މިއަދު އަޅުގަނޑު މި ގެނެސްދޭ އާޔަތަކީ ޝައިޠާނާގެ ރޭވުންތެރިކަމާ އަދި ޝައިޠާނާގެ ވަސްވާސްތަކުން ރައްކާތެރިވުމަށް އަންގަވާ ﷲ ސުބުޙާނަހޫ ވަތަޢާލާ ކީރިތި ގުރުއާނުގައި ވަޙީ ކުރައްވާފައިވާ ބަސްފުޅެކެވެ.
ﷲ ތަޢާލާ ވަޙީ ކުރައްވާފައި ވަނީ އޭ އީމާންވެއްޖެ މީސްތަކުންނޭވެ! ޝައިޠާނާގެ ފިޔަވަޅުތަކަށް ތިޔަބައި މީހުން ތަބާނުވާށެވެ. ހަމަކަށަވަރުން ޝައިޠާނާއަކީ ފާޅުވެގެންވާ އަދާވާތްތެރިއެކެވެ. މި ބަސްފުޅުގައި ﷲ ސުބުޙާނަހޫ ވަތަޢާލާ އަންގަވާފައި މިވަނީ ޝައިޠާނާއަކީ އިންސާނުންނަށްވާ އަދާވާތްތެރިއެއްކަމެވެ. އަދި ޝައިޠާނާގެ ވަސްވާސްތަކުން ރައްކާތެރިވުމަށް އަންގަވައި، ޝައިޠާނާގެ ފިޔަވަޅުތަކަށް ތަބާނުވުމަށް އަންގަވާފައިވެއެވެ.
އަޅުގަނޑުމެން ދުނިޔޭގައި އުޅޭއިރު ޝައިޠާނާގެ ވަސްވާސްތައް އިންސާނުންނަށް އެކި ގޮތްގޮތަށް ކުރިމަތިކުރުވައެވެ. މިކަން އަޅުގަނޑުމެން އަބަދުވެސް ދަންނަންޖެހޭނެއެވެ.
ޝައިޠާނާއަކީ އިންސާނާ މަގުފުރެއްދުމަށް ޓަކައި މަސައްކަތްކުރާ އެއްޗެކެވެ. ޝައިޠާނާގެ ވަސްވާސްތަކަށް ނުހެއްލި ދުނިޔޭގެ ދިރިއުޅުން ކާމިޔާބުކުރެވޭތޯ ބަލަންޖެހޭނެއެވެ. މިގޮތުން ޝައިޠާނާ އިންސާނާ މަގުފުރެއްދުމަށް ޓަކައި ތަފާތު ރޭވުންތައް ރާވައި ތަފާތު މަސައްކަތްތައް ކުރެއެވެ.
އެއްގޮތަކުންނޫނީ އަނެއްގޮތަކުން ވެސް އިންސާނާ ހައްލާލާ، ހެޔޮމަގުން އެއްކިބާކުރެވޭތޯ މަސައްކަތްކުރެއެވެ. އެގޮތުން ތަފާތު ޝައްކުތައް އިންސާނާގެ ހިތަށްވައްދައެވެ. އެއީ އަޅުކަންތަކުގައި ވިއަސް ނުވަތަ ދިރިއުޅުމުގައި ދޭދޭފަރުދުންގެ ދެމެދުގައި އޮންނަ ގުޅުންތައް ހީނަރުކޮށް އެ ގުޅުންތައް ގޯސްކުރަން ވެސް ތަފާތު ވަސްވާސްތައްދީގެން ޝައިޠާނާ މަަސއްކަތްކުރާނެއެވެ. އެހެންވީމަ މިކަންކަން އަޅުގަނޑުމެންގެ ހަނދާނުގައި އަބަދުވެސް ބަހައްޓަން ޖެހޭނެއެވެ. އަދި ދުނިޔޭގެ ދިރިއުޅުމަކީ ފަސޭހަކަމެއް ނޫންކަމާއި މި ދިރިއުޅުން ކާމިޔާބުކޮށް އާޚިރަތްވެސް ބާއްޖަވެރިކުރުމަށް ޓަކައި މިދަފަ ހުރަސްތައް ނައްތާލުމަށް އަޅުގަނޑުމެން މަސައްކަތްކުރަން ޖެހޭނެއެވެ.
