މިރޭ ހަނދު ފެނުމުގެ ފުރުސަތު ބޮޑު ކަމަށާއި އެހެންކަމުން މިއަހަރުގެ ރޯދަ މަހުގެ ފުރަތަމަ ދުވަހަށް ވާނީ މާދަމާ ކަމަށް ފަލަކީ ހިސާބުތަކުން ދައްކައިފިއެވެ.
ދިވެހިރާއްޖޭގައި ރޯދަ މަސް ފެށުމުގައި އަމަލު ކުރާ އުސޫލަކީ ދިވެހިރާއްޖެއަށް އިރުއޮއްސޭއިރު ހަނދު ފެންމަތީގައި ހުންނާނެކަމަށް ފަލަކީ ހިސާބުތަކުން ދައްކާ ރެއެއްގައި ދިވެހިރާއްޖެއަށް ނުވަތަ އެހެން އިސްލާމީ ގައުމަކަށް ހަނދު ފެނިއްޖެނަމަ ދެން ޖެހިގެން އަންނަ ދުވަހު ރޯދަ ހިފާން ފެށުމެވެ.
ފަލަކީ ކޮމެޓީގެ ކުރީގެ މެމްބަރު އިޔާޒް ނަސީމް، މި ނޫހަށް މިއަދު ވިދާޅުވިގޮތުގައި ފަލަކީ ގޮތުން ބަލާއިރު، މި ހިނގާ ޝަޢުބާން މަސް ނިމުމުގެ ގޮތުން މާރަހަ ވާނީ ރާއްޖޭގެ ގަޑީން މިއަދުގެ 11:24 ގައެވެ. އެހެންކަމުން ފަލަކީ ގޮތުން އާ ހަނދު އުފަން ވުމަށް ބަލައިގެން ހަނދު މަސް ފަށާ ގައުމުތަކަށް ރަމަޟާން މަހުގެ ފުރަތަމަ ދުވަހަކީ މާދަމާ ކަމަށް އޭނާ ވިދާޅުވިއެވެ.
ރޯދަ މަހަށް ހަނދު ސާބިތު ކުރުމަށްޓަކައި ކޮންމެ އަހަރަކު ވެސް ބާއްވާ ޖަލްސާ މިރޭ ބޭއްވުމަށް އިސްލާމިކް މިނިސްޓްރީން ވަނީ ނިންމައިފައެވެ.
ކަލަންޑަރު ބުނާ ގޮތުން ވެސް މިއަހަރުގެ ރޯދަ މަހުގެ ފުރަތަމަ ދުވަހަކީ މާދަމާއެވެ.
މުސްލިމުންގެ ހަރަމްފުޅުތައް އެ ބިމެއްގައި ހުރި ސައުދީ އަރަބިއްޔާގައި ހަނދު ބެލުމުގައި ބޮޑަށް އިސްކަން ދެނީ ހަމަ ލޮލުން ފެނުމަށެވެ. އެހެން ނަމަވެސް ހަމަ ލޮލަށް ހަނދު ނުފެންނާނެކަމަށް ފަލަކީ ހިސާބުތަކުން ދައްކާ ނަމަ ހަނދު ބަލަން ދިއުމެއް ސައުދީ އަރަބިއްޔާގައި ނޯވެއެވެ.
ހަމަ ލޮލުން ހަނދު ބެލުމުގެ އިތުރުން ފަލަކީ ހިސާބުތަކުން ހަނދު ސާބިތު ކުރުމުގެ އުސޫލެއްވެސް ސައުދީ އަރަބިއްޔާއިން ކަނޑައަޅައިފައި ވެއެވެ. މި ގޮތުން އެ ގައުމުގައި އަމަލުކުރާ ގޮތަކީ، އިރު އޮއްސުމުގެ ކުރިން މާރަހަވެފައި، އިރު އޮއްސުމުގެ ފަހުން ހަނދު އޮއްސޭނަމަ، އައު މަސް ފެށުނީ ކަމަށް ބެލުމެވެ.