ރާއްޖޭގައި ކެންސަރު ބަލި ގިނަވެފައިވާ ސަބަބު ދެނެގަތުމަށް މިހާރު ދިރާސާއެއް ފަށައިފައިވާ ކަމަށް ހެލްތު މިނިސްޓަރު އަޙުމަދު ނަސީމް ވިދާޅުވެއްޖެއެވެ.
ދުނިޔޭގެ ސިއްހަތު ދުވަހާ ގުޅިގެން ބޭއްވި ޚާއްޞަ ޖަލްސާގައި ވާހަކަދައްކަވަމުން މިނިސްޓަރު ނަސީމް ވިދާޅުވީ ރާއްޖޭގައި ޕްރައިމަރީ ހެލްތުކެއާގެ ނިޒާމު އާރޯކޮށް އަލުން ފެށުމަށް ސަރުކާރުން ތައްޔާރު ވަމުން އަންނަ ކަމަށެވެ.
ހަމައެހެންމެ، ކެންސަރު ބައްޔަށް ރާއްޖޭގައި މީހުން ހުށަހެޅޭ ސަބަބުތައް ދެނެގަތުމަށް، ޑަބްލިޔުއެޗްއޯއާ ގުޅިގެން ދިރާސާކުރުމަށް މިހާރު ފަށާފައިވާ ކަމަށް މިނިސްޓަރު ވިދާޅުވިއެވެ.
"ކެއިން ބުއިމާއި މާހައުލުގެ ޒަރީއާއިން ކުރިމަތިވާ ސިއްހީ މައްސަލަތައް ދެނެގަތުމަށް، އަދި ވަކިން ޚާއްޞަކޮށް ކެންސަރު ބައްޔަށް ރާއްޖޭގައި މީހުން ހުށަހެޅޭ ސަބަބުތައް ދެނެގަތުމަށް، ޑަބްލިޔުއެޗްއޯއާ ގުޅިގެން ދިރާސާކުރުމަށް ވަނީ ފެށިފައި،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މި މަސައްކަތުގެ އެންމެ ބޮޑު ބޭނުމަކީ ރައްޔިތުންނާ ގާތުން ޚިދުމަތް ދިނުމާއެކު، ރައްޔިތުންނަކީ ސިއްހީ ކަންކަމަށް ހޭލުންތެރިވެ، އެކަންކަމަށް ފަރުވާ ބަހައްޓާ ބަޔަކަށް ހެދުން ކަމަށެވެ. އަދި ޕެންޑެމިކްތަކާ، ގުދުރަތީ އެކިއެކި ކާރިސާތަކުގައި ވެސް، ތިމާވެށި ހިމާޔަތް ކުރުމުގައި ވެސް 'ރެޒީލިއެންޓް' ނުވަތަ ވިލުންވެރި ބަޔަކަށް ހެދުން ކަމަށް ވިދާޅުވިއެވެ.
މިނިސްޓަރު ނަސީމްގެ ވާހަކަފުޅުގައި ވަނީ ރާއްޖެއަކީ ކޮވިޑްގެ ކަންކަން އެންމެ ރަނގަޅަށް މެނޭޖުކުރި އެއް ގައުމު ކަން ފާހަގަކުރައްވައި، ރައީސް އިބްރާހީމް މުޙައްމަދު ޞާލިޙަށް ޚާއްޞަ ޝުކުރެއް އަދާކުރައްވައިފައެވެ.
"ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙުގެ ސީދާ ބެއްލެވުމުގެ ދަށުން މިއީ ކޮވިޑްގެ ކަންކަން އެންމެ ރަނގަޅަށް މެނޭޖް ކުރި އެއް ގައުމު. އެންމެ އަވަހަށް ބޯޑަރު ހުޅުވާ އިޤްތިޞާދީ އަދި އިޖްތިމާއީ ހަރަކާތްތަކަށް ރުޖޫއަވި ގައުމު. އާދެ، ކޮވިޑްގެ އެންމެ ނުރައްކާ ހާލަތުން އެންމެ އަވަހަށް އަރައިގަތް އެއް ގައުމަކީ ދިވެހިރާއްޖެ،" ނަސީމް ވިދާޅުވިއެވެ.