ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އާއި ޔޫތު މިނިސްޓްރީ ގުޅިގެން މުޅި ރާއްޖޭގައި ކުރިއަށް ގެންދާ ރާއްޖެ އެޓޯލް ވޮލީބޯލް ޗެމްޕިއަންޝިޕްގެ ގދ. އަތޮޅުގެ މުބާރާތް މާދަމާ ވާދޫގައި ފަށާ ގޮތަށް ހަމަޖެހިއްޖެއެވެ.
ފުރަތަމަ އަތޮޅު މުބާރާތް ބާއްވާފައިވަނީ ފ. މަގޫދޫގައެވެ. އެ އަތޮޅުގެ ފިރިހެން ޑިވިޝަންގެ ޗެމްޕިއަންކަން ހޯދީ ބިލެއްދޫއެވެ. އަދި އަންހެން ޑިވިޝަންގެ ޗެމްޕިއަންކަން ހޯދީ މަގޫދޫއެވެ.
ވާދޫގައި މާދަމާ މުބާރާތް ފެށުމަށް ހަމަޖެހިފައިވާއިރު، މިހާރު ވަނީ މުބާރާތުގެ ރެފްރީންނާއި އޮފިޝަލުން އެ ރަށަށް ގޮސްފައެވެ. ވާދޫގައި މުބާރާތް ކުރިއަށް ދާނީ މާދަމާއިން ފެށިގެން އަންގާރަ ދުވަހުގެ ނިޔަލަށެވެ.
މުބާރަތް ފެށުމަށް މިއަދު ވާދޫއަށް ދިޔަ ވަފުދަށް އެރަށުން މަރުޙަބާ ދަންނަވަނީ -- ފޮޓޯ / ވީއޭއެމް
މި މުބާރާތުގައި އަންހެން ޑިވިޝަންގެ ތިން ޓީމަކުން ވަނީ ބައިވެރިވެފައެވެ. އެއީ ކާއްޑޭ ސްޕޯޓްސް އެކަޑަމީ (ކޭއެސްއޭ)، ސޮސައިޓީ ފޯ ފިޔޯރީ އެންޑް ކޮމިއުނިޓީ އެމްޕަވަމަންޓް (ސީއެފްއީ) އަދި ސޮސައިޓީ ފޯ ވާދޫ ޔޫތު (އެސްވީވައި) އެވެ. މި ޑިވިޝަންގެ މެޗުތައް ކުރިއަށް ދާނީ ކޮންމެ ޓީމެއް ކޮންމެ ޓީމަކާ ވާދަކޮށް، ތާވަލްގެ އެއް ވަނަ ޓީމާއި ދެ ވަނަ ޓީމު ފައިނަލަށް ދާ ގޮތަށެވެ.
ފިރިހެން ޑިވިޝަންގައި ބައިވެރިވެފައިވަނީ އެސްވީވައި އަދި އެސްއެފްއީ އެވެ. މި ޑިވިޝަންގައި ދެ ޓީމު ބައިވެރުވެފައިވާތީ، މި ޑިވިޝަން ކުޅޭނީ ބެސްޓް އޮފް ތްރީއަށެވެ. އެއީ ދެ ޓީމުގެ ދެމެދުގައި ތިން މެޗު ކުޅޭ ގޮތަށެވެ. ދެ މެޗު ކާމިޔާބުކުރާ ޓީމަކަށް ޗެމްޕިއަންކަން ލިބޭ ގޮތަށެވެ.
އަތޮޅު މުބާރާތަށްފަހު ދެން ކުރިއަށް ދަނީ ޒޯން މުބާރާތެވެ. ޒޯން ކުރިއަށް ގެންދިޔުމަށް ހަމަޖެހިފައި އޮތީ ހަތް ބަޔަކަށް ބަހާލައިގެންނެވެ. ޒޯން އެކެއްގައި ހިމެނެނީ ހއ. ހދ އަދި ށ އަތޮޅެވެ. ޒޯން ދޭއްގައި އޮތީ ނ. ޅ. ބ އަދި ރ އަތޮޅެވެ. ޒޯން ތިނެއްގައި އޮތީ ކ. ވ. އއ އަދި އދ އަތޮޅެވެ. ޒޯން ހަތަރެއްގައި އޮތީ މ. ފ އަދި ދ އަތޮޅެވެ. ޒޯން ފަހެއްގައި އޮތީ ތ. އަތޮޅާއި ލ. އަތޮޅެވެ. ޒޯން ހައެއްގައި ގއ. އަތޮޅާއި ގދ. އަތޮޅު އޮތްއިރު، ޒޯން ހަތެއްގައި އޮތީ އައްޑޫ އާއި ފުވައްމުލަކެވެ.
މިއީ ރާއްޖޭގެ ވޮލީ އެހެން ހަރުފަތަކަށް ގެންދިޔުމަށާއި އަތޮޅު ތެރޭގައި ވޮލީގެ ފޯރި ގަދަކުރުމަށާއި އަތޮޅު ތެރޭގައި ވޮލީއަށް މޮޅެތި ކުޅުންތެރިން އުފެއްދުމަށް ޔޫތު މިނިސްޓްރީއާއި ވީއޭއެމްއިން ކުރާ މަސައްކަތެއް ކަމަށް މުބާރާތް ހިންގުމާ ހަވާލުވެ ހުންނެވި ވީއޭއެމްގެ ނައިބު ރައީސް ޢަލީ އަޝްރަފް ވިދާޅުވެއެވެ.