ރާއްޖޭގެ ގައުމީ ޓީމުގެ އެއް ނަންބަރު ގޯލް ކީޕަރު މުހައްމަދު ފައިސަލް އޭނާގެ ފުޓުބޯޅަ ކެރިއަރު ހުއްޓާލުމަށް ތައްޔާރުވަމުންދާކަމަށް އޭނާ ބުނެފިއެވެ.
ސޯޝަލް މީޑިއާގައި މިއަދު އޭނާ ހާމަކުރި ޕޯސްޓެއްގައި ބުނެފައިވަނީ، ވަރަށް ގިނަ ސަބަބުތަކަކާ ހުރެ އޭނާގެ ފުޓުބޯޅަ ކެރިއަރު ހުއްޓާލުމަށް މިހާރު ތައްޔާރުވަމުންދާ ކަމަށެވެ. ނަމަވެސް އެއީ ކޮން ސަބަބުތަކެއް ކަމެއް އޭނާ ނުބުނެއެވެ.
އަދި އޭނާގެ ކެރިއަރު ހުއްޓާލާ ދުވަހަކުން އޭނާއަށް ގުޅާ ކޮންމެ މީޑިއާއަކަށްވެސް އޭނާގެ ތަޖުރިބާގައި ރާއްޖޭގެ ފުޓުބޯޅައިގެ ހަގީގަތް ވަރަށް ރަނގަޅަށް ކިޔައިދޭނެކަމަށް ފައިސަލް ބުންޏެވެ.
ދިވެހި ފުޓުބޯޅަދެކެ ލޯބިވާ އެންމެންނަށް މިހާތަނަށް ނޭނގޭ އެތައް ހަގީގަތެއް އޭނާ ހާމަކޮށްދޭނެކަމަށްވެސް ފައިސަލް ބުންޏެވެ.
ފައިސަލް ވަނީ އޭނާގެ ކެރިއަރުގައި ރާއްޖޭގެ ބޮޑެތި ކުލަބުތަކަށް ކުޅެދީފައެވެ. ވިކްޓަރީ، ވެލެންސިއާ، އީގަލްސް އަދި ނިއު ރޭޑިއަންޓަށް ކުޅެފައިވާ ފައިސަލްއަކީ ރާއްޖޭގައި ފާހަގަކޮށްލެވޭ ގޯލްކީޕަރެކެވެ.
ނިމިދިޔަ ޕްރެޒިޑެންޓްސް ކަޕް ވެލެންސިއާއަށް ހޯދައިދިމުގައިވެސް ފައިސަލް ވަނީ މުހިންމު ދައުރެއް އަދާކޮށްފައެވެ.
ރާއްޖޭގެ ގައުމީ ޓީމުގެ ގޯލު ބަލަހައްޓާ ފައިސަލް ވަނީ 2018 ވަނަ އަހަރުގެ ސާފް ޗެމްޕިއަންޝިޕް ރާއްޖެއަށް ކާމިޔާާބުކޮށްދިނުމުގައި އިސް ދައުރެއް އަދާކޮށްފައެވެ. އަދި އޭނާ ވަނީ އެ އަހަރުގެ މުބާރާތުގެ އެންމެ މޮޅު ކުޅުންތެރިޔާގެ މަގާމު ވެސް ހޯދައިފައެވެ.