ރެފިއުޖީ ބޯޓެއްގައި ހިނގި އަލިފާނުގެ ހާދިސާއެއްގައި މަރުވި 15 މީހެއްގެ ހަށިގަނޑު ލީބިއާގެ ވެރިރަށް ޓްރިޕޯލީ އާ 70 ކިލޯމީޓަރު ދުރުގައި އޮންނަ ސަބްރާތާގެ އައްސޭރިން ފެނިއްޖެއެވެ.
ލީބިއަން ރެޑް ކްރެސެންޓުން ބުނެފައިވާ ގޮތުގައި މީގެ ތެރެއިން ގިނަ މީހުން ތިބީ ރެފިއުޖީ ބޯޓެއްގައެވެ. އަދި އަނެއްބައި މީހުން ގޮނޑުދޮށަށް ލައްގާފައިވާއިރު، މި އެންމެން މަރުވެފައިވަނީ ރެފިއުޖީ ބޯޓެއްގައި ހިނގި އަލިފާނުގެ ހާދިސާއެއްގެ ސަބަބުން ކަމަށް ވެސް ރެޑް ކްރެސެންޓުން ބުންޏެވެ.
އިންސާނުންގެ ވަގުފާރި ކުރާ ދެ ގުރޫޕެއްގެ ދެމެދުގައި އުފެދިފައި އޮތް މައްސަލަ ގަނޑެއްގައި ތާށިވި މި މީހުންގެ ހަށިގަނޑުތައް ހޮސްޕިޓަލަށް ފޮނުވާފައިވާއިރު، ސަބްރާތާއަކީ އިންސާނުންގެ ވަގުފާރި ފުޅާ ދާއިރާއެއްގައި ކުރާ ސަރަހައްދެކެވެ.
ލީބިއާގެ އާންމުން ރަނގަޅު ފެންވަރެއްގެ ދިރިއުޅުމެއް ހޯދުމަށްޓަކައި ޔޫރަޕަށް މިސްރާބު ޖެހުމަށް ދަތުރު ފަށަނީ ސަބްރާތާއިންނެވެ.
މީސްމީޑިއާގައި ދައުރުވަމުން އަންނަ ބައެއް ފޮޓޯތަކާއި ވީޑިއޯތަކުން ފެންނަ ގޮތުގައި ބޯޓެއްގައި އަލިފާން ރޯވެފައިވާތަން ފެނެއެވެ. އަދި އެ ބޯޓުގައި މީހުން ތިބި މަންޒަރުވެސް ފެނެއެވެ.
އިންޓަނޭޝަނަލް އޯގަނައިޒޭޝަން ފޮ މައިގްރޭޝަނުން ބުނީ، 2022 ވަނަ އަހަރުގެ ފުރަތަމަ ހަ މަސްދުވަހުގެ ތެރޭގައި ލީބިއާއިން ޔޫރަޕަށް ދާން އުޅުނު ރެފިއުޖީންގެ ތެރެއިން 150 މީހުން މަރުވެފައިވާކަމަށް ބެލެވޭކަމަށެވެ.
ދެހާސް އެގާރަ ވަނަ އަހަރު ފެށުނު ދާޚިލީ ހަނގުރާމައިގެ ސަބަބުން ހާލުގައި ޖެހިފައިވާ ލީބިއާގެ އާންމު ރައްޔިތުން ރަނގަޅު ދިރިއުޅުމެއް ހޯދުމަށް ޔޫރަޕަށް މިސްރާބު ޖަހާއިރު، ލީބިއާއަކީ ތެލުގެ މުއްސަނދިކަން ލިބިފައިވާ ގައުމެކެވެ.