ކުރީގެ ރައީސް ޢަބްދުﷲ ޔާމީން އަބްދުލްޤައްޔޫމް، ސައިޒް ކުރާނެ ކަމަށް ބުނެ، އިންޒާރު ދިން މައްސަލަ ފުލުހަށް ހުށަހަޅައިފިއެވެ.
މޯލްޑިވްސް ޔޫތު ފޯސްގެ ނަމުގައި ސޯޝަލް މީޑިއާގައި އާންމު ކުރި ވީޑިއޯއެއްގައި ބުނެފައިވަނީ މީގެ ކުރިން ވެރިކަން ކުރި މީހަކު މި ޤައުމު އިނދަޖައްސާލަން މަސައްކަތް ކުރަމުން އަންނަ ކަމަށެވެ. އަދި ބުނެފައިވަނީ ނަމަވެސް އެކަން އެހެން ވިޔަކަ ނުދޭނެ ކަމަށެވެ. މީގެ އިތުރުން ރާއްޖޭގެ ދިފާއީ ބާރު އޮތީ އެހެން ޤައުމެއްގެ އަތްދަށުވެފައި ކަމަށް ބުނެ ހަދަނީ ވެސް ހުސް ދޮގު ކަމަށް ވީޑިއޯގައި ބުނެއެވެ.
"އަޅުގަނޑުމެންނަނީ މޯލްޑިވްސް ޔޫތް ފޯސް. އަޅުގަނޑުމެން މި ނުކުންނަނީ އޭނާ ސައިޒު ކުރަން،" އެ ވީޑިއޯގައި ބުންޏެވެ.
މި މައްސަލައިގައި ފުލުހުން އަދި މިވަގުތާ ހަމައަށް އެއްޗެއް ބުނެފައި ނުވި ނަމަވެސް އިދިކޮޅުން މިހާރު ވަނީ މައްސަލަ އެ އިދާރާއަށް ހުށަހަޅާފައެވެ.
ޕީޕީއެމުން ބުނީ ރޭގެ ވަގުތެއްގައި ސޯޝަލްމީޑިއާގައި މީހަކު އާއްމުކޮށްފައިވާ ވީޑިއޯއެއްގައި ރައީސް ޔާމީނަށް އިންޒާރުދިން މައްސަލަ ތަހްގީގުކޮށް ދިނުމަަށް އެދި ފުލުހުންނަށް ހުށަހަޅައިފައިވާ ކަމަށެވެ.
ޕީއެންސީގެ ކައުންސިލް މެންބަރު ހަމްދާން ޝަކީލް ވިދާޅުވީ ރައީސް ޔާމީނަށް އިންޒާރު ދިނީ ކުރީގެ ނައިބު ރައީސް އަޙްމަދު އަދީބުގެ މޯލްޑިވްސް ތާޑްވޭ ޑިމޮކްރަޓްސް (އެމްޓީޑީ) ގެ މެންބަރު ހުސެއިން ސައީދު، ކަން ކަށަވަރު ވެއްޖެ ކަމަށެވެ.