ސްޕެއިންގެ ރެއާލް މެޑްރިޑަށް ކުޅެމުން އަންނަ ބެލްޖިއަމްގެ އެޓޭކިން މިޑްފީލްޑ އެޑެން ހަޒާޑް ފިޓުކޮށް ހުރި ނަމަވެސް، ކުލަބުން ބޭނުންވަނީ އޭނާ ވިއްކާލަން ކަމަށް މީީޑިއާ ރިޕޯޓުތައް ބުނެފިއެވެ.
ބެލްޖިއަމްގެ ކެޕްޓަންކަން ވެސް ކުރަމުން އަންނަ ހަޒާޑް ރެއާލަށް ބަދަލުވެފައިވަނީ 2019 ވަނަ އަހަރުއެވެ. އޭނާ ރެއާލަށް ބަދަލުވެފައިވަނީ އިނގިރޭސި ޕްރިމިއާ ލީގުގެ ޗެލްސީގައި ހުރެފައެވެ. އޭނާ ރެއާލަށް ބަދަލުވެފައިވަނީ 110 މިލިއަން ޕައުންޑަށެވެ.
ރެއާލަށް ބަދުވި ފަހުން އޭނާއަށް މާ އެދެވޭ ކުޅުމެއް ދެއްކިފައެއް ނުވެއެވެ. އަދި އަނިޔާގެ ގިނަ މައްސަލަތަކަކާހުރެ ޓީމުން ޖާގަ ހޯދުމަށް ވެސް އުނދަގޫތަކެއް ކުރިމަތިވިއެވެ.
މި ސީޒަންގެ ސްޕެނިޝް ލީގުގައި ހަޒާޑް ފެނިފައިވަނީ 17 މެޗުންނެވެ. ނަމަވެސް އޭގެ ތެރެއިން އޭނާ ފުލް 11 ގައި ހިމެނިގެން ކުޅެފައިވަނީ ހަތް މެޗުގައެވެ. އަދި މި ފަހަރުގެ ލީގުގައި ހަޒާޑަށް އަދި ގޯލެއް ކާމިޔާބު ކުރެވިފައެެއް ނުވެއެވެ.
ފިޓްނަސް ގިނަ މައްސަލަތަކެއް ހުރުމާއެކު ހަޒާޑްގެ ބަދަލުގައި ކޯޗު އަންޗެލޮޓީ ފުރުސަތު ދެމުން އަންނަނީ ބްރެޒިލްގެ ވިނީޝިއުސް ޖޫނިއާއަށެވެ.
ރިޕޯޓުތައް ބުނެފައިވާ ގޮތުގައި މި ސީޒިނަށްފަހު ހަޒާޑްގެ އިތުރުން ގެރެތް ބޭލް ވެސް ވިއްކާލަން ކުލަބުން ބޭނުންވެއެވެ. ސަބަބެއްގެ ގޮތުގައި ރިޕޯޓުކޮށްފައިވަނީ ކޯޗު އަންޗެލޮޓީގެ ޕްލޭންގައި އެ ކުޅުންތެރިންގެ މާ ބޮޑު ބައިވެރިވުމެއް ނެތުމުންނެވެ.
ހަޒާޑް ރެއާލަށް ބަދަލުވި ފަހުން އެ ޓީމަށް އޭނާ ވަނީ 47 މެޗު ކުޅެދީ، ހަތަރު ލަނޑު ޖަހައިދީފައެވެ. ބެލްޖިއަމްގެ ގައުމީ ޓީމަށް އޭނާ ކުޅެދިން 116 މެޗުގައި ވަނީ 33 ލަނޑު ކާމިޔާބުކޮށްދީފައެވެ.