ސާފް ޗެމްޕިއަންޝިޕުގައި މާދަމާ ބަންގްލަދޭޝްއާ ދެކޮޅަށް ރާއްޖެ ކުޅޭ މެޗުގައި ވެސް ކުރިން މެޗުގައި ފެނުނު ފަދަ ފޯރިއެއް ސަޕޯޓަރުންގެ ފަރާތުން ފެންނަން ބޭނުންވާ ކަމަށް ގައުމީ ޓީމުގެ ކޯޗު އަލީ ސުޒޭން ބުނެފިއެވެ.
ރާއްޖޭގައި މިހާރު ކުރިއަށްދާ ސާފް ޗެމްޕިއަންޝިޕްގައި ބަންގްލަދޭޝްއާ ދެކޮޅަށް މާދަމާރޭ ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ސުޒޭން ބުނީ ނޭޕާލް މެޗުގައި ގޯސްތަކެއް ހެދުނު ކަމަށާއި، އެހެން ނަމަވެސް އެ މެޗުގައި ސަޕޯޓަރުންގެ ފަރާތުން ފެނުނީ ވަރަށް ހިތްހަމަ ޖެހޭ ފަދަ ފޯރިއެއް ކަމަށެވެ.
"12 ވަނަ ކުޅުންތެރިޔާގެ ޒިންމާ ވިސްނައިގެން ތިބި ވަރަށްވުރެވެސް ބޮޑަށް، ޓީމު އުފަލުން ފުރޭ ވަރަށް ނޭޕާލު މެޗުގައި އަދާކުރި. ޔަގީން ކުރަން އެ ކޮލިޓީގައި 12 ކުޅުންތެރިޔާގެ ސަޕޯޓު މާދަމާރޭގެ މެޗުގައިވެސް އަންނާނެކަން. ޝައްކެއްވެސް ނުކުރަން،" ސުޒޭން ފާހަގަކުރިއެވެ.
ކުރީ މެޗުގައި ހެދުނު ގޯސްތަކުން އިބުރަތް ލިބިގަނެ މާދަމާގެ މެޗަށް ޓީމު ރަނގަޅު ކުރާނެ ކަމަށް ސުޒޭން ބުނި އިރު، އެ މެޗުން ޕޮޒިޓިވް ގިނަ ކަންތައްތަކެއް އޭނާ ވަނީ ފާހަގަކޮށްފައެވެ. އެގޮތުން ޖުމުލަކޮށް ޓީމުގެ ކުޅުމަށް ސުޒޭން ތައުރީފް ކުރި އިރު، އޭނާ ބުނީ މެޗުގައި މަދުވީ ހަމައެކަނި ގޯލެއް ކަމަށެވެ.
"ފުރަތަމަ މެޗަށް ބަލާއިރު ދިވެހި ޓީމު ބޭނުންވި ކާމިޔާބެއް ނުލިބުނުކަމުގައިވިޔަސް، އެ މެޗުގައި ދެއްކި ކުޅުމާއި އެ މެޗުން ރަނގަޅުކުރަންޖެހިފައި ހުރި ބައިވަރު ކަންތައްތަކެއް މިިދިޔަ ޓްރެއިނިންތަކުގައި ރަނގަޅުކުރެވުމާއެކު ހިތްހަމަޖެހޭ،" ސުޒޭން ބުންޏެވެ.
މީގެ އިތުރުން ކުރީ މެޗުން ބަލިވުމާއެކު ޓީމަށް ޕްރެޝަރު ބޮޑުވިކަން ކުރީ މެޗަށްފަހު ސުޒޭން ފާހަގަކުރި އިރު، މިއަދު އޭނާ ބުނީ އެ ޕްރެޝަރު މާނަ ކުރަނީ "ގޮތް ހުސްވާ ހިސާބަށް" ދިޔަ ވާހަކަ ނޫން ކަމަށެވެ.
"ފުރަތަމަ މެޗު ނިންމާފައި ފާހަގަ ކޮށްލިން ޕްރެޝަރަކަށް ދިޔަ ވާހަކަ. އެ ޕްރެޝަރު މިހާރު މިއޮތީ ފެންނަން. އެއީ ކޮންމެ ގޮތެއްވިޔަސް ރާއްޖެ އެއް މެޗު ކުޅެފައި ދެވަނަ މެޗަށްދާއިރު، ތާވަލުގެ ވަރަށް އުސްކޮށް ދެން ހުރި ޓީމުތައް މިއޮތީ. ނޭޕާލު އޮތީ ވަރަށް ކޮންފޮޓެބަލްކޮށް ދެ މެޗުން މޮޅުވެ އެއްވަނައިގައި. ބަންގުލަދޭޝް ވަނީ ވަރުގަދަ އިންޑިއާ ދެކޮޅަށް 10 ކުޅުންތެރިންނާއެކު ކުޅެ އެއްވަރުވެސް ކޮށްފައި."
ނޭޕާލް މެޗަށް ފަހު ޓީމުގެ ދެ ކުޅުންތެރިޔަކަށް ކޮންމެވެސް ވަރެއްގެ އަނިޔާއެއް ކުރިމަތިވެފައި ވުމުން އެ ދެ ކުޅުންތެރިންގެ ރިކަވަރީ އަށް ޓީމުގެ ޑޮކްޓަރު އަބްދު ރާފިއު މަސައްކަތް ކުރަމުން އަންނަ ކަމަށް ސުޒޭން ބުންޏެވެ. އެހެންވެ ސުޒޭން ބުނީ ނޭޕާލްއާ ދެކޮޅަށް ކުޅުނު ފުރަތަމަ 11 އަށް މާބޮޑު ބަދަލެއް ނާންނާނެ ކަމަށެވެ.