ސީލައިފް ގްލޯބަލްގެ މެނޭޖިން ޑިރެކްޓަރު އަޙްމަދު މޫސާ މުޙައްމަދު (އައްމަޓީ)ގެ ހައްޤަށް އުނިކަމެއް އަންނަ އެއްވެސް ކަމެއް ނުކުރުމަށް ސުޕުރީމް ކޯޓުން އަމުރުކޮށްފިއެވެ.
އެފަދަ އަމުރެއް މިއަދު ނެރުނީ ސުޕްރީމް ކޯޓުގައި މިއަދު ބޭއްވި އަޑުއެހުމުގައި އައްމަޓީގެ ފަރާތުން އެދުނު އެދުމުގެ މައްޗަށް ރިއާޔަތްކޮށެވެ. އައްމަޓީގެ ފަރާތުން އެދުނީ އޭނާ ދޫކޮށްލަން ކްރިމިނަލް ކޯޓުން އަމުރުކުރުމުން ޕްރޮސިކިއުޓާ ޖެނެރަލް ހުސައިން ޝަމީމާއި އެ އޮފީހުގެ ބައެއް ވަކީލުން ކޯޓުތަކަށް ފާޑުކިޔާތީ އެފަދަ ކަންކަން ހުއްޓުވައިދިނުމުގެ އަމުރެއް ނެރެދިނުމަށެވެ.
ސުޕްރީމް ކޯޓުން މިއަދު ނެރުނު އަމުރުގައި ވަނީ ޖިނާއީ ކުށެއް ކުރިކަމުގެ ދައުވާ ކުރެވިފައިވާ ކޮންމެ މީހަކީ ވެސް ދައުވާ ސާބިތުވުމާހަމައަށް ކުށެއް ނުކުރާ މީހެއް ކަމަށް ބެލުމުގެ ހައްޤު ލިބިގެންވާ މީހެއް ކަމަށެވެ.
އެގޮތުން އަންމަޓީގެ މައްޗަށް އުފުލާފައިވާ ދައުވާއަކީ ވެސް ސާބިތުވެފައިވާ ދައުވާއަކަށް ނުވުމުން އޭނާގެ ހައްޤަށް އުނިކަން ލިބޭ ކަންކަން ނުކުރުމަށް އެ އަމުރުގައި އަންގާފައިވެއެވެ.
ސުޕްރީމް ކޯޓުގައި މިހާރު ކުރިއަށްދާ މައްސަލައަކީ އަންމަޓީ ބަންދުން ދޫކޮށްލަން ކްރިމިނަލް ކޯޓުން ނިންމި ނިންމުން ހައިކޯޓުގައި އިސްތިއުނާފުކުރުމުން އެ މައްސަލަ ބެލެންނެތް ކަމަށް ނިންމި މައްސަލައެވެ.
ހައިކޯޓުން އެ މައްސަލަ ބޭރުކޮށްލީ އިސްތިއުފާނަށް ހުށަހެޅީ އެކަމަށް ކަނޑައަޅާފައިވާ މުއްދަތު ހަމަވިފަހުން ކަމަށް ބުނެއެވެ.
ފައިސާއަށް ހިޔާނާތްތެރިވި ކަމުގެ ދައުވާ އުފުލާފައިވާ އައްމަޓީ ހައްޔަރުކުރި ފަހުން އޭނާ ދޫކޮށްލުމަށް ކްރިމިނަލް ކޯޓުން ވަނީ ތިން ފަހަރަށް އަމަރުކޮށްފައެވެ. އެންމެ ފަހުން ދޫކޮށްލުމަށް ނިންމީ ޝަރުތުތަކެއް ކުރުމަށްފަހުއެވެ.
އައްމަޓީގެ މައްޗަށް 42 ދައުވާއެއް ވަނީ އުފުލައިފައެވެ. އެ ދައުވާތައް ސާބިތުވެއްޖެނަމަ އޭނާގެ މައްޗަށް 65 އަހަރުގެ ޖަލު ހުކުމެއް ކަނޑައެޅޭނެ ކަމަށް ޕީޖީން ވަނީ ބުނެފައެވެ.