އެގޮތުން ޝައިޠާނާގެ ކިބައިން ރައްކާތެރިވެވޭނެ ގޮތްތައް ﷲއާ އެކަލާނގެ ރަސޫލާ ވަނީ ދަސްކޮށްދެއްވާ އެ ކަންކަން އަންގަވާދެއްވާފައެވެ. އެގޮތުން ޝައިޠާނާގެ ކިބައިން ރައްކާތެރިވުމަށް ގިނަގިނައިން أَعُوْذُ بِاللّٰهِ مِنَ الشَّيْطٰانِ الرَّجِيْمِ ކިޔަން ވަނީ އަންގަވާފަައެވެ. މި ދުޢާއަކީ ޝައިޠާނާގެ އުނދަގުލުން ރައްކާތެރިކޮށްދެއްވުމަށް ޓަކައި ﷲ ސުބުޙާނަހޫ ވަތަޢާލާގެ ހަޟުރަތުގައި ކުރެވޭ ދުޢާއެކެވެ. ހަމަ އެގޮތުން އިޚްލާޞް، ފަލަޤް، ނާސް މި ތިން ސޫރަތް ކިޔެވުމަކީވެސް ޝައިޠާނާގެ ވަސްވާސްތަކުން ރައްކާތެރިކޮށްދޭނެ ކަމެއްކަން ރަސޫލާގެ ސުންނަތުން އެނގިގެންދެއެވެ. އަދި ޝައިޠާނާގެ ވަސްވާސްތަކުން ސަލާމަތްވުމަށް ޓަކައި ކުރެވިދާނެ ގިނަ ދުޢާތައް އެބަހުއްޓެވެ.
ކުރުސި ކިޔެވުމަކީ ވެސް އޭގެ ސަބަބުން އިންސާނާ ޝައިޠާނާގެ ވަސްވާސްތަކުން ރައްކާތެރިކޮށްދެއްވާނެކަމެކެވެ. ރޭގަނޑު ނިދުމުގެ ކުރިން ކުރުސި ކިޔަވައިފިނަމަ އެ ރޭ އެމީހަކު ޝައިޠާނާގެ ވަސްވާހުން ސަލާމަތްކޮށްދެއްވާނެ ކަން ރަސޫލާގެ ސުންނަތުން އެނގެންއެބައޮތެވެ. އެހެންކަމުން ޝައިޠާނާގެ ކިބައިން ދުރުހެލިވެ ޝައިޠާނާގެ މަސައްކަތް، ޝައިޠާނާ ބޭނުންވާ ބޭނުންވުން ހާސިލުވިޔަނުދޭން އަޅުގަނޑުމެން މަސައްކަތްކުރަން އެބަޖެހެއެވެ. އޭރުން ޝައިޠާނާގެ ވަސްވާސްތަކަށް ނުހެއްލި ރަނގަޅު މަގުގައި އަޅުގަނޑުމެންނަށް ފައިތިލަ ސާބިތުކޮށްގެން ތިބެވޭނެއެވެ.
އެހެންނުވެއްޖެކަމަށް ވާނަމަ ދީނުގައި އަންގަވާފައިވާ ކަންކަން ނުކޮށް ދާނެ ދިމާލަކަށް ދާން ދީލާލައިގެން ތިބެއްޖެނަމަ ޝައިޠާނީ ވަސްވާސްތަކަށް ހެއްލި ގޯހުންގޮސް މީހާގެ ދިރިއުޅުން ނޭދެވޭ ގޮތްތަކަކަށް ބަދަލުވެގެން ހިނގައިދާނެއެވެ. އޭގެ ސަބަބުން ދުނިޔޭގަ ވެސް އެމީހަކަށް ހިތާމަތަކާ ދަތިކަން އަދި ދުނިޔޭގެ ދިރިއުޅުމަކީ އުނދަގޫކަމެއްގެ ގޮތުގައިވެގެން ހިނގައިދާނެއެވެ.
މި ހުރިހާ ސަބަބުތަކަށް ޓަކައި އިސްލާމްދީނުގައި ޝައިޠާނާގެ ކިބައިން ރައްކާތެރިވުމަށް އަންގަވާފައިވާ އެންގެވުންތަކަށް ތަބާވެ އެގޮތަށް އަޅުގަނޑުމެންގެ އަމަލުތައް ބަހައްޓަން ޖެހެއެވެ. އޭރުން އިންޝާﷲ އަޅުގަނޑުމެންނަކީ ދެދުނިޔޭގަ ވެސް ކާމިޔާބުލިބޭ ބަޔަކަށް ވެގެންދާނެއެވެ.