މުސްލިމުންގެ ފުރަތަމަ ޤިބްލަ، ކަމުގައިވާ އަލްމަސްޖިދުލް އަޤުޞާއަށް އިސްރާއީލްގެ ސިފައިން ވަދެގަނެ، ދިން ހަމަލާ، ރާއްޖެއިން ކުށްވެރި ކޮށްފިއެވެ.
އެ ހާދިސާގެ މަންޒަރު ދުށް މީހުންނާ ހަވާލާދީ މިޑްލް އީސްޓްް އައި ނޫހުން ރިޕޯޓުކުރި ގޮތުގައި، އިސްރާއީލް ސިފައިން އަޤްޞާ މިސްކިތް ތެރެއަށް ވަދެގަތީ މިދިޔަ ބުރާސްފަތި ދުވަހުގެ ރޭ ފަތިސް ނަމާދުކޮށް ނިމުނުތާ މާގިނައިރު ނުވަނީސްއެވެ.
އިސްރާއީލުން އަޤުޞާ މިސްކިތަށް ވަދެގަނެ، ދިން ހަމަލާ ތަކުގައި ފަލަސްތީނުގެ 150އަށް ވުރެ ގިނަ މުސްލިމުން ޒަޚަމް ކޮށްލުމަށް ފަހު، އެތަނުން 300އަށް ވުރެ މީހުން ހައްޔަރު ކުރިއެވެ. އަދި މިސްކިތުގެ ކުޑަދޮރުތަކެއް ތަޅައިގެން ގޮސް، ބޮޑެތި ގެއްލުންތަކެއް ވެސް ވަނީ ލިބިފައެވެ.
އިސްރާއީލްގެ މި ލާއިންސާނީ ޖަރީމާ ކުށްވެރި ކުރުމުގެ ގޮތުން ދިވެހި ސަރުކާރުން ނެރުނު ބަޔާނުގައި ބުނެފައިވަނީ އަޤުޞާ މިސްކިތުގައްޔާއި ފަލަސްތީނުގެ ބިންތަކަށް ވެރިވެގަނެގެން އުޅޭ އިސްރާއީލުން ހިންގަމުން އަންނަ އެ އަމަލުތަކަކީ ބައިނަލްއަޤުވާމީ ޤާނޫނުތަކާއި އދ.ގެ މުއާހަދާތަކާ ވެސް މުޅިން ޚިލާފު އަމަލުތަކެއް ކަމަށެވެ.
އިސްރާއީލުން ހިންގަމުން އަންނަ މިފަދަ ޖަރީމާތަކުގެ ސަބަބުން އެ ސަރަހައްދުގެ ސުލްހަ އާއި އަމާންކަން ޤާއިމު ކުރުމަށް ޓަކައި ކުރަމުން އަންނަ މަސައްކަތްތަކަށް ވެސް ހުރަސްތައް ކުރިމަތިވާނެ ކަން އެ ބަޔާނުގައި ފާހަގަ ކޮށްފައިވެއެވެ.
ދިވެި ސަރުކާރުން ނެރުނު ބަޔާނުގައި ވަނީ މިނިވަން ދައުލަތެއް ޤާއިމު ކުރުމަށް ޓަކައި ފަލަސްތީނުގެ ރައްޔިތުން ކުރާ މަސައްކަތަށް، ސަރުކާރުގެ ތާއީދާއި އެއްބާރުލުން އަބަދުވެސް ލިބޭނެ ކަމަށެވެ. އަދި ރާއްޖެ އަބަދުވެސް ދެމި އޮންނާނީ ފަލަސްތީނުގެ މުސްލިމް ރައްޔިތުންނާއެކުގައި ކަމަށް ވެސް އެ ބަޔާނުގައިވެއެވެ.
މިދިޔަ އަހަރުގެ މޭ މަހުގެ ތެރޭގައި ވެސް އިސްރާއީލް ސިފައިން ވަނީ އަޤުޞާ މިސްކިތަށް ގަދަކަމުން ވަދެގަނެ، އެތަނުގައި އަޅުކަން ކުރާން ތިބި މުސްލިމުންނަށް ހަމަލާ ދީފައެވެ. އެ ހަމަލާގައި ފަލަސްތީނުގެ 300އަށްވުރެ ގިނަ މީހުންނަށް އެކި ވަރުގެ އަނިޔާ ލިބިފައި ވެއެވެ.