މި އަހަރުގެ ރަމަޟާންމަހާ ދިމާކޮށް މަޝްހޫރު ލަވަކިޔުންތެރިޔާ ޝަލަބީ އިބްރާހިމާއި ސަން މީޑިއާ ގުރޫޕް ގުޅިގެން ގެނެސްދޭ "ރާގުރާގުން"ގެ ފުރަތަމަ އެޕިސޯޑް ރޭ ދައްކައިލައިފިއެވެ.
އެ އެޕިސޯޑުގައި ދައްކައިފައިވަނީ ޝަލަބީގެ "ޗާލޫ ޖަޒީރާ" މި ލަވައެވެ. އެ ލަވަ ލައިވްކޮށް "ސަން"ގެ ފޭސްބުކް ޕޭޖުން ދެއްކިއިރު ގިނަ ބަޔަކު ވަނީ މި ލަވަ ބަލައިފައެވެ.
ޝަލަބީ ބުނީ މި ލަވައަކީ ވަރަށް ގިނަ ފޭނުންގެ ވެސް އެދުމާއެކު އޭނާ ނެރުނު ލަވައެއް ކަމަށެވެ. އަދި މި ލަވަ ގިނަ ބަޔަކަށް ކަމުދާނެކަމަށް އުންމީދު ކުރާ ކަމަށް އޭނާ ބުންޏެވެ.
ޝަލަބީ ބުނި ގޮތުގައި މި ޕްރޮގްރާމަކީ އޭނާ ވަރަށް ކުރިންސުރެ ދެކެމުން އައި ހުވަފެނެކެވެ. މި ޕްރޮގްރާމުގެ މަގުސަދަކީ އާޓިސްޓުންނަށް ޕްލެޓްފޯމެއް ހޯދަދިނުންކަމަށް ޝަލަބީ ބުންޏެވެ.
"މި ޕްރޮގްރާމުގައި ފެނިގެންދާނެ އަޅުގަނޑުގެ އިތުރުން ހަތަރު އާޓިސްޓުން ވެސް. ވަރަށް އެންމެނަށް ވެސް އެނގޭ ކަހަލަ ލަވަތަކެއް އަޅުގަނޑުމެން މި ހުރީ ޗޫޒް ކޮށްފަ،" ޝަލަބީ ބުންޏެވެ.
ޝަލަބީގެ ޗާލޫ ޖަޒީރާ މިހާރު ސަން މީޑީއާ ގުރޫޕްގެ ސައުންޑް ކްލައުޑުން ވެސް އަޑު އަހައިލެވޭނެއެވެ.
މި ލަވައިގެ ރެކޯޑިން އެންޑް މިކްސިން ހަދައިފައިވަނީ ހުސައިން ތައުފީގެވެ.
ރާގުރާގުންގެ އައު އެޕިސޯޑެއް އަންނަ އާދީއްތަ ދުވަހުގެ ރޭ 10:00ގައި ސަންގެ ފޭސްބުކް ޕޭޖުން ދައްކާނެއެވެ.