ކުރީގެ ރައީސް އަބްދުﷲ ޔާމީނަށް އަބްދުލްގައްޔޫމަށް މާ ގިނަ ދުވަހަކު މިނިވަންކޮށް ނުހުރެވޭނެކަމަށް ރައްޔިތުން މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު ވިދާޅުވެއްޖެއެވެ.
ށ. ކޮމަންޑޫ ދާއިރާގެ ބައި އިލެކްޝަންގައި ކުރިމަތިލާ މުހައްމަދު ރާޝިދުގެ ކެމްޕެއިނަށް ރޭ ކުނޫޒުގައި ބޭއްވި ޖަލްސާއެއްގައި ވާހަކަދައްކަވަމުން ވައްޑެ ވިދާޅުވީ ކޯޓުން ރައީސް ޔާމީން މިނިވަން ކުރި ނަމަވެސް ދެން މާގިނަ ދުވަހު އެ މަނިކުފާނަށް މިނިވަނެއްގެ ގޮތުގައި ނުހުރެވޭނެ ކަމަށެވެ.
މީގެ ކުރިން ކޯޓުތަކުން "ފަޓާސްބަރިއެއްހެން ހުކުމް ކުރި" ނަމަވެސް މިހާރު ކޯޓުތަކުން ހުކުމް ކުރާނީ އިންސާފުވެރިކޮށް ކަމަށް އޭނާ ވިދާޅުވިއެވެ. އަދި އެއް ހުކުމުން ރައީސް ޔާމީން ސަލާމަތް ވިނަމަވެސް އަދިވެސް އެތައް ވައްކަމުގެ މައްސަލަތަކެއް އެ މަނިކުފާނުގެ މައްޗަށް އުފުލޭނެކަމަށް ވައްޑެ ވިދާޅުވިއެވެ.
"އެވަރެއް ނޫން ކުރައްވާފަ ހުރީކީއެއް. އަޅުގަނޑުމެން އަތޮޅުން ރ. އަތޮޅުން އެކަނިވެސް އެންމެ ރަނގަޅަށް އޮތް 15 ރަށް ވިއްކާލާފަ އެ ލާރި ކާލައިގެން ތިއްބެވީ،" ވައްޑޭ ވިދާޅުވިއެވެ.
މިގޮތަށް ރަށްތައް ވިއްކައިގެން އެހެން މީހުން ހަރު މުދާ ވިއްކާ ވާހަކަ ދައްކަން ލަދުގަންނަން ޖެހޭނެ ކަމަށްވެސް އޭނާ ވިދާޅުވިއެވެ.
މީގެ އިތުރުން ވައްޑެ ވިދާޅުވީ އިދިކޮޅުގައި ތިބި ފަރާތްތަކުން ދައްކާނެ ވާހަކައެއް ނެތުމުން މިހާރު އިންޑިއާ އައުޓޭ ކިޔައި އިންޑިއާއާ ޖައްސާލާފައިވާކަމަށެވެ. އަދި ޔާމީންގެ ވެރިކަމުގައި ނެތް އިންޑިއާ އަސްކަރިއްޔާއެއް މިހާރު ނޯންނާނެކަމަށް ވެސް އޭނާ ވިދާޅުވިއެވެ.
ހަމައެއާއެކު ވައްޑެ ވަނީ، އަތޮޅުތަކުގެ ރައްޔިތުންނަށް އެންމެ ބޮޑު އެހީއެއް ދޭ މަދަދުގާރުންނަކީ އިންޑިއާކަމަށް މިއަދު ދިވެހި ރައްޔިތުން ހެކިވާނެކަމަށް ވެސް ވިދާޅުވެފައެވެ.
އޭނާ ވިދާޅުވީ އަތޮޅުތަކުގައި ހާލުދެރަ ބަލި މީހުންނަށް ހެލިކޮޕްޓަރުގެ ޒަރިއްޔާއިން އެހީތެރިވެދެނީ އިންޑިއާއިންކަމަށެވެ.
"އޭރު އޯލެވެލް ކިޔަވަދެވޭވަރަށް ރާއްޖޭގައި ޓިޗަރުން އުފެދިފައެއް ނެތް. ގާތްގަނޑަކަށް ރާއްޖޭގެ ކޮންމެ ރަށެއްގައި އަދި މި މާލޭގަ ވެސް ސްކޫލެއްގައި އޯލެވެލް ފެންވަރަށް ކިޔަވަދޭން އެހީތެރިވެފައެއް ނުހުންނާނެ އަޅުގަނޑުމެންގެ އަވަށްޓެރި އިންޑިއާ ނޫނީ،" ވައްޑެ ވިދާޅުވިއެވެ.
މީގެ އިތުރުން އޭނާ ވިދާޅުވީ ރަށްރަށުގެ ސިއްހީ މަރުކަޒުތަކުގައި އިންޑިއާގެ ޑޮކްޓަރުންނާއި ނަރުހުންނާ ނުލައި ހިދުމަތް ދެވިފައެއް އަދި ނެތް ކަމަށެވެ.
އެ ކެމްޕޭން ޖަލްސާގައި ވައްޑޭ ވަނީ އިދިކޮޅު ޕީޕީއެމްއަށާއި އެ ޕާޓީގެ ކެންޑިޑޭޓަށް ވަރަށް ބޮޑަށް ފާޑު ވިދާޅުވެފައެވެ.
އަންނަ ހޮނިހިރު ދުވަހު ބާއްވަން ނިންމާފައިވާ ކޮމަންޑޫ ދާއިރާގެ ބައި އިލެކްޝަނުގެ ފޯރި އެ ދާއިރާގައި ވަނީ ވަރަށް ބޮޑަށް ގަދަވެފައެވެ.