ސޯޝަލް މީޑިއާ އެކްޓިވިސްޓް އަހުމަދު އަޝްރަފް (ޝުމްބާ ގޮންގް) ލަންކާގައި ހުއްޓާ ރާއްޖެ ގެނެސް ހައްޔަރުކުރި މައްސަލަ ބަލައިދިނުމަށް އެދި އިންތިގާލީ އިންސާފުގެ އޮމްބަޑްސްޕާސަންގެ އޮފީހަށް ހުށަހެޅި މައްސަލަ ބަލަން އެ އޮފީހުން ނިންމައިފިއެވެ.
އެ މައްސަލަ މިދިޔަ މަހުގެ 13ގައި ޝުމްބާގެ ފަރާތުން އިންތިގާލީ އިންސާފުގެ އޮފީހަށް ހުށަހެޅީ ކުރީގެ ޕްރޮސެކިއުޓާ ޖެނެރަލް މުހުތާޒު މުހުސިންއެވެ.
މުހުތާޒު ވިދާޅުވީ އެ މައްސަލަ ހުށަހެޅީ ޝުމްބާ ލަންކާގައި ހުއްޓާ ގާނޫނާ ހިލާފަށް ހައްޔަރުކޮށްފައިވާތީކަމަށެވެ. އަދި ރާއްޖެ ގެނެސް ބަންދުގައި ބަހައްޓައިގެން ޖިސްމާނީ އަދި ނަފްސާނީ ގޮތުން ލިބުނު އަނިޔާއަށް ބަދަލު ހޯދުމުގެ ބޭނުމުގައި ކަމަށެވެ.
އެ މައްސަލައާ ގުޅިގެން ޖުމްލަ 11 ފަރާތެއްގެ މައްސަލަ ބަލައިދިނުމަށް ޝުމްބާ ވަނީ އެ އޮފީހަށް ހުށަހަޅާފައެވެ.
އޭގެތެރޭގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމާއި ކުރީގެ ހޯމް މިނިސްޓަރު އުމަރު ނަސީރާ މެދު ވެސް ފިޔަވަޅު އެޅުމަށް މައްސަލާގައި އެދިފައިވެއެވެ.