.
"މި ޚިދުމަތުގެ ސަބަބުން ފ. ނިލަންދޫގެ ރައްޔިތުންނަށް އަމިއްލަ ރަށުން ލުއި ފަސޭހަތަކެއް ލިބޭނެ،" އޭނާ ވިދާޅުވިއެވެ.
އާންމުކޮށް ލޮލުގެ ފަރުވާދޭ ހުރިހާ ކްލިނިކްތަކުން ދޭ ޚިދުމަތްތައް ފ. އަތޮޅު ހޮސްޕިޓަލު ގައި ހުޅުވި ލޮލުގެ ފަރުވާދޭ ޑިޕާޓުމެންޓުން ލިބޭނެއެވެ.