ރަށްވެހިވެފައިވާ ރަށުގައި ނޫޅުނަސް ގެދޮރުވެރިޔާ ލޯނަށް އެދެވޭ ގޮތަށް އުސޫލު ބަދަލުކޮށްފިއެވެ.
ހައުސިން ޑިވިލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) އިން މިއަދު ބުނީ، އެ ލޯނު ޕްރޮގްރާމުގެ ތެރޭގައި ހިމެނޭ "ރަށްވެހި ވެފައިވާ ރަށުގައި ދިރިއުޅޭތާ މަދުވެގެން ތިން އަަހަރު ވެފައި ވުން" ޝަރުތު އުނިކުރަން ހައުސިން މިނިސްޓްރީން އަންގާފައިވާ ކަމަށެވެ.
އެހެންކަމުން އެ ޝަރުތު ހަމަ ނުވުމުގެ ސަބަބުން މީގެ ކުރިން ލޯނު ބާތިލު ކުރި މީހުންނަށް ވަނީ، އެމީހުން ބޭނުން ނަމަ އަލުން ފޯމު ހުށަހަޅަން ފުރުސަތު ހުޅުވާލާފައެވެ.
އެކަމާ ގުޅޭ އިތުރު މައުލޫމާތު ހޯދަން ބޭނުންވާ މީހުން، 3000129، 3000130 އަދި 3334666 އަށް ގުޅުމަށް އެޗްޑީއެފްސީން ވަނީ އެދިފައެވެ.
ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން މިއަދު "ސަން"އަށް ވިދާޅުވީ އެ ބަދަލު ގެނައީ ގިނަ އަދަދެއްގެ މީހުންގެ އެދުމުގެ މަތިން ކަމަށެވެ.
"މިހާރު މާލޭގަ އުޅޭމީހުން ރަށަށް ބަދަލުވާން ބޭނުންވަނީ ގެ ހަދައިގެން. ކުރިން އޮތް ގޮތުން އެ ފުރުސަތެއް ނެތް. އެހެންވީމަ ސަރުކާރުން ނިންމީ އެ ފުރުސަތު ދޭން. މާލެ ތޮއްޖެހެމުން ދާތީ. އަސްލު މަގުސަދަކީވެސް އެއީ،" އަކްރަމް ކަމާލުއްދީން ވިދާޅުވިއެވެ.
ގެދޮރުވެރިޔާ ލޯނު ސްކީމަކީ ރަށްރަށުގައި ދިރިއުޅޭ މީހުންގެ ގެދޮރު ބިނާކުރުމަށާއި މަރާމާތު ކުރުމަށް ހާއްސަ ލޯން ސްކީމެކެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެ ލޯނު ސްކީމު އިފްތިތާހުކޮށް ދެއްވީ މިދިޔަ އަހަރުގެ ޖޫން މަހުގެ ތެރޭގައިއެވެ.
ގެދޮރުވެރިޔާ ސްކީމްގެ ދަށުން ލޯނު ދޫކުރާނީ އަމިއްލަ ގޯއްޗެއްގައި އަލަށް ތަނެއް އިމާރާތް ކުރަން ނުވަތަ ހުރި އިމާރާތް މަރާމާތު ކުރުމަށް ނުވަތަ ނުނިމިހުރި މަސައްކަތެއް ނިންމުމަށާއި ހުރި އިމާރާތަށް ބައެއް އިތުރު ކުރުމަށެވެ.
ސްކީމްގެ ތަފްސީލު:
- ގިނަވެގެން ނެގޭނީ 700،000 ރުފިޔާ
- އަނބުރާ ދައްކަން ދީފައިވަނީ 15 އަހަރާއި 20 އަހަރާ ދެމެދުގެ މުއްދަތެއް
- އިންޓްރެސްޓް ރޭޓް: ހަ ޕަސެންޓް
- ލޯނުގެ މޯގޭޖަކަށް ނަގާނީ އިމާރާތް ކުރެވޭ ތަން އެކަނި
- އިމާރާތްކުރަން ދޭ ގްރޭސް ޕީރިއަޑް: 12 - 15 މަސް
- ލޯނަށް އެދުމުގައި މަދުވެގެން ދެ ފަރާތް ހިމެނެންވާނެ
މި ސްކީމްގެ ދަށުން ލޯނުގެ ގޮތުގައި ދޫކުރާނީ މަޝްރޫއުގެ ޖުމުލަ އަދަދުގެ 80 ޕަސެންޓަށްވާ ފައިސާއެވެ. އަދި ބާކީ 20 ޕަސެންޓަކީ ލޯނު ނަގާ ފަރާތުގެ ހިއްސާއެކެވެ. އެ 20 ޕަސެންޓަކީ މަޝްރޫއުއަށް ކޮށްފައިވާ ހަރަދާއި ގަނެފައިވާ ތަކެތި ނުވަތަ ގޯތީގައި ބޭނުންކުރާ އިމާރާތް އަދި ހުސް ބިމެއް ނަމަ، އެ ބިމުގެ ގޮތުގައި ވެސް އަގުކުރެވިދާނެ އެވެ.
ގެދޮރުވެރިޔާ ލޯނުގެ ޝަރުތުތައް:
- ލޯނަށް އެދޭ ފަރާތުގެ ނަމުގައި ބިމެއް ރަޖިސްޓްރީ ކުރެވިފައި އޮތުން
- ބިން ރަޖިސްޓްރީ ކޮށްފައިވާ ރަށުގެ ރަށްވެއްސެއް ކަމުގައި ވުން
ލޯނު ދިނުމުގައި އިސްކަންދެވޭނީ ކައިވެނި ކޮށްގެން އުޅޭ ފަރާތްތަކާއި އެކަނި ދަރިން ގޮވައިގެން އުޅޭ ފަރާތްތަކަށެވެ.